Айла, Ай-Кӱн де бӱгӱн ачукаарбайт, кӧк-айаста булуттар Кӱнди кӧжӧгӧлӧп, серӱниле улусты киледи ошкош…
Эл-Ойынныҥ культура аайынча программазы ӱч конкурстаҥ турган. Ойын-кокурдыҥ конкурсы "Тастаракайда" камыстыҥ ла кӧрӧӧчилердиҥ шӱӱшкениле Јалаҥыйдыҥ улузы баштапкы болдылар. Олорды ээчиде 2-чи јерди Мӧндӱр-Сокконныҥ кокурчылары алдылар. 3-чи јерди эки командага берер деп шӱӱлте болгон. Экинурдыҥ ла Јабанныҥ улузы "кӱлер" кайралдарды јер-алтайына јӱктенип апардылар.
Чыккан-ӧскӧн јурттары керегинде презентация-конкурста Моты-Оозыныҥ ла Кӧзӱлдиҥ улузы артыктарда, 2-чиле 3-чи јерлер Кырлыктыҥ ла Мӧндӱр-Сокконныҥ улузына артты.
"Јаҥар кожоҥныҥ" конкурсында Кӧзӱлдиҥ кожоҥчыларыныҥ јаҥары улустыҥ ӧзӧк-буурына јарамыкту томулды. Олорды эҥ артык деп, камыстыҥ улузы темдектедилер. Ээчиде Моты-Оозы ла Мӧндӱр-Сокконныҥ туружаачылары болдылар.
Спорттыҥ маргаандарын алзабыс шатрачылардыҥ ла ат-јарыштыҥ маргаандары озо ӧдӱп калган болгон. Шатра керегиндегазедисте јетирӱ болгон эди. Ат-јарышла баштапкы ӱч јерди Кырлыктыҥ, Кӧзӱлдиҥ ле Моты-Оозыныҥ аттары алгылаган болгон.
Спорттыҥ маргаандарында кӱрешчилер, ок-јаачылар, тебекчилер, чой-кӧдӱреечилер, токпок-чачачылар, таш-кӧдӱреечилер тоҥжан-јарышчылар маргышкылагандар.
Алтай кӱреш эҥ јилбӱлӱ маргаандардыҥ тоозында. Кӧрӧӧчилер мында јантайын кӧп болот. Бу да Эл-Ойында андый ла болды, сегис команда турушты. Кӱрешчилер эки подгруппага бӧлӱнип маргыштылар. Баштапкы подгруппада Јабаганныҥ, Экинурдыҥ, Јалаҥый-Бажыныҥ ла Мӧндӱр-Сокконныҥ бӧкӧлӧри болордо арткандары Моты-Оозыныҥ, Кырлыктыҥ, Кӧзӱлдиҥле Кырлыктыҥ уулдары экинчизинде кӱрешкендер. Подгруппаларда Јабаганныҥ ла Кӧзӱлдиҥ кӱрешчилери артыктагандар. Финалда Кӧзӱлдиҥ ле Јабаганныҥ уулдары кӱрештилер. Кӧзӱлдиҥ уулдары эпчил болуп јеҥӱни алгандар. "Мӧҥӱн" медальдар Јабаганныҥ кӱрешчилерине келишкен. "Кӱлер" медальдар учун Кырлыктыҥ ла Мӧндӱр-Сокконныҥ бӧкӧлӧри кабыжарда, ырыс Кырлыктыҥ уулдарына "јапшынган". 4-чи јерди Чарас бажыныҥ бӧкӧлӧри алдылар. 5-8 јерлер Моты-Оозыныҥ, Экинурдыҥ, Кан-Оозыныҥ ла Јалаҥый-Бажыныҥ уулдарына келишти.
Тоҥжан-јарышла эҥ јӱгӱрӱктердиҥ тоозында Јабаганныҥ, Моты-Оозыныҥ ла Мӧндӱр-Сокконныҥ уулдары болдылар. Олорды ээчиде турнир-таблицада Экинурдыҥ, Кӧзӱлдиҥ, Кырлыктыҥ, Кан-Оозыныҥ, Јалаҥый-Бажыныҥ ла Кайрукунныҥ спортчылары.
