- Ваньмыз сямен ик, ми но гужем шутэтскиськом. Творческой сезон усьтӥськиз ке, нош ик мылысь-кыдысь ужаны кутском. Репетициос кык пол арняяз ортчо – вторнике но четверге.

- Кӧня адями пыриське коллективады?

- Ог дасо мурт. Коллективлэн инъетэз луо тужгес но кема ветлӥсьёсыз Василий Егорович Богданов, Нэля Анатольевна Чиркова, Ирина Валерьяновна Баженова. Кызьы вера Василий Егорович, егитъёсын, пе, мон ачим егитомисько.

Ансамбль выль куараосын узырме. Шумпотӥськомы, лыктэм муртъёс вань творческой быгатонлыкъёссэс возьматыны тыршо ке. Сыӵе адямиослы туж кулэяськиськомы.

- Учкисьлэн сюлэмаз сюрес – со репертуар. Кызьы кулэ кырӟанъёсты бырйиськоды?

- Репертуарамы ялан выль кырӟанъёс пыртыны тыршиськомы. Концертъёсы пӧртэм арлыдо адямиос ветло, котькудӥз маке но тунсыкозэ мед шедьтоз. Соин ик репертуармес пӧртэм карыны турскиськомы. Арлыдоослы сюлэмзыя калык кырӟанъёс. Йылолъёсты возьматыкумы, егит дыръёссэс тодазы ваё, бӧрдо но.

Калык сямъёсты, йылолъёсты, кырӟа- нъёсты люкаса гуртъёстӥ ветлӥськомы, пересьёсын пумиськылӥськомы. Тани туэ Кляпово гуртэ потамы, Валентина Сергеевна Кунаеваез гожтӥмы. Мынам арлыдоосын азьло гожъямъёсы но вань на. Жаляса верано, пересьёс улонысь кошко, сьӧразы нуо люкам тодон-валанъёссэс но.

- Костюм сярысь кин малпаське?

- Асьмеос ик. Али выль дэремъёс Валентина Пряженникова вуриз. Сандыкъёсысьтымы но поттылӥськомы.

- Азьланезлы кыӵе малпанъёсын улӥськоды?

- Котьку йырамы малпан, кызьы калыкез тунсыкъяськытоно. Дырызлэсь вазь вань секретъёсмес уг усьты, но выль сезон выль проектъёс ваёз. Юн потэ Юрий Князевен мар ке лэсьтэммы. Соин вераськимы ни.

Тау шуэме потэ коллективе ветлӥсь эшъёсылы, котькыӵе кутсконын но огкыл шедьтӥськомы. Куддыръя малпанъёс уг быдэсмо, но соос оскон пыӵато, одно ик пӧрмоз шуыса. Ансамбле лыкто кырӟаны яратӥсь, сюлмо адямиос.

Умой кусыпъёсмы юнматэмын карысь ужъюртъёсын - В. Г. Короленко нимо библиотекаен, нылпи библиотекаен, покчи техникъёслэн станциенызы, 15 номеро школаен, шаертодонъя музеен.

Шумпотто, малпаськыто, синвуаськыто

"Чупчи гуръёс" ансамбль1997-тӥ арын Лидия Михайловаен кылдытэмын вал. Коллектив ас азяз пуктӥз уйпал удмуртъёслэсь вуныны кутскем яркытэсь сям-йылолъёссэс улӟытыны, выль эктон-кырӟанъёсын калыкез тодматыны.

1999-тӥ арын "Чупчи гуръёслы" калык ансамбль ним сётӥзы. Туэ тулыс коллектив сое нош юнматӥз. Артистъёс Глазов ёросын улӥсьёслэсь "Шорт миськон" йылолзэс возьматӥзы. Калык нимез соос данэн нулло: трос пол луылэмын ни элькун, улоскуспо но калыккуспо фестиваль-конкурсъёслэн лауреатъёссы.

Кылем аре но "Чупчи гуръёс" пыриськизы пӧртэм ужрадъёсы, фестивальёсы. Нош ик юнматӥзы аслэсьтыз вылӥ устолыко луэмзэс - пусъемын дипломъёсын.

Ортчем аръёс ӵоже кӧня концертъёс сётэмын, кӧня кырӟанъёс быдэстэмын, сям-йылолъёс возьматэмын! Но учкисьёс уг акыльто – задор эктонъёсынызы, сюлэме пыӵамон кырӟанъёсынызы калыкез шумпотто, малпаськыто, синвуаськыто. Кыӵе гинэ концертэ уг пырисько, котькуд быдэстэм номерзы кужмо кичабонъёсын дунъяське.

Марина Наговицына:

- Туж яратӥсько ансамбльмес, мылысь-кыдысь пыриськисько. Бадӟым семья кадь ми отын. Кырӟанъёсмы но эктонъёсмы но, задоресь.

Коллективамы пӧртэм аресъем адямиос, арлыдоосыз но вань, соос милям туж йӧноесь! Пересь шуыны соосты кыл ик уг пыры - мылкыдын но, пыдын но капчиесь.

Ольга Владимировнамы но туж тунсыко адями, ялан мар ке но выльзэ малпа, утча. Со туж вала милемыз, чида, гажа, ми но соин ик сюлмысьтымы турскиськом, ветлӥськом ансамбле, куддыръя уж но, семья но бере кыле ке но. Ужрадъес куддыр бӧрсьысь бӧрсьы луыло, жадиськом но. Но кема шутэтскиськом ке репетициостэк, тани гужем, шуом, мӧзмыны кутскиськом ни кырӟантэк, эктонтэк,ог-огмытэк. Шумпотӥсько, улонам таӵе творческой коллектив вань шуыса.

Ансамблямы мар ке но выльзэ пыртэм потэ, шуом, кыӵе ке инструмент мед кылӥськысал на. Мон дышетскисько варганэн шудыны. Малпасько, варган туж тупалоз репертуарамы, народной инструмент ук со!

Василий Богданов:

- Нырысь ик верам потэ, "Чупчи гуръёсын" туж чебересь нылъёс – вылтусын но, лулпушен но. Калык кырӟан сюлэмам пинал дырысеным пыӵамын. Анае кырӟалляз. Ӝытазе пуксёз вал, марке но каре - кышъяське, керттӥське но кырӟа. Азьло "Иднакар" ансамбле ветлӥ, собере "Чупчи гуръёсы". Со фольклорной бере, репертуараз калык мадиськонъёс, кырӟанъёс пыртэмын, соос зэмос удмуртлыкез возьмато. Троссэ анае быдэсъялляз, соин но соос мыным матынэсь. Туннэ нуналэз азьлоеныз герӟало кадь.

Ӵем концертъёсын потаськомы, пӧртэм ужрадъёсы пыриськиськомы, мукет улосъёсы вуылӥськомы. Мон юри мынысал меда Нижний Новгородэ яке Сыктывкаре? Нош "Чупчи гуръёсын" вуылӥ.

Мон Симашурын будэмын, собере Дондыкарын улӥмы. Выльысь Симашуре улыны лыктӥм, нош гуртын калык воштӥськемын ни, гыдыр-гыдыр нокинэн но уд вераськы. А коллективын ми эшъёс, туж шунытэсь кусыпъёсмы. Концертъёсын потӥськомы ке, кӧня пумиськонъёс луо. Нош мон яратӥсько калыкен вераськыны, сотэк улыны уг луы.