"Кожильский" совхоз кылдытэмын вал 1966-тӥ арын, Карасевоысь, Верх-Кузьмаысь но Кожильысь колхозъёсты огазеяса. Совхоз бырем бере, ужзэ СПК чотын азьланьтӥз, нимзэ но утьыны быгатӥз. Пудо вордон удысын ӟеч коллектив тырше.

Ӧнерчиос пӧлысь тужгес кема ужа ни зоотехник-селекционер Ольга Тебенькова. Кызьы Кировысь сельхозинститутэз йылпумъяз, ужан удыссэ вордскем гуртаз мытӥз, озьы та эштосын со 30 арлэсь ятыр ни. Кема аръёс ог-огзылы юрттыса но мылкыдъёссэс валаса артысь тыршо валтӥсь зоотехникен Ольга Агафоноваен.

Гидъёссы эштосын ӧжыт ӧвӧл – даслэсь ятыр, куиняз – кысконо скалъёс. Луд вылэ, вож турын вылэ соосты кемалась уг ни поттыло.

- Азьвыл гужемъёсы ньыль-вить лагерь усьтылӥм. Ваньзэ радъяно, дояркаосты нуоно-ваёно, пастухъёс шедьтоно – трос сюлмаськонэз-шугъяськонэз вал. Табере скалъёсты загонэ гинэ лэзьылӥськом на. Сиён асьмеос дасяськом, со понна нимысьтыз миксермы вань. Али тани силосэз зелёнкаен сураса сётӥськом, - валэктэ Ольга Рудольфовна.

Кысконо скалъёслэсь лыдзэс, мукет хозяйствоосын ӵошатыса, трос но ичи но уд шуы. Но йӧлъя йылпумъянъёссы кожильёслэн ушъямонэсь ӧвӧл ай. Котьма ке но, туннэ понна котькуд сюролэсь суткаяз 18 литр йӧл кыско – кылем арынлэсь со тросгес. 2020-тӥ арын котькуд скаллэсь 5259 кило басьтӥзы ке, туэ та лыдпусэз ортчомы, шуо ӧнерчиос.

Татьяна Ельцова, Надежда Золотарёва, Раиса Поздеева 6 сюрслэсь ятыр кыскизы ни вал кылем аре ик, со котыре ик вуттӥз Елена Фёдорова. Ваньзы пудо вордӥсьёс юбилей арзэс азинлыко ужъёсын пусйыны дасясько. Кызьы вераз кивалтӥсьсы Надежда Поздеева, праздник но устооссэ сӥлы карон сӥзьыл радъялозы, Гурт удысын ужасьёслэсь ӧнер нуналзэс пусъёнэн валче.

Кадръёслы кулэяськон ужпум хозяйствоын пумен лэчыт султэ. Зоотехникъёс Татьяна Главатских но Ольга Агафонова юн сюлмасько: тросэз ужасьёссы – пенсионеръёс, кинъёсын воштыны? Асьсэлэн но соослэн шутэтскыны дырзы вуэ ни, пе. Ярам, пенсие но потыса, ужзылэсь тросэз уг ӵыдо. Тани Любовь Ельцова ужатозяз фермаын тыршиз: кема аръёс кивалтӥз, ветылъёсын но ужаз. Пенсие кошкиз но, гуртаз пукыны ӧз чида – берен потӥз. Табере сюлмыныз бурмиз пичи кунянъёс борды.

Вератэк уд кельты Возмищев сузэръёсты. Мумиз сямен ик, Татьяна кунян гидын тырше. Фермае сюресэз солэн пинал дырысеныз лёгемын, ужамезлы но 30 ар ни луэ.

- Вож кунянъёс вить-куать нунал родильнойын уло, собере ми доры пото ини. Ог сю витьтон котыр кунянъёсмы луыло, - вера со.

Школа бере ик фермае лыктӥз Ольга сузэрез но, со скалъёсты кыске. Ужась династиос котькуд дыръёсы вал данын. Кожильын та ӟеч сям утиське на.