Илыш саман ончыко кая, меат пеленже. Пытартыш жапыште марий тўвыра интернетыште кумдан вияҥын шога. Тидлан тўрлӧ йӧн кучылталтеш. Икте, кызытсе саман дене келшышын, тўрлӧ технологийым интернетыште марлашке кусара, весе онлайн конкурсым эртара.

Теве шукерте огыл Россий кўкшытан "Идалыкын этноблогерже" конкурс мучашлалтын. Блог тачысе кечын соцкыллаште кугу верым айла. Конкурсын тўҥ условийже – блогым вўдымаш. Конкурсын участникше-влаклан тўрлӧ йылме дене блогым вўдаш йӧн пуалтын. Мутлан, марий, мокша, татар, чуваш, руш йылмыла дене. Ты конкурсыш Российын тўрлӧ регионжо гыч блогер-влак ушненыт. Кеч тиде конкурс пўтынь элым авалтен, чонышто кугешнымаш, вет конкурсын шочмо верже – Марий Эл.