Кöргÿзÿ эки бöлÿктеҥ турды. Баштапкызында Эмиль ле Радмилала кожо олорго башкарткан "Алтын Кÿÿ" öмöлик турушты. Оныҥ туружаачылары: Арутай Адабасов,Санат Рыжкин, Тамерлан Киндиков, Сабрина Бачикова. Отурган улусты алтай кай, алтай ойноткылар: топшуур, шоор, комус, тÿҥÿр – илбизин олjого кийдирди.

Экинчи бöлÿкте залда jуулгандарга Теркишевтер таҥынаҥ бойлоры кожоҥдорын сыйлады. Олордыҥ тоозында албаты сÿÿген "Мен алтай деген сöзим бар", "Сÿт Сÿмер", "Эне", "Ундыбазым", анайда ок jаҥы чÿмделген кожоҥдор болды. Кажы ла кÿÿни залда отурган улус ÿзÿлбес изÿ колчабыжула уткыгандар. Эмиль ле Радмиланыҥ кожоҥдорын уккан кижи, кандый да куулгазын олjого киргендий, бирде Алтайыстыҥ элкем-телкем jалаҥдарыла базып jÿргендий, бирде, бийик чаҥкыр теҥериде турналарла кожо кайып учкандый. Кажы ла кожоҥ бойында аҥылу клипту болды. Кöп саба кожоҥдордыҥ ла кÿÿниҥ чÿмдеечизи Эмиль бойы. Чÿмдемелдердиҥ сöстöрин укса, кажызы ла тереҥ учурлу, алтай эрдиҥ jериле оморкодузы билдирет.

Концерт божогон соҥында сценага "Кан Чарас" газеттиҥ баш редакторы Маргарита Сапышева чыкты. 2017 jылда кÿÿк айдыҥ 25-чи кÿнинде чыккан газеттиҥ номеринде эл-jонго мындый баштану болгонын Маргарита Михайловна айтты: "Бис газеттиҥ адын "Öйдиҥ ÿнинеҥ" "Кан Чараска" солыган да болзобыс, jе алдындагы ады ундылбазын деп, "Öйдиҥ ÿни" деп сый тöзöлгöни керегинде бичиген эдис. Ол сыйла Кан-Оозы аймактыҥ кеендик jайалталу: jаҥы кожоҥ, ÿлгер, ÿлекер-проект чÿмдеп, алтай албатыны, алтай тилди кöдÿрип турган jииттер кайралдадар деп айтканыбыс. Айдарда, бÿгÿнги эҥирде бу аҥылу сыйла бис Эмиль Теркишевти "Öйдиҥ ÿни" деп jаҥы чÿмдеген кожоҥы учун кайралдап jадыбыс". Анайда ок, Маргарита Михайловна бу алтай кöрÿмдÿ, ойгор кöгÿстÿ jииттерге jайаан jолдоры ачык болзын, амадаган амадулары ÿзе бÿтсин деп кÿÿнзеди.

Онойып ойын-концерт тÿгенди. Ол кÿн залдаҥ улус кöдÿриҥилÿ кÿÿн-санаалу чыккан деп айтсам, байла, jастра болбос. Эмиль ле Радмиланыҥ кожоҥдоры улустыҥ кÿÿн-санаазын, кöксин ойгозып, алтай тилистиҥ, jеристиҥ байлыгын, öҥжигин, jаражын база катап кереледи.