Та корказы соос дас ар талэсь азьло пыриллям. Куинь пиоссы будӥзы бере, выль корка бадӟым ӝутӥллям. Но, кызьы ини луэ, пиналъёс будо – бубы юртысь кошко, ас сюрессэс лёго. Пичиезлы, Андрей пизылы, осконзы вань на: соиз али трактористэ Глазовын дышетске.
Людмила Валентиновна Шаркан палъёсысь вылэм. Кызьы бен улон сое Ляпиное вуттэм?
- Школа бере Можга веттехникуме дышетскыны пыри. Отын Ляпиноысь нылэн эшъяськимы, со сьӧры доразы кунояны ветлылӥ. Клуб но мар ӧй вал бере, егитъёс урамын гинэ люкаськылӥзы, ми но потамы. Собере практикае татчы лыктӥ, со дыре ведь "Юкаменский" совхоз ма быдӟа вал, ӟеч ужаз. Гуртысь пияшен куспамы тупамы но бызи. Можгаын дышетскыкумы классэн кивалтӥсьмы шуылӥз: "Котькинлы но бызе, трактористлы гинэ эн. Асьтэос пож дӥсен ветлоды, солэнэныз турсконо луоды на". Озьы ик луиз. Картэ Лёня Бабинцев тракторист вал, улыны татчы ик кариськимы. Нош со эше Глазов ёросэ, Гулёковое бызиз, - тодаз вае Людмила Валентиновна.
"Юкаменский" совхоз, йӧл поттэм сяна, откормочной чотын ужаз. Егит ветеринарлы бызьылонэз-турсконэз ӵукнаысен ӝытозь тырмылӥз.
- Трос бычокъёс вордӥмы, мар быдӟаесь луылӥзы – вить сю кило котыр! Глазовысь мясокомбинатэ нуылӥмы. Сюресъёсмы уродэсь, одӥг полаз ошпиосын машинамы кымаськиз. Кызьы но озьы берен фермае люкамы ик.
Совето Союз куашказ, совхозъёслэн но со выллем сюрессы луиз. Та секыт дыръёсы Людмила Валентиновна дояркае выжемын ни вал. Совхоз бере эштос кылдӥз, кивалтӥсьёсыз вошъяськылӥзы, ужась калык ӟеч улонэз ӧз адӟылы ни соку. Людмила Валентиновна артысь "Маяк" эштосэ кошкиз, выльысь ветеринар ужез борды кутскиз. Но куке Камки фермаосты "Родина" басьтӥз, соосты выльдӥз но ужез радъяз, берен отчы куриськиз. Камкие ветлыны но матынгес солы – 2 иськем пала. Озьы, берло аръёссэ кунян сюдэ, ӵукна 5 часлы дыртэ ни доразы. Куинь кузя 70-80 кунянэз утялто-будэто, отӥяз соосты откорме выжто.
Пудо-живот котыр берганэз ас доразы но тырмыт. Гуртъёсын али пудоен турскемзы уг ни поты, нош Бабинцевъёс котьку трос вордӥзы.
- Та коркамес пуктыны кыӵе выримы! Свиноматка гинэ кык-куинь вордӥмы, со сяна – скал, парсьёс, ошпиос. Пиналъёс, школае кошкемзылэсь азьло, ву флягаен ворттыса кельтылӥзы, - тодаз вае вераськисе. – Со понна али улонмы городын кадь луиз ни: туалет, ву коркан.
Берло дыре Людмила Валентиновна пенсие потон сярысь малпаськыса улэ ни. Леонид Евгеньевичлы бен ужанэз трос гинэ на, нош кузё кышнолы ас хозяйствояз но уж котьку шеде. Пудо уга али но ичи уг вордо, гужемлы бройлер, муларда басьтӥськомы на, шуэ. Зэм, одӥг арлы юрттӥсьсытэк кылёзы: пизэс гужем армие, пе, басьтозы. Сомындазэ чидалозы ни, нош музъем ужъёсты лэсьтыны-бергатыны пичи тракторзы вань. Кулэ прицепной техника но пумен-пумен люкаллям: мажес, плуг, окучник но мукетыз. Картофказэс но киын уг копало. Турын ке ворттоно, кузё мотоблоксэ поттэ, соин ик пу но, пе, ваиськомы.
Ляпино вылысь трос мукет огшоры пичи гуртъёслэсь улонзэс адӟыны луэ, но мар вите соосты азьланяз – котькудзылэн сюресэз аслаз. Умой, Ляпиноын егит семьяос но вань, пиналъёссы школае ветло, егитъёс ик фермер ужез нуо. Татын улон сюлэмызъя Бабинцевъёслэн Андрей пизылы но, гуртсэ карен воштэмез уг, пе, поты.