Эл драмалык театрдыҥ јаан залында 9 јаштаҥ ала 15 јашка јетире одуска јуук јиит туружаачылар ла ӧмӧликтер 4 башка номинацияда тартышкандар. Фестивальдыҥ программазын бойыныҥ ойыныла јарлу "Ээлӱ кай" деп алтай ойноткылардыҥ оркестри баштаган. Мында 9 кайчыныҥ ортозында бежӱзи бистиҥ јерлештерис болгоныла канайып оморкобос: Алексей Калкин, Алан Темеев, Геннадий Самаев, Мерген Тельденов, Эдуард Согоноков. Анайда ок концертке келген кӧрӧӧчилерге ӧткӧн Курултайлардыҥ лауреаттары ла Кыргыс, Башкортостан, Тыва, Хакас ла Бурят республикалардаҥ келген айылчылар кожоҥ-комудын ла чӱмдӱ ойынын сыйлаарда, Майманыҥ "Smaile" деп бијениҥ театры ла каланыҥ "Азарт", "Тан Чолмон" ӧмӧликтери бијелериле кееркетти. Фестивальда база бир бистиҥ аймактыҥ оморкодузы Валентина Саксаеваныҥ кийистеҥ эдилген кийимдериниҥ кӧрӱзи база ӧткӧни солун болды. Бистиҥ аймактыҥ Алексей Григорьевич Калкинныҥ адыла адалган балдардыҥ јайаандыгыныҥ школыныҥ јиит туружаачылары "Кайдыҥ бӱдӱмдери" деп номинацияда јер албаганы ачымчылу да болгон болзо, је ӧскӧ номинацияларда кӧп тоолу кайралдар алганын темдектеер керек. Айдарда, изӱ тартыжу бажында јеҥӱниҥ тепкижинде јерлер мынайда ӱлелген:

"Ӧмӧликле кайлаарында кайдыҥ бӱдӱми" деп номинацияда тоомјылу баштапкы степеньду лауреаттар болуп бистиҥ јерлештерис - Мерген Тельденов башкарган "Баатырлар" деп кайдыҥ санадыныҥ ӧмӧлиги чыккандар. Лауреаттыҥ экинчи степени Кан-Оозыныҥ Эмиль Теркишевке баштаткан "Алтын Куу" деп ӧмӧликке једижерде, ӱчинчи јер Бурят республикадаҥ келген "Алтанзула" деп ӧмӧликке келишкен.

"Кай санат" деп номинацияда баштапкы ла ӱчинчи степеньду лауреаттар болуп Эмиль Теркишевтиҥ ӱренчиктери Василий Ильмеков ло Темирей Тысов чыгарда, экинчи јерди ойто ло Алан Темеевке баштаткан бистиҥ јерлежис Алан Байтушкин ойноп алган.

"Уткаалап айдары" деп номинацияда баштапкы јерде Башкортостан республиканыҥ Ильдар Юнусов деп айылчы болордо, экинчи ле ӱчинчи јерлерди Мерген Тельденовтыҥ ӱренчиктери Ринель Сандяева ла Ай-Санаа Темеева ала койдылар.

Кайчы Шалбаа Марковтыҥ 130-чы јылдыгына учурлалган аҥылу сыйларла Темирей Тысов (Кан-Оозы), Сабира Молдоисаева ла Айгерим Чулуева (Кыргыс республика), Алан Байтушкин (Улаган), морин-хуристердиҥ "Алтанзула" деп ӧмӧлиги (Бурят республика), Ильдар Юнусов (Башкортостан республика) ла Мӧҥӱне Тайтаков (Оҥдой) кайралдаттылар.

Россия Федерацияныҥ эл-јондык палатазыныҥ турчызы, Россия Федерацияныҥ культураныҥ ат-нерелӱ ишчизи Борис Кундулеевич Алушкин айылчыларды Быйанду самараларла темдектеп, анайда ок ол "Трудовая Доблесть России" деп Бастырароссиялык эл организацияныҥ бийик темдегин Таныспай Шинжинге, Мерген Тельденовко ло Эмиль Теркишевке табыштырган.

Курултай ӧйинде театрдыҥ площадкаларында јарлу алтай кайчылардыҥ сӱрлери ле алтай кай чӧрчӧктиҥ мотивтери аайынча јуруктардыҥ кӧрӱзи, литературалык кӧрӱ ле алтай ойноткылардыҥ кӧрӱзи иштеген, ойноткыларла мастер-класстар ӧткӱрилген.

Мыныла колбой темдектеп ийерге турганыс, бу јуукта Кайчылардыҥ курултайы деп фестиваль сыгын айдыҥ 26-27 кӱндеринде Улан-Удэ калада ӧткӧн Сибирь ле Ыраак Кӱнчыгышта Russian Event Awards 2019 деп эл премияныҥ тергеелик финалында "Культураныҥ областьтинде Эҥ јакшы туристикалык солун" деп номинациязында баштапкы јерге чыккан. Курултай аайынча проектти "Ээлӱ кай" деп регионал эл организацияныҥ кайчызы Мерген Тельденов корыганына бис акту кӱӱнистеҥ сӱӱнип, јерлежис ле оморкоп турганысты јетиредис. Мынаҥ ары Кайчылардыҥ курултайы бу ок премияныҥ кӱчӱрген айда Самара калада ӧдӧтӧн финалында база туружар.