Бистиҥ аймакта кажы ла jурт jеезеде ветерандардыҥ соведи эрчимдÿ иштейт. Jаан jаштулар jаантайын аймак кеминде туштажулар öткÿрип, ойын-концерт белетеп, öскö дö аймактарга jоруктап барары jакшынак jаҥжыгу болуп калды. Мынаҥ озо олор Оҥдой, Кош-Агаш, Кöксуу-Оозы аймактарла, öткöн jылда Улаган аймакка jоруктап барып келгендер эди. Кажы ла аймак бойыныҥ эл-jоныла, кылык-jаҥыла аҥыланып jат дезем, байла, jастыра болбос болор. Кÿндÿзек Улаган аймак бистиҥ jаан jаштуларды сÿреен jылу уткыган эди. Ондо öткÿрилген куучын, куда-шаалта керегинде кöдÿрилген курч сурактар керегинде бичимел бистиҥ газеттиҥ бÿгинде чыкканы кычыраачылардыҥ санаазына кирип ле турган болор.

Быjыл эки аймактыҥ jаан jаштуларыныҥ туштажузы бистиҥ Кан-Оозы аймак ичинде öтти. Бу ла öдÿп jаткан сыгын айдыҥ учында Улаган аймактыҥ ветерандары бистиҥ аймакка келип jÿрдилер. Ӱч кÿнниҥ туркунына олор Jабаган, Чаргы-Оозы, Моты-Оозы, Кан-Оозы jурттарла jоруктап, jербойыныҥ ветерандарыныҥ советтериниҥ ижиле таныжып, бойлорыныҥ белетеп алган ойын-концертиле кöрööчилерди сÿÿндирдилер. Акташ jурттаҥ "Тана" деп фольклорлык ансамбль (башкараачызы Раиса Пантелеевна Мекинова) ла Улаган jурттаҥ "Кöк-Таман" деп фольклорлык öмöлик (башкараачызы Зоя Андреевна Темдекова) солун кожоҥдорын, jаҥарларын кожоҥдоп, кокур биjезин кöргÿстилер. Кöрööчилер анчада ла артисттердиҥ кöп тоолу jÿзÿн-jÿÿр кеп-кийимин аjарып темдектедилер, бу кепти ветерандар бойлоры кöктöп jазаган эмтир. Улаган аймактыҥ ветерандарыныҥ ойынын белетеп тургускан кижи Алтай Республиканыҥ нерелÿ артизи Исаак Сергеевич Табулгин эмтир. Ады jарлу кожоҥчы бойы да кожоҥдоордо кöрööчилер изÿ колчабыжула уткыдылар.

Бистиҥ де jаан jаштулар бойыныҥ кожоҥдорын кожоҥдодылар. Моты-Оозы jурттыҥ "Кÿреелей" ле "Байана" деп фольклорлык öмöликтери, Усть-Кумир jурттаҥ "Сударушка" фольклорлык öмöликтиҥ jайалталу кожоҥчызы Александра Андреевна Белькова, Кан-Оозы jурттыҥ Валентин Алексеевич Тенгереков ло Jабаган ла Кан-Оозы jурттардыҥ jаан jаштуларыныҥ кожоҥдорын, ÿлгерлерин кöрööчилер база изÿ колчабыжула уткыдылар.

Айылчылар анайда ок Чаргы-Оозы ары jанында Денисово куй ташка jетире барып jÿрдилер. Бу куй таштыҥ тÿÿкизи сÿреен байлык. Ол керегинде jилбилÿ куучынды ветерандарга Чаргы-Оозы jурттыҥ библиотекари Ирина Извекова куучындады. Анайда ок Кан-Оозы аймактыҥ Jааныныҥ молjуларын бÿдÿрип турган А.А. Чакыров ыраак аймактаҥ айылдап келген ветерандарла туштажу öткÿрип, аймактагы ветерандардыҥ ижин бийик баалап турганын jетирди. Чындап та, аймактыҥ ветерандар Совединиҥ ижин канча jылдарга улай Александр Айдынович Матыков билгир башкарат. Тереҥ кöрÿмдÿ, бастыра jÿрÿминде башкараачы иштерде иштеп келген иштиҥ ветераны бÿгÿнги кÿнде анчада ла jашöскÿримге jозокту иш öткÿрет. Ыраак Улаган аймактыҥ ветерандары jылу кÿндÿÿ-кÿрее учун jаан быйанду арткандарын угустылар. Мынайып, эки аймактыҥ jаан jаштуларыныҥ кÿски туштажузы тÿгенди, jе наjылык мынаҥ да ары улалып, jилбилÿ jол-jоруктары мынаҥ да ары öдöри темдектелет.