Ютазь недлясто Ламбаське велень Культурань кудосо ютась кенярксчинь вастовома. Сон алтавсь Я.Я. Кулдыркаевень чачома чистэнзэ саезь 130 иетнень топодемантень.
Истят вастовоматне ды лемень ледстямотне кандыть покш смусть. Ламонь эрзятнень мельс-превс Яков Яковлевич кадовсь кода "Эрьмезь" эрзянь раськеде евксонть (эпосонть) сермадыцякс. Те ломанесь умок уш арась минек ютксо, ансяк те шкас сонзэ ледстнить ды Ламбаськесэ ловить эсест велень содавикс ине ломанекс. Эрямонь меельце иетнень сон ютавтынзе тиринь велесэнзэ, калмазьгак Ламбаське велень калмазырьс. Сюконямо калмонзо лангс ды вастовомо велень эрицятнень марто сакшность Саран ошсто ламо инжеть, ютксост: Е.Е. Ледяйкин – МР-нь Государственной Собраниянь депутат, региональной общественной "Од веле" организациянь прявт; Надежда Бочканова ды Валентина Бояркина – А.С. Пушкин лемсэ республикань Национальной библиотекань важодицят; Татьяна Швецова – поэт, лия кельстэ ютавтыця, МР-нь Писателень союзонь правлениянь прявт, важоди "Чилисема" эйкакшонь журналсо ответственной секретарекс.
Ламбаськень школань тонавтницятне ды авань "Горнипов" ансамблясь анокстасть инжетнень туртов цела паро казне. Сцена лангсто гайгсть эрзянь морот. Васняяк тиринь келень тонавтыцясь Ольга Ивановна Антипова тонавтницянть Яна Сошникова марто евтнизь пуромозетненень эрзянь сермадыцянть эрямонь-аштемань килангонзо.
Чачсь Я.Я. Кулдыркаев 1894-це иень ожоковонь 22-це чистэ Ламбаське велесэ. Эсь велень ушодома школанть прядомадо мейле тонавтнесь Саранскоень реальной училищасо.1912-це иестэ паро эрямонь вешнемга Ламбаськень зярыя эриця марто тусь Сибирев. Важодсь Амуронь чугункань килангсо табельщикекс. 1915-це иестэ саизь войнав, косо стакасто ранязель. Октябрянь революциядонть мейле служась Якстере Армиясо, тюрсь од эрямонь ладямонть кисэ. Аволь весть контузявкшнось. Тень марто велявтськак 1920-це иестэ чачома велев.
Сонензэ ульнесть сестэ весемезэ 26 иеть. Од цераль, одсто лакась перьканзо эрямоськак, ды сонзэ покшоль мелезэ тонавтнемс. 1923-це иестэ мелезэ топавтозель: Я. Кулдыркаевень кучизь тонавтнеме Московов бухгалтерэнь курсав, конатнень прядомадост мейле кадозель тоско важодеме. Юткошкасто сеедьстэ совсесь "Якстере теште" газетань редакцияв. Тосо важодицятнень марто кортнематнень юткова евтнекшнесь тенст эрзянь евкст, легендат, морот, конатнеде содась пек ламо. Ютксост ульнесть истяткак, конатнень ладсесь сонсь. Ерокчинзэ редязь, эрзянь газетань теицятне мерсть тензэ терявтомс вийтнень покш произведениянь сермадомасо. Ды уш 1928-це иень ожоковсто те произведениястонть зярыя саевкст максозельть "Якстере тештесэ". Поэманть лемезэль "Эрьмезь ды Котова".
1935-це иестэ сон лиссь башка книгасо "Эрьмезь" лементь ало. Муевсть раужо ойме, сельмень сявадыця ломанть, конат кармасть сермалеме Я. Кулдыркаев лангс кенгелемань сермат, "Эрмезесь" яволявтозель националистической произведениякс", сермадыцязо – националистэкс. Ды 1938-це иень таштамковсто НКВД-нь "башка совещаниясь" ильтизе Я.Я. Кулдыркаевень тюрьмав. "Эрьмезезэ" саезель библиотекатнестэ, ды 1988-це иес ловныцятненень вестькак эзь пачколе. Сонсь поэтэсь ютась Коми АССР-нь, Новгородонь ды Джамбулонь областень лагертнень пачк. Менсь тосто ансяк комсь иень ютазь, 1958-це иень ацамковсто.Чумовтомо, келя, аштесь… Стяко…
Велявтсь – а семия, а кудот-чить кодаткак, а тев меньгак, а шумбрачи. Лезкс тензэ косояк эзть максо, ды эрямонзо прядовомс трясь прянзо ломань кедьга.
Цидярдсь поэтэсь а кувать, 1966-це иень медьковонь 28-це чис. Аволизь яжаяк эрямонзо, ламо, нама, сермадоволь.
Я.Я. Кулдыркаевень лементь Ламбаськесэ эзизь стувтне зярдояк. Эрьва иестэ ледстнить сонзэ чачома чинзэ. Истя ульсь тедедеяк. Школасо тонавтницятне невтизь "Эрьмезь" поэмасто пелькстнэнь. Эйкакштнэ налксесть истя кемевикстэ, теке мерят састь сеть умонь шкатне…
Велесэ нейгак улить сермадеенть помницянзо. Эсь лецнеманзо евтынзе Р.А. Леушкина. Мельс-превс Кулдыркаев кадовсь пек интеллигентной ломанекс. Натой вишка эйкакштнень икелеяк свал каилизе шапканзо ды шумбракстниль. Оршниль Кулдыркаев аволь кода велень эриця – кувака пальтосо, шарфсо ды шляпасо.
М.А. Атласова, Таразбуень школань прявтось, чачсь-кассь Ламбаськесэ, евтнинзе Кулдыркаевде патянзо ледстнеманзо, эсензэ стихотворениянзо алтызе те чинтень.
Покшчи марто, тиринь велем,
Ламбаське, чачома элем!
Теште кирвайсь минек пеле
Кенярксось ливти менелев!
Ламо инжеть седейшкавань,
Ки районсто, шабра енкссто,
Саран ошсто, эрьва косто
Кода озатясь эрзятнень
Пурнымизь тей сермадеесь,
Васов ливти сонзэ лемесь.
Церась ульнесь пек ероков,
Мерильть тензэ Ягрань Яков.
Кулдыркаев, лиякс, Ягрань,
Монгак, ялгат, секе таркань.
Куншкакуронь, Миша атянь.
Тесэ касынек минь, тякакс:
Репештява, садга яказь,
Лей чирева, ведьга паказь,
Веселасто налксезь, раказь,
Ламо эйкакшт школав якасть.
Кадык шкась мерильть, прок, стакаль;
Ансяк сестэ эзь явово.
Велесь эрясь, велесь лакась
Ламбаськесь икелев бажась.
Кода шкась куроксто ютась!
Ней мон эрян аволь тесэ
Важодян лия таркасо.
Ансяк меревлинь мон вейке:
Зяро шка илязо юта,
Зняро ведь илязо чуде
Тиринь велесь, чачма элесь
Свал седейсэнь, свал оймесэнь
Эжди, тонавты ды ванны
Прок, тиринь ава мельганок.
Покшчи марто, тиринь велем!
Ламбаське, чачома элем.