Пӧсь но кӧс куазь сэрен туэ ю-нянь вазьгес вуиз, комбайнъёс толйись ӟегез, толйись но валэс чабеез, йыдыез но рапсэз кидыслы окто-калто ни. Огъя вераса, таяз арын возёсъёслы 32 сюрс 200 гектар вылысь юосты кутсаны кулэ.
Комбайнъёс Алнаш, Вотка, Грак, Дэри, Ува, Кияса, Пичи Пурга, Можга, Сарапул но мукет ёросъёсын гурето ни. 19-тӥ пӧсьтолэзьлы нырысетӥ 3 сюрс 200 гектар утялтэмын, со чакламлэсь 2 процентэз. Кутсам музъем вылысь 2 сюрс 600 тонна ю тысь люкаськиз, одӥг гектарысь шорлыдын 13 центнер.
Та дыре тужгес ӟеч урожай Камбарка ёросын басьто – гектарысь 26 центнер, Алнаш ёросын – 20,8 центнер.
Якшур-Бодья бере кыле
Кӧс куазен ик куд-ог хозяйствоос тырмыт пудо сиён ӧз на дасялэ. Шуом, Яр ёросын люкаськиз ни 8155 тонна сенаж (102 % луэ), 20684 тонна силос (55% чакламлэсь), 3330 тонна кӧс турын (66% кулэезлэсь). Котькуд пудо йырлы шорлыдын 14,7 центнер сяна люкамын ӧвӧл. Толэз умой потон понна 25 центнер кулэ.
Гурт удысъя министерстволэн ивортэмезъя, 16 ёросъёс пудо сиён дасянэн шуге-леке шедемын. Вань ёросъёс пӧлысь туэ тужгес секыт йӧтэ як-бодьяослы.
Но гурт удысын тыршисьёс киоссэс уг лэзё – толлы дасяськыны дыр вань на.
Туспуктэмез ООО "Октябрьскийлэн" "Вконтакте" огинысьтыз.