Кажне ийын июнь тў‰алтыште Корамас кундем шке патыржым шарныме пайремым эртара.

Ий еда тудо тўрлє "сыным" налеш. Лийын спектакль сынан, Чоткарын илыме жапыш пєртылтышє мероприятият, чапланыше землякышт дене вашлиймашат пайдалын эртен, научно-практический конференций годым самырык тукымлан арален кодымо калык йўла, пайрем, модыш нерген каласкалыме.

Тений Чоткар патырын каныме верыштыже (тушан шарныктыме кўм шогалтыме) кумалмаш эртен. Тудым Корамас да Юлсер кундемнан онае‰же А.А.Федоров ден Усола Корамас гыч чимарий йўлам жаплыше Г.П.Александров эртареныт, патыр онна, Пўртўс ава деч мланде поянлыкым, чапле шурно лектышым, айдеме-влак коклаште келшен илымашым, колхоз, туныктымо да тўвыра пашалаште тўвыргє саскам йодын кумалыныт. Кумалтышыш толшо-влак поснак Чоткар он деч йўрым кондаш йодыч. Кокымшо тылзе йўр уке: ўдымє-шындыме саска вийым поген огеш керт.

Чоткар лўмеш пайрем Кугу Корамас школын стадионышто лие. Кумалмаш гыч мє‰геш пєртыл толмылан верысе тўвыра пєрт пеленсе коллектив концерт программым тў‰алын ыле. Тыгак шке мастарлыкыштым йоча-влак ончыктеныт. Пайремын тў‰жє – Чоткар патырын призше верч ўчашымаш. Тушто районысо призыв деч ончычсо рвезе-влак та‰асышт. Тў‰ шотышто нуно спортын капкылым вия‰дыше видлаште шке пе‰гыдылыкыштым тергышт. 40 рвезе кокла гыч эн шуко очком Евгений Кириллов погыш. Кажне та‰асымашыште тудо ончылно лийын. Тыште єраш нимолан, молан манаш гын рвезе спорт дене пе‰гыде кылым куча, кажне кечын тренировкыш лектеш, Усола Корамасын курыкан вер-шєрыштє куржталын, кид-йолжым пе‰гыдемда. Тений Евгений кугу се‰ымашке шуын – республикысе чыла гаяк та‰асымаште икымше але призовой верлаш лектын, Российын чемпионатыштыже се‰ен, июльышто Францийыште эртыше Европын чемпионатышке Российын чапшым аралаш кая. Кугу Корамас школлан, Юлсер кундемлан тиде – кугу се‰ымаш. Кызыт Женя тушто достойнын выступатлаш ямдылалтеш. А Чоткарын икымше призше тудлан логалмылан єраш нимолан: Корамас кундемыште Чоткар гаяк тале, пе‰гыде, пашам да шочмо мландым йєратыше калык ила – нуно Чоткарын тукымжо улыт. Тиде оем пе‰гыдемдыш школ стадион йыр кушшо куэрлаште почмо сўрет выставке. Тудым Чоткар гаяк тале, Кабаксолан эргыже Владимир Андреев почын.

– Художник-любитель улам, – палдарыш шкеж нерген Владимир Алексеевич. – Эше школышто тунеммем годым рисований дене туныктышо Николай Никифорович Эпаевын пашажым шымлем ыле. Тунам туныктышо-влак, марий спектакль-влакым ямдылен, сценыште шындат ыле. Мылам о‰ай ыле: "Мўкш отарлан", мутлан, могай декорацийым ямдыла, "задниклан" могай сўретым "пышта". Варажым шкежат вия‰ым, кидем лывыргыш. Консультант полышым землякем Иван Михайлович Ямбердов пуэн шога. Эсогыл пырля сўрет ончерым Йошкар-Олаште эртарышна. Тудо "От А до Я" маналтеш, але "Андреев гыч Ямбердов марте". Корамас кундемыште тиде икымше ончерем.

Владимир Андреев, профессийже дене чо‰ышо, шўм-кылже дене сўретче, марий ялын телымсе ковыражымат пашашкыже пышта, натюрмортымат воза. Икманаш, пўртўсын вашталтмыжым, сылнылыкшым ужын мошта. "Тыге ужаш туныктышем-влак туныктеныт да туныктат", – шыргыжале шкеже.

Мутат уке, коллегыжын пашажым аклаш, Чоткар патырлан вуйым савалташ, пошкудыжо-влак дене ужын-кутыралташ Иван Ямбердов шкежат толын ыле.

Корамас кундем – талантлан поян кундем. Морко вел сылнымут мастарже-влак дене кугешна гын, тышеч сылнымутчыжат, мурызыжат, сем возышыжат, медициныште кугу чапым налше-влакат лектыныт, эсогыл Социалистический пашан геройжо лўмым нумалше сталеварыштат уло. Тидын нергенак пайремыш толшо-влакым саламлен каласышт район администраций вуйлатышын алмаштышыже В.И.Сергеев, Корамас ял шотан илем вуйлатыше Б.В.Николаев да онае‰ А.А.Федоров.