Куноосты культурая юртысь коллектив пумитаз, калыкез ёросысь артистъёс, Воткинскысь "Забава" ансамбль но мукетъёсыз шулдыртӥзы.
Муниципал кылдытэтъёсысь делегациос чебер азбаръёссэс возьматӥзы - кибашлыослэн ужъёсынызы, пыжосъёсын, кырӟанъёсын паймытӥзы. Пӧртэм площадкаос ужазы, соос пиналъёслы но, мӧйыослы но чакламын вал. "Ческыт" конкурсын песянайёс сиён-юон пӧранъя быгатонлыкъёссэс возьматӥзы, "Батыр-шоу"-ын батыръёс кужымзэс мертазы. Тымет дурын вожвылъяськон радъязы тылпулэсь утисьёс.
Пӧжыысь "Истоки" музейысь ӧнерчиос "Армие келян" йылолэн тодматӥзы. Сергеевкаысь пияшлы Артём Мартыновлы дас тямыс арес, со службалы дасяське. Армие келян удмурт йылолъёс али вуно ни, шуэ, ваньмыз тунсыко вылэм.
Одӥг адями но праздникысь ӝук сиытэк ӧз кошкы. Ошпи сӥлен йыды кеньырен но кӧжыен ӝукез пӧрасьёс дас пуртыын пӧзьтӥллям. Ольга Ворончихина трос аръёс ӵоже Герберысь калыкез сюдэ, пӧрам сиёнэз котьку но ческыт пӧрме.
Глазов ёрослэн тӧроез Вячеслав Сабреков тау кариз музъем бордын ужасьёслы, "Парзи" возёслэн коллективезлы, кузёезлы Анвар Рахманкуловлы но ваньмызлы ужрадэз радъясьёслы, калыкез ӟеч куноятэмзы понна.
Герберын, котьку сямен, ю-нянь будэтӥсьёсты данъязы. Тулыс бусы ужъёслы йылпумъянъёсъя ёрос вожвылъяськонын нырысетӥ инты басьтӥз "Чура" возёс (кивалтӥсез Елена Егорова, валтӥсь агрономез Роман Ушаков); кыкетӥ интыын – "Коммунар" СПК-лэн коллективез (кивалтӥсез Юрий Дягелев, валтӥсь агрономез Татьяна Дьяконова).
Техниказэс дасянъя вормизы "Октябрьский" огазеяськон (директорез Александр Баженов, валтӥсь инженерез Иван Максимов); "Коммунар" СПК (валтӥсь инженерез Василий Ларионов); "Чура" огазеяськон (валтӥсь инженерез Алексей Муратшин).
Устоосыз ужасьёс пусъемын вал таукаронъёсын, данъян грамотаосын. Гурт удысын уно аръёс ӵоже сюлмо тыршемзы понна Росси Федерациысь Гурт удысъя министерстволэн таукаронэныз данъямын "Коммунар" СПК-ысь пудо вордон удысын ужась Людмила Анатольевна Абашева, "Кожильский" СПК-ысь водитель Пётр Николаевич Попов.
Пётр Николаевичлэн хозяйствоын ужан сюресэз школа бере, 1979-тӥ арын кутскиз. Кык арлы армие гинэ кошкылӥз, нош ик вордскем гуртаз бертӥз, семья кылдытӥз. Ас ужзэ умой тодэ, та аръёс ӵоже кыӵе гинэ машинаосын ужаны ӧз кылды, кӧня ю тысь, турын ворттэмын – лыдъянтэм.
Нош шутэтскыны дыр ӧвӧл. Хозяйствоосын пудо сиён люканы кутскизы ни. Силос гу пытсало "Октябрьский", "Чиргино", "Коммунар", сенаж дасяло "Чура", "Кожильский", "Северный" возёсъёс.