Пудо эмъясь – со улытозьлы

Вордскемын но будэмын со Пӧжылэсь ӧжыт палэнын - пичи Матеяг гуртын. Пинал дыръяз отын куать корка ке вылэм, бызьыкуз, кык гинэ кылем. Визьнод люканы куинь школаосын кылдэм: Пудвайын, Пӧжыын, Пониноын. Мылкыдо, ужлэсь кышкасьтэм нылаш, Можга веттехникумез йылпумъяса, вордскем палъёсаз берытске.

- Ужан удысме мытӥ "Зотовский" совхозын. Ньыль но ӝыны сюрс поголовье вал, ми, ветеринаръёс, вить ӵошен тыршимы. Со вакытъёс ик бадӟым опыт сётӥзы, юн кыдатӥзы. Совхоз бырем бере, хозяйствоез возьыны выризы ик на, но ӧз быгатэ. Озьы мон Глазовысь ветстанцие ужаны выжи, - тодаз вае Валентина Николаевна.

Валэктонэз ӧвӧл, макем кулэ адями луэ гуртын пудо эмъясь. Азьвыл аръёсы нокин но пудотэк ӧз улы, Валентина Николаевналы но юрттэт курыса вазиськисьёс ӧз бырылэ. Скал но парсь вордӥсьёс али туж ӧжыт ни, озьы ке но, ӧтисьёс пыр луо.

- Пониноос, сёваос ӧтё, фермеръёс вазисько. Пудоен олокыӵе но югдуръёс луо ук, ӧнерчитэк кызьы валалод, мар карыны. Куке телефон пыр но лечить кариськомы. Ветеринарлэн ужез – со призвание, улытозьлы, - шуэ ачиз.

Шонер вера Валентина Николаевна. Озьы уга: пенсие потӥз ни, нош пудо эмъян ужез бордаз ик кылиз. Пудо вордонлы, эмъян удыслы 36 арзэ сӥзиз, ужысь зэмос ветеран.

Ас хозяйствоязы но Чупинъёс котьку пудоен уло. Нырысь интыын – скал. Пӧжыын но та пудоез вордӥсьёс чиньыен лыдъямон ни, ньыль семья, гужемъёсы огъя кариськыса, скалъёссылы электропастух возё. Йӧллэсь Валентина Николаевна творог, сыр лэсьтэ, пиналъёсызлы, ӵыжы-выжыосызлы келя. Карын но витисьёс трос. Озьы ик кемалась ни кроликъёсты вордо, таосызлэн но сӥльзы ӟеч кошке. Нош кыӵе но тылобурдо уг вордо: бройлер, курег, курка, ӟазег, муларда!

- Куркаосты ӝутыны уд вормы – кызь-кызь витё кило кыско. Туж яразы, - шуэ кузё кышно.

Асьмелы но, калыклы но умой медло

Котьмар но ужез Валентина Николаевна картэныз Александр Петровичен лэсьто-ужало. Бадӟым хозяйствоязы но сюлмысь ӵошен тыршо. 7 гектар музъемзы асьсэлэн вань, 14 гектар арендае басьтэмын на. Сое ужатыны трактор возё.

- Валентина Николаевналэн бадӟым узырлыкез – картэз. Малпанъёссэ, мылкыдъёссэ быдэстӥсез со, - веразы пӧжыос.

Ма бен, со туж умой ук! Тани, шуом, Крымез адӟемез потэ вал – вуылӥз ни, шутэтскиз. Табере мукетъёсыз тунсыко интыос сярысь малпанъёсыз вордӥсько. Но кыдёкысь шаеръёс, котькыӵе чебересь медло, – со огдырлы. Кулэгес – ас азбарад, ас гуртад медло шулдыр но чебер, ӟеч улымон-вылымон.

Пӧжыос - туж мылкыдоесь, огкылысь ужаны быгатӥсесь. Тани берло дыре кӧня адӟем карымон ужъёс быдэстӥзы ни, ёрос конкурсын но вормизы. Гуртазы туэ выль шутэтскон инты кылдӥз. Кичӧлтон солы Валентина Николаевна сётэм.

