Мейле, 100 иень топодема иестэнть - 1994 иень чадыковонь 16-це чистэнть, Анатолий Павлович Рябов профессоронть чачома чистэнзэ, сон яволявтозель весе эрзятнень покшчинь ютавтомань чикс.
Тедеде А.П.Рябовнень топодевельть 130 иеть. 2024 иесь яволявтозь кудораськень – семиянь иекс. Арсетяно, тедедень праздникенть эрзятне кармить теемензэ эсест семиясосткак.
Минек "Восходось" эрьва иестэ невтни, кода районсонок, велесэнек ютавтневи те покшчись.
Анокстазь те чин тень, минь путсынек ловныцянок туртов ловномс икеле иетнестэ сёрмадозь ды се шкатнестэ печатазь школасо тонавтницянок эйкакштнэнь эрзякс сёрмадозь ёвксост. Содазь, сеть тонавтницятне уш сынсь ней покш эйкакшонь тетят-ават! Ялатеке, сынст шкинемаст (творчестваст) невтемась ули тенек мельстуиця ловномакс.
Кода теевсть неть ёвкстнэ? Сеть шкатнестэ эйкакштнеяк седе парсте кортыльть эрзякс, мон школасо ветилинь кружок "ТЕШТИНЕ", минь пурнакшнынек кедьсэ сёрмадозь журнал истямо жо лем ало. Нолднешнинек мик газета
"АРСЕВКСКЕ- ЮТАВКСКЕ", козонь путнинек тонавтницятнень ёвксост, стихест кавто вариантсо (эрзякс ды рузокс). Васняяк, ванкшнынек сынст классо, косо тонавтнесь авторось, ды эрзякс теезенсенть вейсэнь вийсэ ютавтынек рузонь кельс, рузокс теезенсенть – эрзякс. Автортнэ сынсь артыльть артовкс (рисунок) эсест ёвкстнэнень. Сеть шкатнестэ сеедьстэ неть ёвкстнэ печатазельть и "Восходсо", и "Чилисема" журналсонтькак. Невтемга, 2002 иень 1-це номер журналсонть печатазельть мик 10 Покш Игнатвелень школасо тонавтницянь ёвкст!
Мельстуиця ловнома тенк, вечкевикс ялгат! Кадык зярдояк а ёми минек мазый эрзянь келенек!
Цеця потмонь тейтерне
Эрясть-аштесть мирде ды ни. сынст эйкакшост. Вана весть мирдесь тусь лия ошов важодеме, ярмаконь мельга. Нись вечкиль цецянь кастомо. Косто неи мазый цеця, эстензэяк озавты. Мольсь сон шабрас ды несь тосто пек мазый цеця. Вешсь сон азораванть кедьстэ цецянь тарадке, кандызе кудов ды озавтызе кедьгес.
Касы цецясь вальма лангсо. Теевсь эйзэнзэ цецянь сюлмавкске. Авась седеяк парсте цецясонть валны. Ансяк мекс-бути кувать сон а панжови.
Кармась авась редямо: кудозо валске вельть ванькс, теке кие-бути уряды эйсэнзэ. Мари авась, теке кие-бути веть стыли, кашторды. Паряк, те онстонзо, арси авась.
Весть сон мадсь, кода свал, ансяк а уды, учи, мезе ули… Пелевене цецясь кода-бути валдомгадсь, потстонзо кармась марявомо салавань морамо. Цецясь панжовсь, ды тосто лиссь вишка лопинешка тейтерне. Валгсь сон цецянь кувака недькскеванть масторов ды кармась касомо. Теевсь покшокс. Сайсь кедезэнзэ пацине, тенсть – кармась кудонь урядамо. Удомонь нупаленть тенсизе, пуленть нардтнизе ды тусь лия комнатас. Тейтерненть эйстэ моли сияждыця валдо, сонсь моры кодамо-бути морыне.
Часонь ютазь тейтернесь сась таго вальманть малас, теевсь вишкакс, кузсь вальманть лангс ды ёмась цецянть потс.
Авась кармась учомо пелеветнень, зярдо тейтернесь лиси цеця потсто. Сонсь яла арси: мезе теемс, кода тейтерненть кадомс эрямо кудос чинь эрямосо.
