Куасэн ӵошатсконъёсты сотэк син азе но пуктыны шуг. Уно аръёс ини Любовь Марсовна Куреггурт палъёслэсь спортын данзэс вылӥ возьыны юрттэ. Котькуд тол сезон со понна усьтэ выль стартъёс, выль вормонъёслы луонлыкъёс.

- Мылкыды уг пуксьы: нискыламе но, ӵошатскеме но потэ. Но куасъёс вылэ султыны берло дыре ӧжытгес кылдэ. Ужан вакыт уг но пӧрмы, озьы, шутэтскон нуналъёсы гинэ потасько ни. Туэ кӧня ке пол сяна ӧй на бызьылы, лымы но тыро-пыдо ӧвӧл тани. Собере, милям гуртамы куасэн нискыланэн бадӟымъёс уг гинэ тунсыкъясько. Пиналъёс бызьыло, но соос урамъёстӥ ветло. Ӟеч-ӟеч куас сюресмы луысал ке, юн умой, вылэм, - шуэ Любовь Марсовна.

Но со гуртын будэм-кыдам адями, мугъёс уг утча. Элькун гурт шудонъёсы но 2005-тӥ арысен одӥгзэ но кельтытэк кадь пыриське.

- Ёрос ӵошатсконъёсын мон, пыдын бызьылонын вожвылъяськыкум, вормисе потӥ, тӥни озьы гужем элькун гурт шудонъёсы ёрос командае пыртӥзы. Гурт шудонъёс соку Шарканын ортчизы. Вормисьёс пӧлы, валамон, ӧй шедьы, элькун радын спортысь мастеръёсын вожвылъяськоно луиськод, но юн яраз вал. Собере дасэз кужмоосыз пӧлы пырон но капчиен уг сётскы, но ми быгатылӥмы. Азьланяз монэ тол шудонъёсы но кутылыны кутскизы, соку ик полиатлонэ пуктӥзы. Озьы ветлэмысьтым нырысь аръёсы картэ куаретылӥз, "скалдэ бӧрсяд кут", - шуылӥз. Бӧрысь дышиз, ачиз келялляз ни: мылкыдыд вань ке, пе, - мын. Ӧтизы ке – таяз но мыно, - азьланьтэ веранзэ вераськисе.

Котькудъёсыз гурт шудонъёс, ӵошатсконъёс мылкыдзэ эшшо бурдъяллязы, кужым сётылӥзы.

- Люба Коротаева – милям воштонтэм спортсменмы. Полиатлонын арысь аре кужымзэ возьматэ, нош гираосты ӝутъянын, армспортын – нокинлы луэ ке, со султэ. Бадӟым тау шуэм потэ солы, - данъяськыса вера ёросысь спорт удысэн кивалтӥсь Александр Столбов.

Спортэн эшъяськемез адӟем карымон луиз кык пиоссы понна но. Куас сюрес вылэ ӵемысь ӵош потылӥзы. Но спортэ тросгес пичиез Дима пизы кыстӥськем. Аслаз но мылкыдыз бадӟым вал, мон но лӧпкытылӥ, шуэ Любовь Марсовна. Ас вакытаз та пиенызы Коротаев кузпалъёс семьяос пӧлын ёрос ӵошатсконъёсын вожвылъяськизы но кужмоосыз радэ потазы.

Семьяен куасэн нискыланъёс ӟеч сяме пыӵазы. "Россиысь куас сюресъёс" выллем ужрадъёсы Коротаевъёс табере ини быдэс командаен пото: Любовь Марсовна нуныкаосыныз, бордазы пиез но кенэз.

Кемалась ӧвӧл куасчимы кияз мукет бодыосты но эскерем ини – таосыз скандинав амалэн ветлыны. Анайлэн нуналызлы сыӵе кузьым пиез лэсьтэм. Коротайысь Куреггуртэ – ог ньыль иськем, озьы скандинав амалэн уж дорозяз ӝог гинэ, пе, вуисько.

Куас вылэ султыны яке бодыосын ветлыны нуналмысь уг ик пӧрмы, но вань на сыӵе ужзы, кудӥз улоназ – тол-а, гужем-а – воштонтэм.

- Дыр ӧвӧл ке но шуиськом, эшъёсыным ӝытлы быдэ юмшаны потаськомы. Та сяммы кемалась ини, ваньмылы сюлэммыя, – валэктэ Любовь Марсовна.

Иворъёсын люкиськыны, сюлмысь вераськыны, ужпумъёсты но сэрттыны-пертчыны вуо. Эшшо на ӟечез – котырысь инкуазьлы паймыны, чеберезлы синмаськыны, шуэ.