Тол вакытлэн кезьытъёсыз берло аръёсы туж ик уг кышкатъяло ни. Азьло, арлыдо адямиослэн верамзыя, толъёс кезьытэсь вал.
Пинал муртэ тол ӧз кышкатъя
Пинал дыръя ортчем дырез мукетгес дунъяське. Оло, дӥськут сыӵе шуныт ӧвӧлэн, толлэсь кезьытсэ ас вылад золгес шӧдоно луэ вал. Озьы-а тазьы-а, но пинал муртэ тол ӧз кышкатъя. Гурезьёсты ӵошкатыны быдэс гуртэн потылӥмы. Улонлэсь шумпотонзэ адӟыны быгатылӥмы. Нунал чибинь вамыш кузьда гинэ, соин шудонъёсмы кӧт веськатозь, пеймытозь кыстӥськылӥзы.
Тол лымызэ валёз
Выль ар азьын ӝегыт ужъёс гуртын быро. Каньыл шокчыны дыр шеде. Ӝоген, паськыт дӧдьы вылаз пуксьыса, зэмос тол лыктоз, лымызэ чурытъяськытэк валёз.
Нунал Спиридонысен (25-тӥ декабрь бере) ӟольгырилэн вамышез кузьда йылыны кутске, кезьытэз ватсаське, шунды тулыс пала учкылэ. Солэсь шунытсэ пудо-живот но шӧдэ. Гондыр мукет пала мугорзэ воштэ, кӧтурдэссэ берыктэ.
Толъя гужемез учко
Калык толсур бере Выль арез пыртыны дасяське. Та вакытэ гужемлэсь кыӵе луэмзэ толлэн сямъёсызъя валаны тыршо. Милемыз льӧмпу вайёсты вуэ пуктыны косылӥзы. Вожояськон азьын куарез потыны вуиз ке, ар нянё луоз. Выль арозь лымы кускозь люкаськиз ке – ӟечлы. Няньлы мускыт тырмыт шедёз, умой толъёз. Ар дэлето луоз. Тол кӧс но кезьыт возиське ке, гужемез но сыӵегес ик луоз: пӧсь но зортэм.
Гуртын улӥсьёс туж чаклаллязы инкуазьлэсь воштӥськон дыръёссэ.
Ар палэзё ке
Ми пинал дыръя, палэзьпуосын толбыт палэзь ӟускиос ошиськыса улылӥзы. Удалтэм емыш толбытлы окмылӥз тылобурдоослы. Кынмем палэзьлэсь пӧртэм пыжосъёс дасяллязы. Сиыны но ческыт – чырсэз сылмемын. Тросэн сиыны ӧз но лэзьылэ, кӧтады йӧтоз шуылӥзы. Палэзё аре сезьылэсь, етӥнлэсь удалтэмзэ витьылӥзы.
Дунне вырӟе
Ар куспын шунды кык пол берытске. Кезьыт пала ке, сӥзьылэз толалтэе выжтэ. Шуныт пала ке котырске – тулыс гужеме потэ. Ар пумитанзэ калык мытэ музъемез сайкатонэн, тулысэз данъянэн. Соин Вуж Выль арысен кутске вожояськон. Вань дунне, вань улэпъёс вырӟо, тулыслы дасясько. Сьӧд кужымъёс медам кузёяськыны быгатэ, соослы люкетоно, сюлэмъёссэс небӟытоно, лӥятоно.
Сьӧд кужымъёс медаз пыре
Выль ар азьын корка котырез мисько. Уката ик сэрегъёсты чылкытаны, чонари вотэсъёсты ӵушылыны косылӥзы. Отӥ сьӧд кужымъёс пырыны медаз дӥсьтэ, висён медаз вае. Пунэмен курем арбериосты одно ик берыктыны кулэ вал, вуныса медаз кыльы. Со пыр урод верам кылъёс зэмаса лыктыны быгатозы. Пунэмам уксёез тырыны, берыктыны быгатоно. Тусьты-пуньы, дӥськут, тулуп, вал кыткон арбериос тросэн кулэ луылон дыръя ог-огенызы воштӥськылӥзы. Одӥгзэ но соосты аслыд вунэтыса кельтыны уг яра, уд но быгаты. Соослэн ваньзылэн пусъёссы вал. Ми, пичиос, соя вань чыры-пыры арбериосмес но тодмаллямы. Сьӧлык аслыд юнме ӧвӧл басьтоно. Мунчо эстылӥзы, вань валес котырез воштылӥзы, выль ӵушкон гур азе ошылӥзы.
Кызьы Выль арез пумиталод
Котькудӥз Выль арез умоезлы оскыса вите, ӝӧк вылзэ сиёнэн-юонэн тыр каре. Кызьы Выль арез пумиталод, озьы ик ардэ ортчытод. Валамон, одӥг нуналэн быдэс арез уд басьты. Озьы ке но, ваньмылэн мед пӧрмоз, Выль арез ӟечлы осконэн пумитаны, ӟечсэ ӟечен берыктыны, улонмылэсь азинэссэ адӟыны, улыны визьмы мед тырмоз. Тазалыкмы, няньмы луиз ке, вань ужъёс пӧрмозы.