Андрейвелень кавксо иесэ школасо вейке классо тонавтниця ялганок марто вастоматнестэ (прядынек 1978 иестэ) свал ледстнетяно сеть тонавтыцянок, конат кадсть оймезэнек мельспаро тешкс.
Сон пек неявикс творческой ломань, конань ульнесь пейдемань покш ёжомарямозояк, кода мерить, юмор марто ломань. Секе марто, кеме обуцяль. Маштыль кардамост шалнозезь эйкаштнень истя, мик те кардамоськак сынест марявиль чевте седейстэ молицякс, чарькодевиксэкс, сонгак кандыль тенст содамочинь тонавкс.
Валентин Степанович Ине Отечественной войнань участник.
Зярдо войнась ушодовсь, цёрантень ульнесть 18 иеть. Якстере Армиясо чавозь военнослужащейтнеде сведениятнесэ невтезь: 1941-1945 иетнестэ сехте ламо чавозельть 1921-1923 иетнестэ чачозь цёраломантне. Сынст шкань чачозь ломантне лововсть ёмазь поколениякс.
Валентин Степановичнень прась уцяска кадовомс живстэ. Зярыяксть ранязель, витнесть шумбрачинзэ госпитальсэ. Казезель Отечественной войнань 2 степенень орденсэ.
Войнань иетнень стакачитнень ды покш кажонть сон бажась невтемс миненек эрзянь писателенть Кузьма Григорьевич Абрамовонь произведениянзо вельде.
Уроконь перть свал ютавтокшныль авторонть "Качамонь пачк", "Найман" ды лия книганзо марявиксстэ ловноманть.
Оштё Ташто Чамзань школасо ушодома классо тонавтнемстэ пек кеместэ совась мелезэнь, кода Андрейвелень клубонь самодеятельной театрась невтизе "Эрьванть эсензэ ормазо" пьесанть.
Ульнинь покш мельспаросо актёртнэнь, велень простой важодицятнень, пек вадря налксемадост. Весе паро мельсэ пейдинек пьесань геройтнень лангсо, зярдо сынь понгонесть пейдстевтиця ситуациятнес. Вана се шкастонть саезь, монь оймес сась театрантень вечкемась, конась а ютакшны ды эри потсон нейгак.
Зярдо мон сынь тонавтнеме Андрейвелень школань нилеце классос, карминь содамо: те самодеятельной театрань, конанень шкань ютазь максыть "народной" лементь, режиссёрокс ульнесь эрзянь келень ды литературань тонавтыцясь Валентин Степанович Малюков.
Те сон ливтинзе сцена лангс ды тонавтынзе актёронь тевентень дояркатнень, механизатортнэнь, учительтнень. Те сон кармавтынзе сынст вечкеме театрань творчестванть.
Лиякс, театрань тевенть апак вечке, а кода улевель тенст муемс шка кудонь ды важодема таркань певтеме тевтнень кадозь, сакшномс репетицияс ды сцена лангсо налксемас.
Эряви ёвтамс, истямо театрань коллективесь, кона невтни пьесат эрзянь кельсэ ды канды "народной" лементь, минек республика -
сонть вейкине.
Ютасть малав 60 иеть васенце постановканть шкастонзо, театрась жо эри.
Валентин Степанович ульнесь эсь тиринь велензэ покштояк покш патриот. Сон пурнась Андрейвелень ломантнень пельде фольклоронть, сёрмадынзе эрзянь свадьбань коенть, моротнень, урнематнень. Сонськак ламо сёрмадсь эрзянь кельсэ. Тонавтыцясь бажась вельмевтемс тиринь келентень вечкема, невтсь сонзэ мазычинзэ, домкачинзэ аволь ансяк тонавтниця эйкакштнень ойметнес, велесэ эрицятнененьгак. Сон кадсь валдо ды паро тешкс тонавтницянзо седейтнес.