"Урак" поселениын, кытчы пичи Тат. Парзи гурт но пыре, чылкыт ву сётон гумыосты тупатъянэн-выльдонэн герӟаськем ӵектосэн ужамзы вал ни. Котькытын сямен ик, гуртъёсын ву гумыос вужмемын но пасяськылэмысь ӧз дугдылэ. Озьы вал Коӵышын но, соин инициативной бюджетированиея элькун конкурс ялэм аре ик гуртоос водопроводэз тыро-пыдо тупатъян понна куаразэс сётӥзы. Сюлмаськонъёс, вожпотонъёс со ужен трос гинэ вал, пусъёмы на: та поселение ёросын водопроводэз тупатъян ӵектосэн одӥг гинэ вал.

Котьма ке но, татпарзиос нокыӵе мукет ужпум борды ӧз басьтӥське, ву гумыосты тупатъянэз тужгес кулэгес каризы.

Ӵектослэн огъя дуныз 1 миллион манет котыр луиз. Кӧня кулэ вал – гуртоос ас кисыосысьтызы но поттӥзы. Макем бадӟым шумпотон со луиз, куке тодӥзы, ӵектоссы ӟечен лыдъямын но уксёен юрттэт басьтоз шуыса. Озьы, элькун ласянь та ужзылы ог 680 сюрс манет висъямын вал.

- Лэсьтӥськон ужъёсты карысь "Проект" огазеяськон радъяз, кивалтӥсез Пётр Юрьевич Петренко. Сентябре кутскизы ке, нокыӵе шугъяськонъёс, вутэк пукон дыръёс ӧй вал. Одӥг нунал гинэ ву кӧнялы ке бырылӥз, ку выль гумыосты вуженыз огазеязы. Тросэз ведь подрядчик бордысь потэ, "Проект" ужзэ валаса но ӟеч быдэстӥз. Но та дырлы объектын приёмка ӧй на вал, ӝоген луоз, - валэктэ поселенилэн тӧроез Татьяна Бабинцева.

Выльдон-тупатъян ужъёс вакчи дыр куспын быдэстэмын. Гуртоослэн табере сюлэмъёсазы каньыл: лэчыт ужпумез валче кариськыса палэнтыны быгатӥзы, огъя луэмзылэсь кужымзэ шӧдӥзы.

- Вуэн шугъяськонъёс пока ӧвӧл. Ву кранысь жаль-жаль ваське – таӵезэ берло кык аръёсы ӧй ни адӟылы вал. Ми, Новая урамын улӥсьёс, туж шумпотӥськомы, - мылкыдъёссэ усьтэ Фарида Касимова.

Ми но шумпотӥськомы, гуртоослэн эшшо одӥгез бадӟым малпанзы улонэ пыӵаз шуыса. Тат. Парзиын мыло-кыдо калык улэ, оскиськом, та ужен соос уз буйгатске, одно ик мукетызлы ӝутскозы.

Нош инициативной бюджетированиея элькун конкурсэ вуоно аре пыриськон пумысен тӧролэн вань ни чакланъёсыз:

- Отогуртъёсты кӧня ке ӝутоно вал, соос но мед ӵектосъёсын ужалозы. Мар асьсэос шуозы, озьы ик лэсьтомы.