Воронино но Баяран гуртъёс буш сыло ни, Зилайын одӥг воргорон кылемын на.
- Гужем Зилайын куинь адями улэ, Глазовысь сад-бакча возисьёс лыктыло, - мачке муниципал кылдытэтлэн администрациысьтыз ӧнерчи Надежда Вершинина. - Нош толалтэ Владимир Сысоев огназ кыле. Ми сое "зарни пияш" шуиськом, одӥг мурт понна сюрес возиськомы. Ертемысен Зилаёзь 6 километр, эшшо корка дорозяз одӥг но ӝыны котыр луоз на – толбыт сюрессэ сузяськомы. Мумиз-айиз улонысь кошкизы, со кылиз вордскем гуртаз. Вал вордэ, валэн Пажмае ужаны но ветлэ. Гуртаз ошмес бызе, ву отысь басьтэ.
Тужгес но бадӟымъёсыз гуртъёс – Ертем но Зянкино. Уж ласянь шумпотымонэз ӧвӧл. "Ертем" поселениын уг ни ужа одӥг хозяйство но. Кемалась ӧвӧл быриз "Восход" колхоз, кивалтӥсез фермер кариськиз.
Зянкино гурт Киров улослы матынгес луэ, Ертемысен отчыозь дас кык иськем пала. Отын ужбергатӥсь магазин возе, али выль ФАП пукто (ужаны ветлэ Ертемысь фельдшер Герман Дорофеев), нош клубзы ворсаськемын. Озьы ик тунгон ошемын Ертемысь магазинлэн ӧсаз, уг ужало клуб но библиотека. Ужасьёссы пенсие кошкем бере, пе, воштыны нокинэн.
- Юкаменскозь 12 километр, каль ваньмызлэн машинаоссы вань ни, пуксё но мыно райцентре басьяськыны, - шуэ Надежда Эрнастовна. – Кулэ луись вуз куинь пол арняяз автолавка ворттэ. Клубмес усьтэ-пытса пол миськись, со юртэз эскере, чылкыт возе. Концертъёсын шумпотто Юкаменскысь ёрос культура юртысь артистъёс. Но калык юалляське, кызьы туэ выль арез пумиталомы шуыса. Юн шулдыр выль ар праздникез ортчытъяськом вал. Ӝытазе люкаськиськом, конкурсъёс радъяськом, тэтчаськом. Туэ но калыклэн шулдыръяськыны мылкыдзы вань.
Уж ӧвӧл бере, трос пудо вордо – парсь, скал, курег. Тани Ертемын 29 скал возё, дас кыкез Леонид Королёвлэн азбараз. Возьманэн уг ни курадӟо – та ужез электропастух быдэстэ. Скал вордӥсьёс коньдон люказы но кулэ тӥрлыкез басьтӥзы.
Муниципал кылдытэтъёс али уно проектъёсы пырисько, нош ертемъёс уг быгато, малы ке шуоно проектъёсты быдэстон понна, оглюкетсэ коньдон бюджет висъя, кылемзэ - спонсоръёс сёто но улӥсьёс люкало. Нокыӵе предприятиос, хозяйствоос ӧвӧл бере, юрттӥсьёс уг шедё, нош улӥсьёслы асьсэ киысьтызы гинэ коньдон поттыны туж трос усе.
- Сюресъёсмы юн уродэсь уд шуы, турскиськом возьыны. Калык улонзэ ӟечгес карыны тырше. Ертемын анай-атайёс, люкаськыса, асьсэос нылпиослы шудон инты лэсьтӥзы. Гужем трос пиналъёс бабушъёссы-дедушъёссы доры шутэтскыны лыкто ук. Юн сюлмаськытӥсь ужпум ми понна Муллиноысь бигершай. Шай дорозь сюресэз ӧвӧл, мур кырем пыр ветлоно луэ. Ватыку, юн курадӟо ни. Но сюрес лэсьтыны нокыӵе луонлыкъёс ӧвӧл, оло, проектъёс юрттысазлы ик.
Арысь аре кулэсме пиналъёслэн лыдзы но. Зянкиноысь куинь пинал но Ертемысь укмыс нылпиос Пышкетын дышетско, школа автобус нуллэ.
- Одӥг гинэ пичи пимы Ертемын вань на, Пышкетэ садике дедэз нуллэ, со но мумиз-айиз доры Иже кошкоз ни.
Гуртъёс калыктэк кылё, лудъёсты уг гыро, уг турнало, со понна губи, узы коть уробоен окты. Нош нюлэскын кузёясько гондыръёс.