Бу кӱндерде аймактыҥ ады-јарлу "Ар-Башкуш" албатылык ӧмӧлиги бойыныҥ тӧзӧлгӧнинеҥ ала 25 јыл толгонын бийик кеминде темдектеди.
Кожоҥдо, кожоҥчы, кожоҥдо,
Куулгазын кӱӱлердиҥ илбизи.
Кожоҥдо, кожоҥчы, кожоҥдо,
Кожоҥыҥ ыраак јайылзын!
25 јыл… туй ла 25 јыл кайра ӧктӧм јӱректӱ, коо ӱндӱ, јӱрӱминиҥ јолын кӱӱле колбогон Юрий Карабашев, Леонид Карабашев ле Василий Ядагаев деп јиит уулдар биригип, ол ӧйлӧрдӧ аймактыҥ культура бӧлӱгин башкарган Евдокия Борисовна Нидееваныҥ јӧмӧлтӧзиле "Ар-Башкуш" ӧмӧлик тӧзӧгилеп, эрчимдӱ иштегилеп баштаган. Ӧйлӧр ӧдӱп, "кӱӱ бисти бириктирген" деп јарлу кожоҥныҥ сӧстӧрин керелегендий, ӧмӧликке Виктор Чанчиев, Елена Белеева, Елена Енчинова ла Геннадий Асканаков деп јиит јайалталу кожоҥчылар кожулып, эл-јонды анаҥ ары солун јараш кожоҥдорыла сӱӱндиргилеген. Оны ла колбой ӧмӧликте канча јылдардыҥ туркунына јараш кожоҥдоп, јозокту иштегени учун бу юбилейлик эҥирде Елена Белеева, Елена Енчинова ла Геннадий Асканаков аймактыҥ администрациязыныҥ Кӱндӱлӱ грамотазыла кайралдаттылар.
25 јыл… мындый кӧп јылдардыҥ туркунына агару бийик учушту "Ар-Башкуш" ӧмӧлик бойыныҥ канаттарыныҥ алдына андый кӧп јиит јайалталар кийдирип, јӱрӱмниҥ јолына аткарган. Нина Колондина, Леонид Карабашев, Юрий Тадышев, Учур Конушев, Рустам Куюков, Виктор Чоков, Раиса Кыдыкова, Геннадий Самаев, Азамат Алимханов – кожоҥчылар, кӱӱчилер, Айдар Дробинин, Айвар Ядомыков ло Виктор Колондин –звукооператорлор, Евгений Белеев-звукорежиссер, Аржана Кыйматова ла Оксана Казанакова -бијечилер, Суркура Танзаева- хореограф- бу ончо ӧмӧликте башка-башка јылдардыҥ туркунына иштеген ишчилер, ол тоодо узак ӧйгӧ администратор болуп иштеген Зоя Михайловна Бадыкина байрамдык кӱнде культураныҥ бӧлӱгиниҥ адынаҥ Быйанду Самараларла темдектеттилер.
25 јыл… јылдар јылыжып, айлар айланып, ӧмӧликтиҥ једимдери де кӧптӧгӧн, туружаачылары да солынган. Мынайып, 2003 јылда, "Ар-Башкуш" ӧмӧлик "Албатылык" деп бийик ат-нерезин корыган, 2011 јылда Сергей Табулгинге ле 2012 јылда Марина Саксаевага Алтай Республиканыҥ нерелӱ артизи деп ат берилген, 2015 јылда Айана Талбаковага Алтай Республиканыҥ культуразыныҥ нерелӱ ишчизи деп ат адалган. Тургуза ӧйдӧ Алтай Республиканыҥ нерелӱ артизи Марина Саксаева башкарган "Ар-Башкуш" ӧмӧликте Айана Талбакова, Татьяна Табаева, Любовь Бебина, Сергей Табулгин, Андрей Альдашев, Сергей Саксаев ле Эдуард Согоноков эрчимдӱ иштегилейт. Олор бӱгӱнги кӱнде јаҥы кожоҥдор бичигилеп, јаҥыдаҥ репертуар јазагылап, калада концерт кӧргӱзип, республика ичиле јорыктаарга белетенгилейт. Кажы ла јаҥыдаҥ келген коо ӱн, јайым кӱӱ ӧмӧликтиҥ јӱрӱмине јаҥы серӱӱн эзин экелип те турза, је јаҥы чагылган јылдыстар ченемелдӱ артисттердеҥ тем алып, узын курчыдып, јылдаҥ јылга бийиктедет. Бу јорык Алтай Республиканыҥ культура министерствозы Татьяна Табаеваны, Эдуард Согоноковты ла Сергей Саксаевти Кӱндӱлӱ грамотала кайралдаганы, аймактыҥ јааны Владимир Челчушев Андрей Альдашевти Улаган аймактыҥ ӧзӱмине јаан камаанын јетиргени учун экинчи степеньду медальла кайралдап, "Ар-Башкуш" ӧмӧликке 50 000 акчалу сертификат сыйлаганы олордыҥ узын недеҥ де баалу керелейт.
