Таиз дышетскон ар Выль Утчан школае ветлӥсь нылпиос понна шӧдскымон воштӥськонъёс ваиз.
Кылсярысь, школаез выльдӥзы, хоккеен но шальыен шудон площадкаос, нылпиослы шудон инты лэсьтӥзы. Та школае тодон-валан люканы куинь гуртъёсысь 93 пиналъёс ветло. Соос понна татын 11 кружокъёс но секциос ужало.
Школа шуныт, чебер но югыт луиз
Гуртысь школаез тупатъян ужъёс быдэс ар кыстӥськизы. Выльдэм юртэз сиё-дано усьтон ужрад 8‑тӥ шуркынмонэ ортчиз.
Пиналъёс но анай-атайёс та нуналэз пӧсь табанез кадь витизы. Угось тупатъян ужъёс кемалы кыстӥськемен, нылпиос кык толэзь Выль Утчан нылпи садын 3 сменаен дышетскизы.
— Тазьы дышетскыны секытгес ке но вал, шумпотӥськомы дистанционной амалэ ӧм выже шуыса, нылпиос дышетӥсьёслэн "бурд" улазы ик кылизы, — вера 5‑тӥ классын дышетскисьлэн анаез Наталья Яковлева. — Пиналъёс выльдэм школалы туж шумпотӥзы, классъёс югытэсь, чылкытэсь, шунытэсь луэмын. Нылпиос отчы капчи мылкыдын вамышто.
— Школамы пуктэмын 1973‑тӥ арын, со вакытысен татын тыро-пыдо тупатъян ужъёс лэсьтэмын ӧй вал на. Сое выльдыны куке-соку коньдон висъяськоз шуыса льӧль малпанъёсын улӥмы, — мылкыдзэ усьтэ Выль Утчан школалэн директорез Михаил Шкляев. — 2006‑тӥ арысен кутскыса, школамес пичиен выльдыны выримы, куд-ог уродмем укноосыз пластиклы воштӥмы, котькуд ар кык укно ке но пуктыны тыршылӥмы. 2014‑тӥ арын школа пушкы туалетъёс лэсьтӥмы. Ар ортчыса спортивной залмес выльдӥмы, отысь выжзэ тупатӥмы, пластиклэсь выль укноос пуктылӥмы. Спортзалэз выльдон ужъёслы ёрос бюджетысь 1 миллион 200 сюрс манет висъязы. Озьы ик стадионысь бызьылон сюресмес асфальтэн шобыртӥмы, школалэсь липетсэ профнастиллы воштӥмы. 2020-тӥ арын "Энергосбережение" ӵектосъя лампаосты воштӥмы. Тужгес трос тупатъян ужъёс таиз арлы усизы. Быдэс школаысь пу выжъёсыз воштӥмы, соосыз железобетонной каримы но классъёсы линолеум вӧлдӥмы, коридоръёсы плитка тыримы. Вань укноосмес выльдӥмы. Та тупатъян ужъёслы коньдон сётӥз ёрослэн тӧроез Алексей Семенов. Ваньмыз-ӧвӧлэз тупатъян ужъёс 4 миллион 200 сюрс манет тыр усизы. Коньдон ёрос бюджетысь висъязы. Вань сюлмысьтымы бадӟым тау шуэме потэ ёрос администрацилы, кивалтӥсьёслы, дышетонъя ёрос управленилы, Выль Утчан школалэн коллективезлы, нылпи садын ужасьёслы, анай-атайёслы котыр ласянь бадӟым юрттэт сётэмзы понна. Соостэк нокыӵе ужмы ӧй пӧрмысал. Уго ӟеч мылкыдын но огъя кужымен лэсьтэм ужлэн гинэ емышез ӟеч луэ.
Хоккеен но шальыен шудон интыос
Выль Утчан школа вӧзы хоккеен шудон инты пуктӥзы. Татын пиналъёс азьвыл но пеймыт луытозь шудылӥзы. Кылсярысь, хоккейя ёрос ӵошатсконын кылем арын 3‑тӥ инты но басьтӥзы. Но интыез куронъёслы ӧз тупалля. Озьы ке но, нылпиослы кельшылӥз конькиосын нискыланы, тренировкаосы потаны.
Озьы ик пиналъёс понна шальыен шудыны площадка лэсьтэмын. Сое улонэ пыӵатон понна бадӟым кужымзэ понӥз физкультураен дышетӥсь Александр Павлович Алашеев. Ачиз ик спонсоръёс но шедьтӥз. Площадкаез асфальтэн шобыртыны юрттӥз ёрос администрация но.
Выль Утчан школаын дышетскись пиналъёслы тазалыксэс юнматыны но визь люканы вань луонлыкъёс кылдытэмын. Табере соослэн мылкыдзы но тыршонзы гинэ мед луоз.