Эрзянь раськень койтнень-кирдатнень, келень ванстомань ды кастомань-кепетемань Фондось, сонзэ ветикуронзо прявтось Т.И. Ларина тердекшнымизь "Пизёлнэ" ансамблянть марто А.С.Пушкинэнь лемсэ Hациональной ловнома кудосо "Эрзянь келень чинть" тештямо.

Мон аволь весть ульнинь истямо кенярксчисэ. Ламот жо юткстонок – васенцеде. Аватне талность, мезе мартост саемс. В.М.Кондратьева пансь пек покш каймака, пуштась алт. Т.В.Бочкарёва тейсь лапшовник. Эрьвась юткстонок мезе-бути ды анокстась. Покшчис сакшность инжеть Мордовиянь буетнестэ, Самарань, Пензань ды лия ёнкстнэстэ – общественной вейсэндявксос совицят, морыцят, тонавтыцят, тонавтницят. Паро ульнесь неемс сыцятнень ютксто минек Покш Игнатова ёндо ломанть: А.Н.Барговонь, А.С.Сонаевень, Г.Д.Мусалёвонь.

Вана кирвазтевсь покшчинь штатолось. Экранстонть келенек ванстомадонть корты Д.В.Цыганкин профессорось (сон кулось ютазь иестэнть). Юткстонок туезь эрзятнень лемест кундамга яволявтозь чатьмонемань минута.

2024 иень Анатолий Павлович Рябовонь лемсэ Казненть ды Лауреатонь лементь максызь В.С.Брыжинскийнень. Василий Сергеевич эрзянь содавикс театровед, режиссёр, сёрмадыця. Сон кувать важодсь телевидениясо, университетсэ, ульнесь Раськень культурань факультетэнь васенце деканокс. Сёрмадсь наукань ламо важодевкст минек раськень театрадонть, налксематнеде. Нолдась зярыя книгат. Ютксост колмо томсо "Каргонь Кинь ломанть" сагась, кона ютавтозь рузонь кельскак. Василий Сергеевич – МАССР-нь ды Россиянь культурань заслуженной важодиця, Мордовиянь Государственной премиянь лауреат. Весе кадовсть покш мельспаросо те кулянть марямга. Сонсь лауреатось эзь саво, шумбрачинь лавшочись эзизе нолда (90 иеть!). Мерезель: Лауреатонь дипломонть ды Казненть усксызь тензэ кудос.

Кенярксчись ютась лембестэ ды парсте. Кадовинек покш мельспаросо. Морынек ниле эрзянь раськень морот. Марявсь, ламонень минь пек вечкевинек. Вадрят ульнесть кенярксчинь ветицятне: Людмила Рябова ды Николай Карпов (сон мороткак морась). Маринек вечкевикс Анна Атласовань, Андрей Бочкановонь морамост. Кунсолынек эрзянь стихть, конатнень ловность эйкакштнэ ды покштнэяк. Панжозельть кортамотнесэ раськенек мелявкстнэяк. Пек вечкевсь ламонень Маризь Кемалень кортамозо…

Ускинь тосто монень казевть Юлия Мамаевань поэзиянь од пусмонть, конань авторось тень пачтявтызе. Пек кецинь тенень.

Оймем пештизь умонь ялган марто сеть вастоматне, конатне лиссть кенярксчисэнть, сынст марто кортамось. Тосо гайгсь ванькс эрзянь кель! Ды мик мелявкстнэяк тиринь келенек уцяскадонзо зярс-бути те шкастонть айгекшнесть ве ёнов.

Ёвтан сюконямонь валт Т.И. Ларинанень тердеманть кис, минек Покш Игнатбуень администациянь прявтонтень Т.Н. Полозованень, сонзэ лездыцянзо туртов Т.М. Кирееванень ды Тутуркин Володя шофёронтень те покшчинтень пачтямонть кис.

Эряк, вечкевикс эрзянь келем! Уледе шумбрат, эрзянь ломанть! Свал эрязо эрзянь раськем!