25 јыл… ӧй деп немениҥ ӧдӱп турганы агын суудаҥ да капшай эмтир. Бу ла канча јылдар кайра бис ле кожо каткырыжып, кокырлажып, куучындажып јӱрген улустарыс ары кӧрӧлӧ, бери кӧргӧнчӧҥ јаныҥда јок болуп калат. Оныҥ да учун бу байрамдык эҥирде "Ар-Башкуш" ӧмӧлик бир тыныш ла тынып, бир санаа санынып, бир амадуга јӱткиген, је Алтайынаҥ арай ла эрте јӱре берген кожо иштеген јуук нӧкӧрлӧриниҥ ады-јолдорын адап, бут бажына тургылап, эзетти, олор: Юрий Карабашев, Виктор Чанчиев, Александр Сарлаев, Александр Бебин, Клара Иосифовна Енчинова, Василий Ядагаев.
25 јаш… кижи сананза, ол кижиниҥ эҥ ле јиит, ӧктӧм, сӱӱнчилӱ, сакылталу ӧйи болот, "Ар-Башкуш" ӧмӧлик керегинде айдар болзоос, ӧмӧлик 25 јаштуда республикабыс ичинде ады-јары чыккан, канча јылдардыҥ туркунына эл-јонды кожоҥдорыла сӱӱндирген ле ӧскӧ дӧ талаларда ады-јолы макталган јӱрет. Ӧмӧликти 25 јажы толгоныла уткуп келген улус кичинек клубыска толордо, анда бут та тургузар јер јок болгонын темдектеер керек. "Бу качан бирде аймактыҥ тӧс јуртында јаҥы клуб болор бо?"- деп чогулган кӧрӧӧчилер ачынышту айдынгылап турдылар. Је андый да болзо, бу юбилейлик байрам кӧрӧӧчилерге ле айылчыларга андый јаан сӱӱнчи сыйлаган, коркышту бийик кӱӱн-санаа берген. Учуралды тузаланып, аймактыҥ культура бӧлӱгиниҥ башкараачызы Солунай Санаа ла "Ар-Башкуш" ӧмӧликтиҥ башкараачызы Марина Саксаева байрамга ыраактаҥ келген айылчыларга, ады-јарлу кожоҥчыларга Сырга Садрашевага, Радмила Можлаевага, Влад Санашевке, Аржан Найденовко ло Ратмир Танытпасовко, јараш эптӱ костюмдар кӧктӧгӧн кӧкчилерге Кемине Сатуновага ла Раиса Киндиковага, байрамды бийик кеминде ӧткӱрерге болужын јетирген Алена Маиковага, Любовь Кудюшевага, Алексей Тазрановко, Александр Тельденовко ло Батыр Санинге, Чибилӱ, Балыктујул ла Саратан јурт јеезелердиҥ јаандарына, алама-шикирин јайып, кӱндӱӱ-кӱреени јылу айалгада ӧткӱреринде јаан болужын јетирген Светлана ла Максим Олчоновторго акту кӱӱнинеҥ јерге батпас быйанын айдат.
25 јыл… 25 јылдыҥ туркунына "Ар-Башкуш" ӧмӧликтиҥ јайаандык јолында бийик учуштар, кӧп тоолу јакшы солунталар ла јаан једимдер болгон. Артисттердиҥ јӱрӱми тууразында улуска кожоҥ-комут, кокыр-каткыла ӧдӧт деп билдирет, је чынынча айтса, бу кӧӧркийлер кайда ла ӧткӱрмел, кайда ла юбилей, кайда ла байрам болгондо, тӱн де бол, тӱш те бол, бойыныҥ керектерин туура јылдырып, быйанду кӧрӧӧчилерине, эл-јонына кожоҥ- бије сыйлаарга кыйалта јоктоҥ баргылайт. Кандый ла учуралда олор бистиҥ эҥ сакылталу артистерис, эҥ кару кожоҥчыларыс! Слер, Алтайыстыҥ јайым учушту "Ар-Башкуш" ӧмӧлиги, качан да болзо бийик тоомјыда јӱригер, качан да болзо ӧчпӧй, јаркынду јылдыстар болуп кӱйӱгер!