- Со вуж контора инты вал, быдэсак жаг турынэн басьтэмын. Тае чылкытатоно но чебер кароно вал шуыса малпан лыктӥз. Ӵапак со дыре шур сьӧрысь нюлэскысь усем кызэз адӟи. Картэлы верай: вай, пӧй, сое обинь бере. Малызэ соку ӧй вера но, соин, лэся, со кызэз ӧз вутты. Нош кури, скамейка лэсьто шуыса валэктӥ. Кызьы но мар кароно уйин йырам бергатӥ, ӵукна объявление гожтыса оши. Калык пумен люкаськиз ведь, мукет ульчаос но лыктӥзы. Татын калык эшъяськись.

Шутэтскон интылы пӧрмытэмлэсь азьло тямыс тележка силёзэ поттӥллям, сяська клумбаос улэ ӟеч сюй ворттӥллям. Конечно, Александр Петровичтэк та уж ӧй лэсьтӥськысал. Пограм кызэз но ӟусъёслы пӧрмытод-а сотэк? Картэз вандылӥз, инъяз, нош Валентина Николаевна ини соосты волятъяз но буяз. Инты тырмыт бере, нош мар ке лэсьтозы-пуктозы. Тулыс выль шутэтскон интызы турлы сяськаосын бордаз кыскоз ини.

Кытын-мар лэсьтоно, мае тупатоно ке гуртазы, Чупинъёс адӟытэк уг кылё. Вуэн шугъяськонъёс кылдо – Александр Петрович нырысьёсыз радын ини, кутске – лэсьтэ. Сюресэз тупатоно – со нош отын.

- Асьмелэн но ӟеч улэммы потэ, калыклы но умой медло, - мылкыдзэ усьтэ Валентина Николаевна.

Книгаос но нунокъёс

Та семьяын сяме пыӵамын: ӝыт изьыны выдон азьын, пе, кенешиськомы, мар ӵуказе каромы, кыӵе ужез быдэстомы. Но туала гурт нылкышнолэн ужен гинэ лул-сюлмыз уг улы. Ужысьтыз пенсие потыса, ар но ортчымтэ, Валентина Николаевна ассэ выль удысын шедьтэ. Табере со соцработник, вить мурт понна юрттӥсен но юлтошен, дуно адямиен луиз. Со сярысь тодыса, нырысь пайми кадь, нош собере туж валамон потӥз: Валентина Николаевна отын но ас интыяз.

Кык нылъёссы инъяськемын ини, ужало-тыршо, ас семьяосынызы уло: одӥгез матын – Глазов ёросысь ик Полынга гуртын, нош мукетыз Шаркан палъёсын кен луиз. Анай-атайзэс куинь нуныкаосын шумпоттӥзы ни.

Луо сыӵе дыръёс, куке Валентина Николаевна дуно мае ке сямен шкафысьтыз поттэ кык чебер книгаосты но котыраз нунокъёссэ люка.

- "Шедевры русской живописи" но "Золотая книга русской культуры" книгаос со. Перестройка вакыт мон соосты "Мир книги" пыр выписать карылӥ. Улон уга бугырес, валантэм, ӝож но пурысь потыны кутскиз, сюлэмез ӟибыны кутскиз кадь. Та книгаосысь бамъёссэ берыкъяса, сюлэм яркытэсь буёлъёсын, осконэн тырмылӥз кадь. Кужым ик пырылӥз, - валэктэ ачиз.

Дырын-дырын та книгаоссэ поттылэ, нош но нош синмаськыса учке усточиосын кылдытэм ужъёсты. Яратыса кияз кутэ асьме удмурт гожъясьёслэсь но книгаоссэс. Алигес потэм "Туала удмурт проза" но книга ӝажыяз вань ни. Озьы ик тунсыко пото кылбуръёс, выжыкылъёс но кельшо, шуэ.