Галина Петровна Малошкина покш семиянзо марто эрьва кизэнть ютавты тиринь велесэ. Ошов сон тусь средней школань прядомадо мельга, ульнесь тензэ 17 иеть.
Велев тетянзо-аванзо туртов сакшныль сеетьстэ, ней пенсиясо ды овсе бу аволь тукшно тестэ, ансяк мирдезэ Николай Алексеевич оште важоди.
Тундонь самонтень авась аноксты эрьва кодамо рассада, а зярдо лембелгады весе ули паронзо усксы велев. Пиресэ тевтне велень азораванть зярдояк а прядовкшныть. Сон кирди теплица, косо касты помидорт, куярт. Нама, кода весеяк, путни модамарть, чурькат, капстат ды зярыя иень перть виноград. Эмежтнень вечки авась консервировамс, сонзэ улить ламо рецептэнзэ, кода пекстамс банкатнень.
Садпирезэ Галина Петровнань емась цеця потс. Лилият, розат, астрат, петуният ды оште зярыя а содавикс цецят. Инжекс бабанстэнь ускизь вишка нуцькинензэ. Кирюшанень аволь умок топодсть вете ковт. Эйкакшось лекси паро коштсо, тесэ сон ванькс.