Маргаанга республиканыҥ школдорыныҥ шатрачылары: Турочак, Оҥдой, Кан-Оозы, Шебалин, Улаган аймактардыҥ ла Алтай Республиканыҥ тӧс калазыныҥ ӧмӧликтери туруштылар. Бистиҥ аймактаҥ Паспартыныҥ, Кара-Кујурдыҥ орто ӱредӱлӱ школдорынаҥ ла балдардыҥ jайаандыгыныҥ тӧс jеринеҥ 11 туружаачы тартышты. Бу маргаанда -74 ӱренчик турушты, олор ончозы республика кеминде бийик jедимдерге jеткен шатрачылар.

Маргаанныҥ турулталары аайынча бистиҥ балдардыҥ jеткен jедимдери мындый болды:

Кызычактар ортозында:

12 jашка jетире:

2 j. Санина Айсана, Кара-Кујурдыҥ орто ӱредӱлӱ школынаҥ (таскадаачы- Сартаков В.Г.);

18 jашка jетире:

1 j. Манзырова Руслана - Паспартыныҥ орто ӱредӱлӱ школынаҥ (таскадаачызы- Кокпоев Н.П.);

2 j. Белешева Алтын-Сай - Паспартыныҥ орто ӱредӱлӱ школынаҥ (таскадаачызы- Кокпоев Н.П.);

Уулчактар ортодо:

10 jашка jетире:

2 j. Топчин Тамерлан - Паспартыныҥ орто ӱредӱлӱ школынаҥ (таскадаачызы- Кокпоев Н.П.);

14 jашка jетире:

1 j. Чоков Эжер - Улаганныҥ jайаандыгыныҥ тӧс jериниҥ туружаачызы (таскадаачызы - Койткин С.Н.);

3 j. Чоков Айдар-Улаганныҥ jайаандыгыныҥ тӧс jериниҥ туружаачызы (таскадаачызы - Койткин С.Н.);

18 jашка jетире:

1 j. Чуу Данил -Улаганныҥ jайаандыгыныҥ тӧс jериниҥ туружаачызы (таскадаачызы- Койткин С.Н.);

2 j. Калкин Станислав - Улаганныҥ jайаандыгыныҥ тӧс jериниҥ туружаачызы (таскадаачызы- Койткин С.Н.);

Эр улус ортодо:

1j. Койткин С.Н. - Улаганныҥ jайаандыгыныҥ тӧс jериниҥ туружаачызы (таскадаачы);

Блиц-ойында (ӧйгӧ-ойын 5 мин.):

1j. Ядагаев Г.Л., Горно-Алтайск каладаҥ;

2 j. Койткин С.Н., Улаган аймак;

3 j. Чуу Д.А., Улаган аймак.

Улаган аймакта алтай шатрала федерациязыныҥ президенти Сергей Николаевич Койткин: "Бу ӧткӧн ойын-маргаан келер кӱчӱрген айдыҥ 15-20 кӱндеринде Горно-Алтайск калада, калыктар ортодо ӧдӧтӧн маргаандарда 14 -18 jашка jетире талдаштар болгон. Бистиҥ аймактыҥ адын корулап 5 туружаачы ойноор, ондо мындый ойындар ӧдӧр: тогуз-кумалак (казах калыктыҥ ойыны), мангала (турк калыктыҥ ойыны), алтай шатра.

Анайда ок, ӧткӧн jаан изу айдыҥ 25-30 кӱндеринде Монголияда Азияныҥ Чемпионады болгон, тӱрк албатыныҥ ойын-маргаандары: алтай шатра, тогуз-кумалык ла хабалык (якут албатынын ойыны) ӧткӱрилген. Бистиҥ Алтай Республикадаҥ 15 туружаачызы Россиядыҥ адынаҥ ойногон. Улаган аймактан 2 туружаачы jенулу jанган: 14 jашка jетире балдар ортодо баштапкы jерге Чоков Эжер, эр улус ортодо Койткин Сергей база ла јеҥӱчил болуп чыктылар".

Анайда ок, јайгыда Киргизияда Чолпон-Ата калада ӧткӧн "Кӧчкӱндердиҥ ойындарына" Койткин С.Н. ле Кокпоев Н.П. барып келгендер. Бистиҥ туружачылар тогуз-кумалакла маргышкандар. Тӱрк албатыныҥ мангала ла африкан ойын овари ойындарга ӱренгенгендер. Мангала ойынла Алтай Республиканыҥ командазы 4-чи јер алган. Турция ороонныҥ спортчылары бистиҥ алтай шатрала јилбиркеп, оны ойноп ӱренер кӱӱндӱ болгонын угускандар. Кӱчӱрген айда Горно-Алтайскта болотон алтай шатрала маргаандарга Турциянаҥ туружачылар келер болгон. Оныҥ кийнинде Алтай Республиканыҥ балдары Турцияга барып мангала ойноп маргыжар деп јӧптӧжӱ тургузылган.

Алтай албатыныҥ озодоҥ бери ойногон бу бӱдӱмиле тыҥ jилбиркеп, балдарын бийик кемине jетирген таскадаачыларыска бийик jедимдер ле су-кадык кӱӱнзейдис: Сартаков В.Г., Кара-Кујурдыҥ орто ӱредӱлӱ школыныҥ таскадаачызына, Кокпоев Н.П., Паспартыныҥ орто ӱредӱлӱ школынаҥ таскадаачызына, Койткин С. Н., Улаганныҥ jайаандыгыныҥ тӧс jериниҥ таскадаачызына.

Маргаанга барарга болушкан Паспартыныҥ орто ӱредӱлӱ школыныҥ jаанына Айдар Владимирович Байжигитовко ло тискинчизине Мерген Моисеевич Топчинге, туружаачы балдардыҥ ада-энезине jол-jорукка акча-манадыла болушкан учун Улаганныҥ jайаандыгыныҥ тӧс jериниҥ адынаҥ быйанысты jетирип турубыс.