шуэ Яр ёросысь Льнозаводын улӥсь Александра Булдакова. Дима пиеныз соос скал, парсь, курег, кролик вордо. Гуртазы кык хозяйствоын гинэ бӧксӥсьёсты возё на. Туж ӧжытэз парсь вордо.
- Миым одӥг скалмы вал, туэ кык, вуоно аре но кык вордомы, - шуэ Александра Михайловна. - Бакча сьӧрын думыса возиськомы ни. Юоннизы дотово ӟеч – бобръёс ӵупизы. Чупчие ум лэзиське, миллион манет, пе, штраф тыроно луоз. Парсь пиятылӥм, но порозмы ляб ни, воштоно. Нош вить аръёс талэсь азьло Булдаковъёс кроликъёсты басьтӥзы.
- Ижысь ваи кык мумы, одӥг айы, соос тямыстонозь вуизы. Туэ ичигес каро ни. Юн трос сисько, котьмар сёт, вичак сиёзы. Тросгес сезьы но турын кошке. Кылем арын сезьы ачимес кизьылӥм, туэ 10 мешок басьтӥ, толлы окмыны кулэ.
- Сомында животлы кӧня турын дасяськоды?
- 120 рулон котыр, - шуэ Дмитрий. – Киын ум турскиське, тракторе вань – МТЗ-80, прессэ, косилкае. Картошка но киын ум но мерттӥське, ум но копаське - октӥськомы гинэ.
- Скал аппаратэн кыскиськомы, - ватса мумиз. - Кыедзэ бен киын сузяно.
- Иське, йӧл но, сӥль но, курегпуз но асьтэлэн?
- Куддыръя курег сӥль магазинысь басьтӥськомы, пыр живот уд вандӥськы ук.
Дмитрий Булдаков крестьян-фермер хозяйство кылдытыны турске вал, вить аръёс котыр ужбергатонэн выриз. Басьтӥз техника, ошпи, но ужез ӧз пӧрмы. Музъем пайёсты ас вылаз оформить каронэн шуг-секытъёс кылдӥзы. Али мумизлэсь но ӵыжы-выжыезлэсь пайзэс – 8 гектар котыр - вылаз гожтӥз.
Александра Михайловна шуэ, азьло кадь пудо-живот вордыны секыт ӧвӧл ни. "Пудотэк нунал кема ортчоз. Кызьы ке но улоно, мар ке но сиёно", - шуэ со.
Яр ёросысь Верх-Чураын быдэсмем кышномурт вань улонзэ гуртын улӥз, гурт удыслы сӥзиз. "Зюинское" совхозын фермаен кивалтӥз, ветеринар луыса тыршиз. 1987-тӥ арын Льнозаводысь маслозаводэ выжиз, собере льнозаводын но ужаз, отын сократить каризы, 53 аресысен пенсие кошкиз.
- Ваньмон дырды луылэ-а?
- Ветлӥсько вал ансамбле, но каль ковид, репетициосмы уг луыло, гуртын но уж окме.