Кырӟатэк кызьы меда улод?
Пичи гурт Яр пала нуись бадӟым сюрес вылын сылэ бере, клубазы ми но ӵемысь пыраськом. Кивалтӥсез Надежда Лукина котьку шуныт пумиталоз, "Разноцвет" коллективзэс но вератэк-ушъятэк уз кельты. Тросэз нылкышноос та ансамбльын кылдэмез дырысен кырӟало. Алигес нош кылдӥз соосын адскыны.
Таяз учыре гуртысьтызы Луговой урамын пумиськимы. Ӵапак татын уло "Разноцветысь" ньылез артистъёссы. Валамон: та дыре соос ваньзы бакчаосазы.
- Туннэ уез мон тетраден изи, - шуэ Валентина Поздеева. – Тылпулэсь утиськон понна котькуд урамын дежурство радъяське, озьы коркась корка выже. Тетраде ваньзэ гожтыса кельтӥськом: кӧня часэ эскерыны потамын, кыӵе югдур.
Валентина Владимировналэн коркаез но, капкаез но пулэсь пужыосын чеберъяса лэсьтэмын. Ваньмыз со – картэзлэн кибервылыз. Но со улонысь кошкемын ни, кузё кышно коркаяз огназ кылемын, нош юртъерезлэсь азьвыл туссэ возьыны табере ачиз сюлмаське.
- Пока быгатско – вырисько, - азьланьтэ веранзэ. – Тани палисадникын ӝикыт кари, отын многолеткаосы будо. Астраосты но мукетсэ однолеткаосты азбарам мерттӥсько. Юрттыны нылы вуылэ.
Пудо-животтэк но улэмез уг поты: кеч вордэ, курег возе.
- Кылем гужем шораосты басьтылӥ. Яраз. Вож турын ӟеч сиё. Мынам соос воксё ручноесь будӥзы. Картошкаме урыса, окучить карыса мынӥсько но, соос но бӧрсям мыно. Шутэтскыны пуксисько – соос но дорам лыкто. Вандӥмы, сӥльыз трос – огезлэн кызё килолэсь ятыр люкаськиз. Ваизы ке, туэ но басьто, дыр.
Тулыс-гужем – гурт котырын ужан кысык вакыт, но "Разноцветысь" кышномуртъёс кемалы люкиськыса улыны уг быгато. Вормон нуналэ кырӟазы, али нош репетициосы люкасько: Тройчае, пе, Дизьминоын концерт луоз, солы дасясько. Со сяна, ӟеч сямъя нош сюрес вылэ потыны чаклало. Кылем аре коллективенызы Дэбес палъёсы, Байгурезе вуылӥллям, туэ Сарапулэ, Кам шур дуртӥ юмшаны дасясько.
- Куке-куке малпанъёсы но кылдыло ни, ансамбле ветлэмлэсь аналсконо шуыса. Но кызьы меда сотэк улод? Кырӟаськод ке, висёндэ но уд кылӥськы ук. Баянистмы Лариса Кырова туж капчи мылкыдо кышномурт, со пыр милемыз серекъятэ, мылкыдмес лӧпкытэ. Собере берпуметӥ иворъёсты но тодэм потэ, коркан пукыса, кин тыныд вералоз? – мылкыдъёссэ усьтэ Валентина Владимировна.
Яратоно песянайёс
Гуртысь артист луэм сяна, "Разноцветысь" кырӟась кышномуртъёс – усто песянайёс.Ӵапак толон, 26-тӥ куартолэзе, шаерамы пусйизы Песянайлэсь нуналзэ.
Тани Августа Алексеевна Ивановалэн бакча тыраз калыкез: картошка мерттыны пиналъёсыз, нуныкаосыз вуиллям. Сяська росодаез но дась ни: цинния, годеция, петуния, георгин будэтэ. Кин мае азбараз но, палисадниказ но мерттозы. Асьсэос кузпалыныз ньыль нылпи вордӥзы, табере куать нуныкаоссы шумпотто-юртто ни. Вить пиос пӧлын одӥг гинэ внучказы, со самой пичиез.
- Пиналъёслы шуыса, живот вордыны выриськом на. Ошпи, парсь, курег возиськом. Но соос юрттытэк ум ни быгатӥське. Пумес тани ваньзэ 9-тӥ классын дышетскись внуке пильылӥз, - вера Августа Алексеевна.
Котьма ужез тыро-пыдо но сюлмысь быдэстон ласянь пиналъёсыз но, внукъёсыз понна но со ачиз адӟем карымон. Пенсие потытозяз ик Мосейгуртысь почтаен кивалтӥз, али но тэк улонэз уг тоды.
Нуныкаосын тужгес узырез – Нина Ившина. Байдалино школалэн азьвыл директорез, котыр ласянь синмаськымон адями, Нина Александровна - вить нылпилэн анайзы, нош табере на – 10 нуныкаослэн яратоно песянайзы. Соос шумпотон кузьмало, улыны кужым сёто. Соин но, дыр, сюлэмыз котьку усьтэмын ӟечезлы, артысь адямиослы юрттонлы.
Нылпиос пӧлын ортчемын улонэз Надежда Бабинцевалэн но. Уно аръёс со кивалтӥз Мосейгуртысь нылпи садэн. "Разноцветэн" эшъяськиз ансамбль кылдэм дырысен. Пенсие потыса, пиосызлы ужбергатонын зэмос юрттӥсь но визь-кенеш сётӥсь луиз. Нуныкаосыз кунояны лыкто ке – сюлэмыз кырӟа.
- Та кышномуртъёс - бад- ӟым клад, озьы вераны луэ коллективысьтымы котькудӥз сярысь но, - пусъе ансамбльлэн кивалтӥсез Надежда Лукина но дуно эшъёсызлы сюлмысьтыз сӥзёнъёссэ вера. Ваньзылы – юн тазалык, умой мылкыд но ӟечезлы оскон.
Туспуктэмъёс "Разноцвет" ансамбльлэн архивысьтыз