Таче кечын районыштына кок мардежвакш аралалт кодын. Кодын манашыжат огеш лий, вет нуным иктат арален огыл да кызытат огеш арале.

Ик тыгай мардежвакш Чылдемыр ден Орехово ялла коклаште верланен. Таче тудо эртен кайыше корныеҥ деч полышым йодшыла, кугорно воктене тулыкын койын шога. Жап эртыме дене эркын шаланыше вакшым ончен, южо чытамсыр, ура чонан айдемын кумылжат тодылалтеш, очыни. Но мом ыштет? Тиде – илыш. Кодшо курымышто яллашке тулым пуртымо дене тыгай вакш-шамыч йомаш тӱҥалыныт.

Ожнысо калык кызытсе семынак кинде деч посна илен кертын огыл. Таче ме ямде, тутло сукырым кевытыште налына гын, кугезына-влак шурным вакшыште йоҥыштен, киндым шке пыштеныт. Сандене мемнан кугезе коча ден кована-влак вӱдвакш але мардежвакш деч посна илен кертын огытыл.