Гуртъёсысь клубъёсын ужало кружокъёс, кытын кенакъёс пӧртэм киужъёслы но дышетско, верасько но, мылкыдзэс но буйгато. Яр ёросысь Дизьминоысь клубын "Рукоделие для женщин" но "Лозоплетение" кружокъёс кылдытэмын. Нуэ соосты Галина Трефилова.
- Кылем арын трос кышноос ветло вал, нош туэ 4-5 адями сяна уг луы, - шуэ Галина Петровна, - коронавирус ваньзэс коркаосазы пытсаз ни. Пӧртэм пужыосын носки, пӧзь, тапочки керттӥськомы. Кылем арын курико венен "бабушкин квадрат" амалэн пуконъёс вылэ шобретъёс пӧрмытӥмы, половикъёс выль сямен керттыны дышимы. Ужъёсмы али Яре адӟытонэ нуэмын.
Нош туэ бадьпу ньӧрез уже кутыны кутскиллям. Улӥсьёс, пе, корзинаос пуныны мылкыд каризы. Галина Петровна та киужлы нырысь ачиз Ярысь Киужъёсъя центрын дышетскем, табере тодон-валанъёсыныз гуртоосыныз люкиське ни.
- Ньӧр понна шутэтскон нуналэ ветлыны вераським, - мачке Галина Петровна. - Ӵошен шулдыргес луоз.
Мыло-кыдо кружоке пыриське Любовь Веретенникова.
- Носки-пӧзь керттыны валасько вал, но татын трос мукетсэ но дыши ни. Керттӥ ни шапкаос, кофтаос, половикъёс, салфеткаос.
- Али котьмар но магазинысь басьтыны луэ ни ук?
- Ас киосын маке но кылдытэм потэ. Со сяна, ми татын ог-огенымы но вераськиськомы, чай юон но ортчытъяськомы. Одӥг кышномурт ветлэ, олокыӵе но учыръёс, анекдотъёс мачке, серекъятэ милемды. Нош мукетыз кышномурт шуэ, ваньзэ, пе, интернетысь шедьтыны быгатӥсько, но калык пӧлын интересно.
Али кибашлыос Выль ар праздник сярысь малпасько ни – кыӵе костюмъёс вуроно, кыӵе сувениръёс дасяно.