Байрамныҥ кӧдӱриҥилӱ ачылтазында аймактыҥ јааны Н.А. Санин, собестиҥ дирек-торы А.А. Санаа, Улаган аймакта Пенсионный фондтыҥ јааны И.С. Куюков, Саратан јурт јеезениҥ јааны А.К. Акчин, Јазулуныҥ школыныҥ ӱредӱчилери ле эл-јоны Алек-сей Александровичти эзедип, јылу сӧстӧрин айткандар. Олордыҥ эске алынганыла,

А.А. Кензин ары јанынаҥ јайалталу, тӧп санаалу, кӧгӱс байлыгы элбек, јалтанбас, кокырчы, ачык-јарык, ишмекчи, турумкай кижи болгон. Ол кандый ла ишти баштаза, учына јетирип, јана баспазыла аҥыланатан. Кӱчи јеткенче улуска болужар, чын немени улустыҥ кӧзине чикезинче айдар кижи болгон деп эске алынгандар. Алексей Александрович јаҥыс ла аймак ичинде эмес, республика ичинде јарлу болгон. Канча јылдардыҥ туркунына иштеп, Јазулу ла Саратан јурттардыҥ ӧзӱмине јаан камаанын јетирген. Эмдиги ӧйдӧ Алексей Александровичтиҥ адыла Саратан јуртта культурно-спортивный комплекс адалып јат. Оны тудуп баштап, Москвага Президет В.В. Путинге ле оноҥ до ӧскӧ јаан јамылуларга самаралар бичип, акчазын чыгартып, спорткомплекс тудуларына сӱрекей јаан салтарын јетирген деп темдектеер керек. Јазулу јурттыҥ улузы олордыҥ кичинек јуртына школ тудуп бергенине эмдигенче быйанду јӱрет. Анайда ок, Јазулу јаар јолдо Чолушман сууны кечире кӱр де туткан. Албатызына эткен иштерин, јетирген тузазын эмди тоолоп то болбос. Адазыныҥ ишмекчи јолы ла јӱрӱми керегинде видеопрезентацияны Алексей Александровичтиҥ кызы Марина Алексеевна јуулган

улуска кӧргӱскен. Ишмекчи јолын Алексей Александрович Барнаул калада јурт элем институттыҥ ве-теринарный бӧлӱгин божодоло, Улаган совхозтыҥ ветеринарный эмчизи болуп иштеп баштаган. 1972-1974 јылдарда Улаган аймактыҥ ветеринарный бӧлӱгиниҥ баш врачы болуп иштейт. 70 јылдардыҥ учында – 80 јылдардыҥ бажында Саратан совхозтыҥ про-рабы болуп иштейт. 1980-1985 јылдарда Саратанда партийный организацияныҥ качызы болуп иштеген. 1990-1993 јылдарда Саратанныҥ совхозыныҥ директоры болгон. 1993 јылдаҥ ала 2008 јылга јетире Саратан јурттыҥ администрацияныҥ јааны болуп иштеген. 2010 јылда јаан јеткердеҥ улам Алексей Александрович ак-јарыктаҥ јӱре берген. Эмдиги ӧйдӧ оныҥ эш-нӧкӧри Галина Иосифовна, уулдары Роман, Сергей, Александр, Юрий,

кыстары Марина ла Марианна адазыныҥ угын улалтып, оныҥ адын бийик кӧдӱрип, бойлоры айыл-јуртту, балдарлу Саратан ла Јазулу јурттарда јадат. Кӧдӱриҥилӱ ачылтаныҥ кийнинче јуулган улуска Саратанныҥ школыныҥ јуучыл-патриотикалык клубыныҥ курсанттары, Улаганныҥ культура бӧлӱгиниҥ ле Јазулу јурттыҥ артисттери ойын-концерт кӧргӱскендер.

Волейболло маргаанга бурулып айдар болзо, мында бастыра јаба 12 команда турушкан.

Улаган аймактыҥ јурттарынаҥ ла Кош-Агаш аймактаҥ 2 команда келген. Кызу тартыжу-лар караҥуй тӱнге јетире улалып, баштапкы јерге Балыктујул јурттыҥ командазы чыга конгон. Экинчи јерде Саратан јурттыҥ волейболчылары ла ӱчинчиде Јазулу јурттыҥ командазы болдылар. Анайда ок, маргаанныҥ турулталарыла эҥ артык ойноочылар тем-дектелгендер: Белешев Виктор, Койдушев Учур, Койдушев Дамир (Саратан), Адыкаев Мерген (Балыктујул), Темдеков Аржан (Јазулу). Јеҥӱчилдер кубокторло, грамоталарла, медальдарла, акчалу сыйларла кайралдаткандар. Спортсӱӱчилердиҥ, туружаачылардыҥ айткан кӱӱнземелиле болзо, бу турнирдиҥ учурын оноҥ тыҥ бийиктедип, јылдыҥ ла ӧткӱрип турар керек.