Нениҥ учун солун дезе, Чейнеш – баштапкы алтай "кожоҥчы" бичиктиҥ авторы болуп jат. Чейнеш бистиҥ jерлежис, Мооты-Оозы jурттыҥ кижизи, тургуза öйдö ол Горно-Алтайск калада jадып, эш-нöкöри Артурла кожо эки кызычак азырап, чыдадат. Бичиги керегинде бис Чейнешти бир эмеш куучындап берзин деп сурадыс. "Бу бичиктиҥ ады "Кожоҥчы койонок", оныҥ ак-jарыкка чыкканы jаан удабаган. Мениҥ бажымда болчомдорго ондый алтай кожоҥчы бичик чыгарар санаа туку качаннаҥ бери айланып jÿрген. Мен таҥынаҥ "Алтай бичик" деп издательство тöзöп, бойымныҥ баштапкы амадумга jединер деп, тöп-шÿÿлтеге келдим. Тöрт jылдыҥ туркунына канча улусла jолугып, jоруктап, jаан иш öткÿрерге келишкен деп айтсам, jастыра болбос. Эдилген иштиҥ турултазы бу бичик. "Кожоҥчы койонок" кепке "Алтай бичик" деп издательстволык турада базылып, Китайда кожоҥчы бÿдÿмдÿ бичик эдип jазалган. Бичикте алтай албатыныҥ ла алтай эстраданыҥ кожоҥдоры. Оны кожондогон улус: Эмил Толкочеков, Жанэтта Тонова, Нина Колондина, аранжировказы Азулай Тадиновтыҥ, сÿрлÿ jараш jуруктарды Сергей Дыков, Аржан Ютеев, Саяна Темеева, Владимир Попов jурагандар, баш редактор – Чейнеш Барсукова. Бу бичикти кепке базып белетегенинде, мындый узы бийик, билгирлери тереҥ улус турушканынаҥ, бичик кееркемjик ле jаркынду бÿдÿмдÿ болгоны керелейт. Эм тургуза бичиктиҥ тиражы 1000. Бу бичикти чыгарарында jöмöшкöн, болушкан улуска jаан быйанымды айдадым. Санаалар эмди де кöп, амадулар эмди де бар. Ижисти онон ары улалтып, öрö öзöрис. Спонсорлор табылып, болужын jетирер деп, иженедис". Бу jиит алтай келинниҥ мындый бичик чыгарганы коркышту jаан jакшы баштаҥкай, бистиҥ алтай тилистиҥ jаражын jаркынын керелеген база бир jакшы тем болуп jат. Бис редакцияныҥ адынаҥ Чейнешке ижинде оноҥ бийик jедимдер, амадаган амадулары узе бÿтсин деп кÿÿнзейдис.