"Јайалталардыҥ солоҥызы" - ол алтын кӱсти уткыганын керелеген башка-башка жанрларлу фестиваль-конкурс болор. Бу конкурс туружаачыларга бойлорын кожоҥдо, поэзияда, хореографияда, кӱӱлик ойноткыларла ойноорында ла анаҥ да ӧскӧ жанрларда ченеер арга берет. Кажы ла кӧрӧӧчиге кӧргӱскен номерди жюриге кирген культура ла кеендиктиҥ артисттери, кӱӱлик ӱредӱлик заведениелердиҥ профессорлоры ла ӱредӱчилери, ады-јарлу хореографтар, хормейстерлер баалап, талдагылайт.
"Хореография" деп бӧлӱктиҥ башкараачызы Сынару Альбертовна Санинага баштаткан "Таҥ Чолмон" ӧмӧлик хореография ла моданыҥ театры деп конкурста "Ӧркӧлӧрдиҥ ойыны" ла "Кезер таш" деп бијелер бијелеп, 52 ӧмӧликтиҥ ортозынаҥ тоомјылу ӱчинчи јерге чыккан. "Художественное" деп бӧлӱктиҥ ӱренчиктери Чулунова Христина "Алтайдыҥ коручылары" деп јуругыла, Тазрашева Айана "Пазырыктыҥ кургандары" деп јуругыла јаштарла бӧлинген эки башка категорияда база ӱчинчи јерлер ойногылап алгандар, бу кызычактарды Марина Ивановна Чулунова ӱредип белетеген.
Бу јилбилӱ јол-јорыктыҥ ырысту јеҥӱчилериниҥ ады-јолын адабаска болбос, олор: Айлика Адыкаева, Байсура Манзырова, Валерия Чулунова, Байару Манзырова, Айару Штанова, Христина Чулунова, Алтын-Сай Бачимова, Алина Тадышева, Эркелей Бачишева, Виктория Талбакова, Александра Манзырова, Алтын-Сай Кокпашева, Роман Талбаков, Валерия Конокпоева, Айана Тазрашева.
"Сочи калага јол-јорыгыс јакшы болды, балдар конкурска једимдӱ турушкылаган, јанар кӱӱндери келбей тургылады. Анда бис су-кадыкты орныктырар "Дагомыс" деп комплексте јатканыс, ресторан, бассейн, концертный зал, сцена ла ойын-сооттыҥ јери бир ле јерде болгоны эптӱ эмтир. Конкурска баргалы бир де эмеш бош ӧй болбогон, је андый да болзо бис балдар ла кожо дельфинарийде, океанариумда, пингвинариумда ӧткӧн шоуларда болгоныс, бала-баркага коркушту јараган. Алтай улустыҥ айтканыла болзо, јаан сууга туштаза алкыш-быйанын суранып, мактап айдатан дежетен, оныҥ учун бис јаан талайды кӧрӱп, јаражын мактап, акту кӱӱнистеҥ сурандыс. Жюриге бистиҥ бијелеген бијелерис коркушту тыҥ јараган, анчада ла "Ӧркӧлӧрдиҥ ойыны" деп бије, "балдараар ачык-јарык, кееркемјилӱлери коркышту" деп темдектедилер. "Мындый этникалык бијелерди сценага чыгарып, јарлап кӧргӱзер керек" деп айдыжып, јайгыда Санкт-Петербург калада ӧдӧтӧн конкурска бисти база кычыргандар. Учурал келижерде биске јаантайын канча јылдардыҥ туркунына јылу сӧстӧриле јӧмӧп, сценада кийетен костюмдарды кӧктӧдип, јаан болужын јетирип турган эне-адаларга Юлия Васильевна Адыкаевага, Зарина Константиновна Талбаковага, Эльза Николаевна Манзыровага, Марина Сергеевна Чулуновага, Владимир Акчеевич Конокпоевке ле костюмдарысты кӧктӧп турган Айана Владимировна Ультуркеевага бойымныҥ адымнаҥ јаан быйанымды айдып турум" -деп Сынару Альбертовна кӱӱн-санаазыла ӱлешти.
Кандый кӱӱн-санаалу тӧрӧлине јанганын куучындап берзин деп сурагыма, балдар ончозы Сочиде кейдиҥ јылузын, эбиреде ар-бӱткен ончо јажыл болгонын, Кара талайдыҥ тусту суузыныҥ кайкамјыгын, јӱзӱн-јӱӱр тындулар ла чечектер кӧргӧнин, кӧп тоолу анимационный ӧткӱрмелдер ле дискотекада турушкандарын ӧкпӧӧрип айткандар.
"Балдар- ол јӱрӱмниҥ чечектери"- деп тегиндӱ айдылбаган, оныҥ учун кажы ла эне-ада балазы узак јолго барып, јараш јерлер кӧрӱп, улус ла таныжып, кӧгӱс байлыгын јарандырзын деп акту јӱрегинеҥ амадайт. Эмдиги кату кӱч ӧйдӧ, ончо ло неме акча-манаттаҥ камаанду болуп каларда, ол ло эне-адалар албадангылап, бала-барказын јол-јорыкка бойыныҥ ла арга-кӱчиле ийгенин темдектеер керек. Је кандый да учуралда јӱрӱмниҥ јолында јакшы улус кӧп туштайт деп качанда ундыбай јӱрер керек. Мыныла колбой Сочи калада ӧткӧн фестивальдыҥ јеҥӱчилдери ле олордыҥ башкараачылары Сынару Санина ла Марина Чулунова акту кӱӱнинеҥ јол-јорыкка барарга болушкан эне-адаларга, бензинле јеткилдеген Балыктујул јурттыҥ јеезезиниҥ јаанына Дмитрий Чулуновко, аймактыҥ депутаттары Айвар Чугуловко ло Иван Чулуновко, Новосибирск калага бойлорыныј кӧӧликтериле апарып, ойто уткуп экелген тискинчилер Айдар Тымыевке ле Артем Сабуловко, калада айлына кычырып кондырган Марина Чулуновага јерге батпас быйанын айдат.