Јаҥар айдыҥ 15–чи кӱнинде Горно-Алтайск кала-да драмалык театрдыҥ јаан залында тергеебистиҥ јааны, Алтай Республиканыҥ Башкарузыныҥ Председатели А.В. Бердниковтыҥ сыйына учурлалган јайаандык
ла кеендиктиҥ конкурсыныҥ турултала-ры кӧдӱриҥилӱ айалгада јарлалган. "Экологиялык темага эҥ артык кожоҥ, ӱлгер" деген номинацияда бойыныҥ јажында бистиҥ јерлежис Татьяна Николаевна Тойдонова јеҥип, диплом ло акча-манатла кайралдаткан. Татьяна Николаевнаныҥ бойыныҥ куучындаганыла, айдылган сыйларга кош-той отургызарга белетеген мӧш агаш (экологияныҥ јылыныҥ эмблемазы) база сыйлаган болуптыр. Оны бистиҥ јеҥӱчил иштеп турган ӧмӧлигине, аймактыҥ
библиотеказына сыйлаган.
- Алтай јеристиҥ ар-бӱткениле бис јуук колбулу, ару кейин тынып, аржан сууларын ичип, кадынаҥ кузугынаҥ амзап јӱредис. Ажуларга јаламаны буулап, - Алтайыска амыр-энчӱ, аҥы-кужына – ӧзӱм, бойлорыска – су-кадык, јӱрӱмиске – ачык јол, бала-баркабыска эзен-амыр сурап турганыс бис Алтайдаҥ
камаанду болгонысты керелейт. Бисти ӧскӧ укту улус "Ар-бӱткенниҥ балдары" деп тегиндӱ адабайт.
2017 такаа јылды экологияныҥ јылына учурлаганы – ол ӧйдиҥ некелтези деп сананадым. Бу учурлу иш оноҥ до ары улаларында алаҥзу јок. Бу конкурста туружарымда мени јӧмӧгӧн эл-јоныма акту-кӱӱнимнеҥ быйанымды айдып, су-кадык, амыр-энчӱ кӱӱнзейдим. Јӱрӱмигердиҥ јолы ачык, ӧскӧн-чыккан Алтайаар курчуугар болзын! – деп, Татьяна Николаевна бойыныҥ санаа-шӱӱлтелериле ӱлежип, кӱӱнзеди.