Нош кыӵегес меда вылэм оген нылпи будэтон 50 ар талэсь азьло? Огзэ гинэ ӧвӧл, куатьсэ, кудъёсыз пӧлын 2 куз кыктоос. Тае туж умой тодэ ӵужае — Чумакова Анисия Андреевна.
Вордӥськиз 1939‑тӥ арын 22‑тӥ шуркынмонэ Алнаш ёросысь Тыло гуртын. Пичи дырысен ик атайтэк будэм, атаез оже кошкыса, семьяяз бертымтэ ни. Соку ик ӵужае анаеныз ӵош медъяськыса ужам ини — сием потэ уго, изьыны но шуныт сэрег кулэ. Ӵужапайзы, соосты жаляса, вӧзаз бускель гуртэ — Кузьымгуртэ — ӧтем.
Быдэ вуыса, ӵужае бызем. Колхозын быдэс нуналъёсын ужам сяна, дораз но трос пудо вордэм. Нырысь со колхозын рядовой вал, собере дояркаын 12 ар тыршем, кунян, парсь сюдэм. Тыршыса ужамез понна со "Знак почёта" но "Трудовой Красной Знамя" орденъёсын пусъемын, "Ветеран труда", "За доблестный труд" но мукет трос пумо медальёс басьтэмын.
7 нылпи вордӥз, нырысетӥез, жаляса верано, пӧзись гудронэ усьыса кулӥз. Кӧня синкыли кисьтӥз, куректон сюлэмзэ кӧня поръяз, сое анай гинэ валалоз, дыр. Ӵужатаймы улонысь вазь кошкем, ми сое ум тодӥське ни. Вань шуг-секытэз усем ӵужае но пересь ӵужанае вылэ. Озьы ке но, нылпиосыз йӧноесь, котькытын асьсэзыз умоен возьмато, ужаны тыршо. Ӵужаелэн огъя 14 нунокез но 9 правнукез (кылдэм ке, туэ арын 10‑тӥез луоз).
Ачим али пичи нылпиен пукисько, нылпимес картэным ӵош будэтӥськом, со мыным котьма ласянь юрттэ. Паймисько ик ӵужаелы: кӧня чидам, огназ пыртӥз поттэм, ас вылаз ваньзэ кыскем. Ми нош одӥг нылпиен ӝожтӥськиськом ай, нош со кыкто нылъёссэ но сюдэм-утялтэм, бадӟымъёссэ но вунэтымтэ, берпуметӥ кыкто пиоссэ но пыд вылазы султытэм. Али но, тау Инмарлы, быгатэ ай нунокъёссэ утьыны-вордыны.
Со сяна, ӵужае туж усто пӧраськись. Пыжиськемзэ но пӧрам сиёнзэ ми "кылмес ньылыса" сииськом. Висъяса верам потэ солэн табанез, шу перогез но шу кисалез сярысь — ну сыӵе ческыт, кылын вераны уд быгаты. Куспамы пӧрамзэ "фирменной" гинэ шуиськом: "Ӵужай, фирменной табаньдэ пыж ай!.. Ӵужай, фирменной шу кисальдэ пӧзьты ай!.." Нош кыӵе усто со керттӥське! Огмес но чебер но шуныт пӧзьытэк, носкитэк уг кельты. Кузьмаськыны но кыле ай. "Тэк пукыса иняз ӧвӧл кадь", — шуэ но пуксе ини нош керттӥськыны, чиньы висёнзэ но чидаса.
Аслаз 81 аресаз со бичаськыны но тырше ай. Эмезь, сутэр, льӧм… — ваньзэ пумозяз бича садысьтымы, жаль, пе, ук кельтыны. Сояз арын борыяны но ветлӥз ай гурезь бамалэ. "Пыдъёс ке но уг нуо ни, мылкыд нуэ", — шуэ со. Туэ боры ӧй вал, луысалыз ке, кинэ ке но машинаен келятыса но мынысалыз, дыр, бичаськыны.
Данъяськисько ик бон ӵужаеным! Сомында улоназ чидаса, али капчиен, шумпотыса мед улоз кадь потэ. Мон понна со уго дунне адями. Таӵе песянайёс но ӵужайёс кемагес ик вӧзамы мед улозы вылэм ай.