Гурт шудонъёслэн утись пуссы – Граша нимо вал, уга гракъёс котьку висъяськылӥзы валъёсты гажаменызы-вордэменызы. Озьы ик шудонъёслэн аспӧртэм тодметсы луиз "3" число: шудонъёс 30-тӥ инвожое усьтӥськозы но 3-тӥ пӧсьтолэзёзь кыстӥськозы. Со сяна – та шудонъёс 30-тӥзэ ортчозы, озьыен, юбилей арзы.

Гурт олимпиада кутскытозь кылиз на 40 нунал. Гракын стадионэз выльдо-тупатъяло, физкультурая но тазалыкез юнматонъя выль огъет пукто. Та интыос черкогуртлэсь туссэ трослы чебер карозы, озьы ик выльдӥськозы социальной объектъёс, сюресъёс но тротуаръёс. Гурт шудонъёсты ортчытон понна кузёослы уй-нунал ужано-пӧсяно луэ, но та бадӟым спортъя ужрад гурт улонэ уно ӟечсэ вайыса кельтэ.

Шудонъёслэн финалазы устооссэ командаосты быръён понна та дыре зонаосъя ӵошатсконъёс ортчо. Кылем арняе Глазовын вожвылъяськизы ни волейболэн шудӥсьёс. Полуфиналын воргоронъёс куспын тямыс команда нюръяськиз. Вормисе потӥзы юкаменскъёс (кылем арлэн чемпионъёсыз), соос быгатэмзэс возьматозы на Гракын. Стыковой турнирын вормизы ке, финалэ мынозы на балезиноос но. 22-тӥ мае соос нюръяськозы можгаосын но бодьяосын. Нош нылкышноослэн командаоссы пӧлын тужгес ӟеч шудӥзы балезиноос, озьыен, финалэ путёвказы – киязы ни. Глазов, Яр, Красногорск ёросъёсысь командаос финалэ потыны ӧз быгатэ.

Таяз шутэтскон нуналъёсы вожвылъяськозы теннисэн шудӥсьёс, соос Пичи Пургае люкаськозы. Нош шальыен шудӥсьёс кужымзэс мерталозы Сигаевоын, Сарапул ёросын. Жаляса верано, глазовъёслэн командазы – гурт шудонъёслэн трос пол чемпионзы – куашказ: Аркадий Сясегов улонысь кошкиз, Валентин Наговицынлэн но Леонид Горбушинлэн мылкыдзы пуксиз, лэся. Нош соосты кивоштӥсьёс уг шедё ни.

Майлэн пумаз вожвылъяськозы на футбол командаос, таосыз шудозы Красногорскысь выль стадионлэн бусыяз. Туж оскиськом, уйпалъёс но финалэ одно ик потозы шуыса. Мед удалтоз!