Пересь кышномурт одӥгназ
Вамышъя дыртытэк ас дораз.
Куара мышкысьтыз со кылӥз -
Пичи ныл кышкаса черектӥз!
Пунылэсь со кышкам мискинь.
Мунёзэ ас бордаз ӟыгыртӥз.
"Юртты, утьы монэ, меми" -
Анаез пумитэ со бызиз.
Мемиез нылызлы пальпотӥз,
Ӟыгыртӥз, буйгатӥз вешаса.
Нош пересь кышномурт шоналскиз,
Ланьырскиз, сюлэмаз кутскыса.
Ныллэн жингырес куараез
Ӧз, ӧз кышкаты сюлэмзэ.
Солэн верам кылъёсыз
Тодэ вайытӥз ортчемзэ…
Кемалась, егит вакытаз,
Одӥг пияшлы со оскиз,
Нош нылпи луонэз тодыса,
Гажанэз соку ик пегӟиз.
"Юнме сюлмаськон со – нуны", -
Озьы анай малпаськиз.
Нош пушказ кин ке вырӟыса,
Ачиз сярысь шӧдытӥз.
"Мон со, мон – тынад пичиед,
Сюлмыныд тон монэ шӧдӥськод.
Ӧжыт чида, анай, мон будо но
Ӝоген тонэ юн ӟыгырто.
Улонлэн та секыт вакытаз
Тон эн тышкаськы, эн атаез.
Пальпото мон тыныд, мусое,
Ӵукъёсы шуныт шундыен.
Тынэсьтыд мон трос ик уг куры:
Веша но ярат монэ.
Ӝытъёсы выжыкыл мыным лыдӟы
Яке кырӟа небыт куараен.
Ӝоген мон луо ни юрттӥсь,
Уд шӧды, кызьы будэмме.
Ярато тонэ котьку ик, котьку
Тонэ, мусо мемие".
Но анай пичи нылызлэсь
Ӧз кылзы верам кылъёссэ.
"Ӧвол! Кулэ тон ӧвӧл!" -
Со дугдӥз кабинет азе.
Вуиз врач, сётӥзы ни наркоз -
Мозмытсконо ӝоггес пиналлэсь!
Уйвӧт пыр кадь егит нылаш
Кылӥз нылызлэсь бӧрдэмзэ.
Кулэтэм, куштоно пинал
Гадь пушкын бӧрдиз, кесяськиз:
"Уг яра! Вӧсь ук! Уг яра!
Жаля, юртты мыным, меми!"…
Со кезьыт сӥзьыл уйшоре
Ӧз кыньы нылаш синъёссэ…
Уз кылы ноку но, ноку
Нылпи висъетысь куараез…
Ӝоген пересьмон но вуиз –
Огназ ортчытӥз аръёссэ.
Но туннэ тодаз со вайиз
Кемалась лэсьтэм йыружзэ.
…Калык котыраз люкаськиз ни.
Валидол ымаз понӥзы…
Егит пи выре дыртыса,
Ӝоггес жингыртын врачъёслы.
Эмъюрттэт возьмась висисез
Калык жаляса учкылэ.
Пересь нош мырдэм шыпыртэ:
"Простить кар, простить кар монэ!"
Но тани кисыриос волязы,
Ымныраз буйган шӧдӥськиз.
"Сое простить каризы кадь" -
Калыкысь верам кылӥськиз.