Эл-Ойынныҥ база бир кӧрӱмјилӱ маргааны - токпокчачаары. Мында эр улусла кожо эпшилер база эрчимдӱ туружадылар. Бу ойында Јалаҥый-Бажыныҥ токпокчылаарын артыктаары табылбады. 2-чи ле 3-чи јерлерди Кӧзӱлдиҥ ле Моты-Оозыныҥ улузы алдылар. Оноҥ ары јерлер Экинурдыҥ, Кырлыктыҥ, Јабаганныҥ, Чаргы-Оозы ла Мӧндӱр-Сокконныҥ спортчыларына келишти.
Камчы-согышта Јалаҥыйдыҥ уулдары аҥыланып, "алтынды" ала соктылар. Олор Тобошев Карчага ла Шукаков Аяс. Экинчи ле ӱчинчи јерлерди Моты-Оозыныҥ ла Кӧзӱлдиҥ камчычылары аларда, арткандарын Јабаганныҥ, Кырлыктыҥ, Экинурдыҥ, Кан-Оозыныҥ ла Кайрукунныҥ уулдары алдылар.
Кӧдӱрге-таштыҥ маргаандарында Экинурдыҥ уулдары "алтынды" ала соктылар. Јабаганныҥ ла Јалаҥыйдыҥ бӧкӧлӧри "мӧҥӱн" ле "кӱлерди" алдылар. Оноҥ ары турнир-таблицада Кӧзӱлдиҥ, Моты-Оозыныҥ, Кырлыктыҥ ла Мӧндӱр-Сокконныҥ уулдары.
Эй-Ойында тебек деп сӱрлӱ-јараш маргаан база бар. Баштапкы ла ӱчинчи јерлерди спорттыҥ бу бӱдӱмиле Моты-Оозыныҥ, Кӧзӱлдиҥ ле Экинурдыҥ тебекчилери алдылар. Оноҥ ары јерлер Кан-Оозыныҥ, Кайрукунныҥ, Кырлыктыҥ, Мӧндӱр-Сокконныҥ, Јалаҥыйдыҥ ла Јабаганныҥ уулдарына келишкен.
База бир бӧкӧлӧрдиҥ маргыжатан маргаандарыныҥ бирӱзи чой-кӧдӱрери болуп јат. Мында ӱй улус база туружатан болуп калган. Экинурдыҥ, Јалаҥыйдыҥ ла Кан-Оозыныҥ бӧкӧлӧри "алтын", "мӧҥӱн" ле "кӱлер" медальдарды алып јандылар. Олорды ээчиде Моты-Ооозыныҥ, Кырлыктыҥ, Кӧзӱлдиҥ, Јабаганныҥ ла Мӧндӱр-Сокконныҥ бӧкӧлӧри болдылар.
Ок-јаачылардыҥ маргаандары "Карчага сыйы" деп адалып јат. Эҥ чечен адышту команда Јабаганнаҥ болордо, экинчи ле ӱчинчи јерлерди Кӧзӱлдиҥ ле Кырлыктыҥ адучылары алдылар. Олорды ээчиде Экинурдыҥ, Јалаҥыйдыҥ ла Моты-Оозыныҥ чечендери болдылар. Арткан јурттар спорттыҥ бу бӱдӱмиле командалар тургуспагандар.
Алтай кӱреште эҥ бӧкӧ деп ат Моты-Оозыныҥ баатыры Ядрушкин Анатолийге келишти. Оныҥ сыйы тирӱ кой болды.
Эл-Ойынныҥ текши кӧргӱзилери аайынча баштапкы јерди Кӧзӱл јурттыҥ командазы алды. "Мӧҥӱн" ле "кӱлер" кайралдар Моты-Оозыныҥ ла Экинурдыҥ командаларына келишти. Турнир-таблицада оноҥ ары јерлерде Кырлыктыҥ, Јабаганныҥ, Јалаҥыйдыҥ, Мӧндӱр-Сокконныҥ, Кан-Оозыныҥ, Кайрукунныҥ, Чаргы-Оозыныҥ ла Коргонныҥ командалары болдылар.