3-тӥ оштолэзе вань мылкыд карисьёс нош гожтӥзы удмурт диктант. Элькунамы та ужрад дасэтӥзэ ини ортчиз. Глазов итӥськиз ӧжыт бергес, но тросэз понна тунсыко ужен луиз.
Кинлы ке кельше нокытчы ветлытэк, ас дораз пукыса, диктантэз гожтыны. Сыӵе луонлык вань: котьку сямен, туэ но сое лыдӟизы "Мынам Удмуртие" меӵак эфирын но "Удмуртия" телеканал пыр. Кудаз гуртъёсын огазе люкаськыса гожто, кытын-отын нимысьтыз площадкаос ужало. Туэ оглом 50-лэсь ятыр сыӵе интыос усьтэмын вал.
Нош мыным сюлэмыя луиз диктантэз Глазовысь пединститутын гожтон. Кӧня арзэ ни, акцилэн нуналыз вуэ – отчы дыртӥсько. Тодӥсько ни: одно ик люкаськозы студентъёс. Соос историко-лингвистической факультетлэн удмурт группаяз дышетскисьёс. Лыкто удмурт кылэз дышетонъя курсъёсы ветлӥсьёс, музейын ужасьёс, ми, "иднакаръёс". Та уже празднике сямен лыктэ карысь шаерчи Альбина Баженова. Милям соин одӥг мылкыдмы – 100 балл люкаммы потэ. Кудмылэн меда азьло пӧрмоз?
Диктантлэн текстэз шуг ӧй вал, капчи гожтэмын. Сое дасяз кылбурчи но писатель Владимир Котков. Но вал сыӵе интыосыз, кытын шонер гожтон пумысен осконтэмгес луылӥз. Отчы могӟылэмзы сярысь берло студентъёс но веразы.
- Ваньзэ ужъёсты ми асьмеос ик татын эскеромы, кинлэн кӧня баллэз, лыдъяломы. Собере йылпумъянъёсты, нимысьтыз таблицае пыртыса, Иже келяломы, - валэктэ "Бадӟым удмурт диктант" акциез радъясьмы Ольга Никифорова.
Солэн туэ вань ни егит юрттӥсез, ГГПИ-лэн выпускницаез – Алёна Смольникова. Нылашлы но та ужрад тунсыко потэм. Диктант гожтонэ нырысьсэ пыриськыны мылкыд карем Богатыркаысь Николай Третьяков. Удмуртлык понна сюлэмы висе, аслам но мар ке ӟечсэ лэсьтэме потэ, шуэ. Жаляса верано, таяз учыре пӧламы малы ке ӧй вал Пониноысь Галина Иванова. Татчыозь одӥгзэ но диктантэз гожтытэк ӧз кельтылы кадь вал.
Кызьы иворто акциез радъясьёс, ужъёсты кутозы на 10-тӥ оштолэзёзь. Нош толэзьлэн пумаз огъя йылпумъянъёсты шараялозы. Кылем аре 100 балл люкамъёс куинь мурт гинэ вал, кӧня меда визьнодӥос туэ луозы?