Чукарофнень семьяснон Порапа велеса содасазь сембе. Корхнихть колгаст аньцек шнама валса. Мирттне - рьвятне ляпе седихть, панжада ваймот, лезксса аф атказакшни ломатть.
Кудазорсь, Иван Семенович, ашезь карма вешендема паваз, теждя эряф ширеса. Шачема велесонза тонафнесь школаса, меле служась армияса. Трудонь биографиянц ушедозе Ковылкина ошень сельхозтехникаса, коса тонафнесь токарень тевьти. Тяда меле работась кафта кизот Порапань средняй школаса военрукокс.
Шарьхкоткшнезе, што тя тевсь аф сонне, сяс мес 1975 кизоста меки мрдась Сельхозтехникав. Тяса покодсь комось киза. Сон ульсь сембодонга цебярь токарькс аф анцек предприятияса, но и марнек районца. Аф весть колхозонь председательне ерасть васькафтомс Чукарофонь эсь хозяйствазост, надияфнесть тейнза квартира и цебярь зарплата. Но аф сятнень эзда ульсь Иван Семенович, штоба мимс прянц.
Лац покодеманкса И.С. Чукаров ульсь казьф "За преобразование Нечерноземья РСФСР" медальса, СССР-нь Верховнай Советонь почетнай дипломса.
Ульсь пинге, мзярда Иван Семенович работцесь токарьксь эсь шачема-касома велесонза "Парапинский" совхозса. А вете кизода меле тушендсь Ковылкина ошень Электромеханическяй заводу. Тусь аф ламонди, а таргавсь мянь кемголмува кизоти. Тяста и тусь пенсияс.
Кудса И.С.Чукаров кельгома мирде. Рвац, Мария Дмитриевна, аделамок Инсарскяй ветеринарнай училищать, сась работама Порапань совхозу ветеринаркс. Сяда тов покодсь животноводонь бригадиркс, жувата мельге якайкс. Полатне касфтсть колма итть. Ужяль, фкя идсна кулось пяк рана.
Трудонь кельги ломатнень эрь шисна ушеткшни пяк рана. Синь кирдихть жуватат, конат эрявихть андомс, мельгаст ваномс. Вов тяфта марняса, ладязь, фкя-фкянь кельгозь и шарьхкодезь эряйхть Чукарофне 45 киза.
- Кода можна 45 киза эрямс марса аф спорсезь, аф сялонкшнезь? - кизефтине Иван Семеновичень.
Трудонь ветеранц рахазевсь:
- Мес аф спорсезь, аф сялонкшнезь? Минь эряфсонк сембось уленди. Эряви аньцек эсь пингстонза лоткамс, шарьхкодемс эсь эльбятькснень, анамс прощения фкя-фкянь кядьста, а лиякс аш кода. Тя эряф, а эряфса аф уленди тяфта, што фкясь мувору, а обмоцесь аф.
Мирденц мархта согласиндакшни и Мария Дмитриевна. Синь вестевок аф нолясазь кядьснон. Ащихть сембоса примеркс оттненди Катк фалу тяфта и ули.