Мемнан районышто ятыр тоштер уло. А.Ф. Конаков лӱмеш музей деч посна Шернур посёлкышто Йоча усталык пӧрт пелен тӱрлӧ экспонатлан поян музей пашам ышта. Тиде зданийыштак афганец-влакын шке тоштерышт уло. Тыгак район мучко кажне гаяк школышто тошто ӱзгар, фото, документ-шамычлан пєлемым ойырен, лӱмлӧ землякышт да илыме верышт нерген каласкалыше музейлам почыныт, южо вере эсогыл тӱвыра учрежденийла пеленат изирак тоштерым келыштареныт.

Кундемыштына тыгай вер кунар шукырак – тунар тӱвырана, йӱлана поян да кумда лиеш. Таче мый Шернур посёлкышто верланыше эше ик вер - Л.В. Веткинан тоштерже дене палдарынем. Тудым уста тӱрлызӧ шке илыме верже пелен келыштарен. Тидын нерген Лидия Васильевна тыге каласыш:

- Тошто ӱзгарым 1897 ийыште шочшо мӱндырковам, Кугӱдыр Федотовна Черепанова, деч погаш тӱҥалынам. Тудын шымакшыжым, тувыр-шовыржым, ончылшовычыжым, кум лукан шовычыжым, вургыштыржым поген конденам.