Мон, Н.П. Огаревонь лемса МГУ-нь васенце курсонь студенткась, Асташкина Маргаритась, еран азондомс кельгома бабазень — Анна Трофимовна Асташкинать колга.
Бабазе атязень мархта эряйхть Инсарскяй райононь Коцятов велеса. Мон кельгса якамазень пялост инжикс. Бабазе васьфнесамазь пара мяльса. Кизонда минь мархтонза якатама нормальс Хлем лотку. Лоткть потмаксса шуди ляйня. Мон кельгса ванондомазень кода кевнятнень ланга эряскодозь шуди ару веднясь. Копордат ару ведняда и бта эрьгяце касы.
Бабазе пяк кельгсы мораманц. Сон содай лама мокшень и рузонь мора. Стирнякс сазоронзон мархта морсесь шачема-касома мокшень Пою велесонза. Л. Кирюковонь лемса музыкальнай училищать аделамда меле, Коцятов велеса мусь эстеенза кельгома тев. Сонь морама шинь асувоц яраштсь Коцятовонь народнай хорть вятемста. Эряви азомс, што Коцятовонь хорть содасазь странаньконь лама уженясонза. Хорть выступлениянзон, концертонзон лямбста васьфнезь Финляндияса, Венгрияса, Москуса, Ижевскяйса, Саранскяйса, Инсараса и лама лия вастова. Ару вайгяльхне, мазы наряттне салсезь ваныхнень и кулхцондыхнень мяльснон.
Анна Трофимовна макссь лама вий, штоба Коцятовонь хорсь араль народнайкс.
Эряскодыхть кизотне, бта ляйняста ару веднясь кати-ков... Кунара ни бабазе - пенсионерка. Кассть иденза, оцюфт уноконза, ули ни уноконь унокоц. Но сон ефси аф ащи тевфтома, и кда эряви лезксоц репертуаронь кочкамста, вайгялень ладямста, то тя тевса сон фалу пара мяльса лезды Коцятовонь хорть участниконзонды.
Од кизоть ушетксста Анна Трофимовнать шачема шиц. Мон арьсян кельгома бабазти кеме шумбраши, паваз лама-лама кизонди, эряфсонза сяда лама валда и лямбе шиня.