Чылкак удмурт сям-йылолъёсын милемыз витё вылэм: корка ӝикыт утялтэмын, укно вылын пӧртэм пумо сяськаос синэз шумпотто, ӝӧквыл тыр сиён-юон дасямын.

Кузё кышно но солэн сузэрез милемыз пумитало ини гармошкаен шудыса но жин-жин удмурт кырӟан кырӟаса!

Александра Николаевнаез улосын тодӥсьтэмез ӧвӧл, дыр, угось со кема аръёс ужамын "Октябрьский" совхозын. Али но тэк улонэз, коркан пуконэз уг тоды - гуртысь ветеранъёслэн азьветлӥсьсы луэ.

Нош солэн куноез, табере ини милям но яратоно тодмомы - Галина Владимировна Иванова. Со улэ Кез ёросысь Дырпа гуртын. Вань улонзэ сӥзиз гурт улонлы, гурт ужлы, нош сюлмыз буйгаз аслаз кылдытэм кырӟанъёсыныз, кудъёссэ ас калыкезлы чик жалятэк кузьма. Милемыз но пумитаз сюлмысь потэм кырӟанъёсыныз. Нош кыӵе жингрес куараез, кылзэмъя кылзэм потэ! Туж гажаса витё сое Кез ёросысь гуртын улӥсьёс. Удмурт радио кылзӥсьёс но куаразэ тодмало, угось "Светӥос дорын куноын" передачаез кылдытӥсьёс ӵемысь ӧтчалляло радио пыр вераськыны, калыкез выль кылбуръёсыныз тодматыны но крезьгуръёсыныз шулдыртыны.

Ачиз Галина Владимировна кепырасагес вера, нотной грамотаез но уг тодӥськы, кылбуръёсме но волятоно вылэм шуыса. Ӧйтӧд, уг тодӥськы, кулэ меда профессионалъёслы вазиськыны. Оло, лыдӟисьёс асьсэос дунъялозы гажась но яратӥсь сюлэмысь потэм чуръёсты?! Со понна ӵектӥсько ватос тетрадьысьтыз кыксэ кылбуръёссэ. Соос Кез палъёсын туж тодмоесь ини, асьме палан но мед чузъяськозы.

Галина Владимировналы бадӟым тау шуэм потэ удмурт культураез азинтэмезлы! Мылкыдыз медаз ноку но кысы, кылбуръёсыз калыкмылэн синпельметаз мед кылёзы.

Ӵукна шунды ӝужаку

Та льӧмпулэн сяськаез

Лöпкытэ ук мылкыдэз.

Та гужем югыт ӝытэ

Пумитай яратонме (бен).

Шыпыртӥд ай тон пелям,

Туриос лобӟо шуыса.

Монэ эрекчад, алдад,

Ымдуръёсме веръялляд (озьы).

Ӵукна шунды ӝужаку,

Учкисько ни мон шорад.

- Тон кылдэмын ук мыным, -

Мон тыныд озь вералляй (бен),

Ӟег бусые поталляй

Лыз сяськазэ бичаны.

Тынад синъёсад учки –

Лыз сяськалэсь басьтэмын (озьы).

Ӟег нянез мон сиисько,

Туж яратüсько тонэ.

Ӝӧк вылын ӟег нянь ке вань,

Тон озьы ик но мынам (бен).

Витисько ук мон тонэ,

Мӧзмисько ук мон тонтэк.

Сюлэмы возьма тонэ,

Мусо, яратон эше,

Мусо, мусо, яратон эше (озьы).

Эх, гуртэ мынам!

Нокытын таӵе ӧвӧл гуртъёс,

Дырпа гуртэ кадь чеберез.

Туганме шедьтӥ татысь, лэся.

Кошкыны ӧй ӵыды мон.

Припев:

Эх, гуртэ, мынам гуртэ,

Вольыт кызьпу кадь сылэ.

Урам кузя васькисько,

Дырпа шуре вуисько.

Йыр поромыса учке гуртме,

Кыӵе будо вож садъёс.

Корка азьын сяськаос будо,

Ворекъяса кадь пишто.

Припев.

Дырпа гуртам лыктэ вал али,

Шаньга, перепеч пыжом.

Кизертэм но лэсьтомы тӥлед,

Таза луыса кошкоды.

Припев.

Кытчы гинэ ӧй ветлылы мон,

Сюлмы кыске Дырпаям.

Учкисько музъем шоры ке мон,

Адӟисько гольык пыдын ветлэм дырме.

Припев.