Учизе авась, зярдо тейтернесь туи лия комнатас, ды ёртызе цеця марто кедьгенть уштозь каштомс. Ваны: чуди тосто кодамо-бути сияждыця ведь ды качады эйстэнзэ тантей чине.
Чийсь тейтерькась ды кармась авардеме:
- Вай, тон мезе теить, авай, кавто чить ансяк кадовкшность учомс, дым он свал улевлинь мартонк. Ней жо сы Сыре Вардась ды сайсамам монь эстензэ.
Авась кармась арсеме, кода манямс Сыре Варданть. Сон сайсь покш чамаварчамо (зеркало) ды путызе совамонь кенкшентень. Ушосто неяви, теке кенкшесь панжадо.
Ваныть вальмава: Сыре Вардась чии покш рицяга (дубинка) марто.Чийсь малав, неизе чамаварчамостонть эсь прянзо рицяга марто. Арси: кие истя эйсэнзэ васты. Кода рицягасо вачкодьсы! Колавсь чамаварчамось, покш пельксэсь лазызе Сыре Варданть видьстэ седейс. Прась сон ды кулось. Авась чувсь латко ды калмизе тозонь Варданть, ёртынзе тов чамаварчамонь пелькстнэньгак. Шкань ютазь калмонть лангс кассь пурьгинепалакс.
Кадовсь тейтернесь эрямо аванть марто. Путсть тензэ лем Цецяня. Курок мирдеськак сась ошсто, ламо ярмакт усксь. Пек кецязевсь, зярдо неизе Цецянянь.
Даниил Наумов
Цёрыне-толнэ
Эрясть-аштесть атят-бабат кавонест. Арасельть сынст эйкакшост. Бабась кода ансяк пазнэнь эзь озно, мезеяк тензэ эзь лезда. Сыредеме кармасть, эйкакшост яла арасть.
Весть, Роштувань каршо, кармасть сынь ташто оршамопелень ды карсемапелень пултамо, кирнявтсь толонть потсто вишка цёрыне ды корты:
- Мон улян тенк цёрынекс, тетяй, авай!
Пек кецязевсть атясь ды бабась. Эрить колмонест. Толнэсь лезды тенст кудонь тевтнесэ. Сехте парсте сонзэ лисниль ярсамопелень пидемась. Кодамо тантей ярсамопельть анокстыль сон тетянзо-аванзо туртов!
Кизна Толнэсь вечкиль вальмава ваномо ушов. Ваны весть сон вальмава: тосо сондензэ покш эйкакштнэ чийнить пиземе алга, налксить. Толнэсь энялды:
- Нолдымизь моньгак ушов куш пельминутас, мон зярдояк эзинь нее пиземе ды а содан, кодамо сон.
Атясь ды бабась нолдызь сонзэ ансяк пельминутас.
Лиссь Толнэсь ушов, чийнесь пизементь алга пельминута ды уш велявтыксэль кудов. Неи: колмо иесэ вишка цёрынесь прась ведьс ды аварди. Толнэнь седеесь эзь кирдеве, кармась сон цёрынентень лездамо, таргизе ведьстэнть. Ансяк сонсь мадсь, ёмась.
Кувать авардсть ды мелявтсть мельганзо атясь ды бабась, ансяк сельведтне цёрыненть эзизь велявто.
Артём Ерзамаев
Салыця ломаньды сонзэ цёразо
Эрясь салыця ломань цёранзо марто. Сон эрьва чистэ якась саламо. Цёразо аштиль кудосо.
Весть пиземе алга, зярдо салыцясь кудосо арасель, совась тензэ ломань ды вешсь кедьстэст пиземеде вельтявкс.
Цёрась макссь тензэ зонт.
Сась кудов тетясь. Сон сялгавтызе цёранзо:
- Мезекс тон максык тензэ зонтонть? Эряволь меремс те ломанентень, зонтонть тетям саизе мартонзо.
Лия чистэ, теке жо шкастонть, сась тенст ава ды веши цёранть кедьстэ сараз покш чис пидемс. Цёрась мери:
- Весе саразтнэнь саинзе мартонзо тетям. Авась тусь. Сась кудов салыцясь. Таго сёвны цёрыненть:
- Мезекс тон истя мерить? Ков мон саразтнэнь сайсынь? Эряволь меремс тетям весе саразтнэнь бедной ломаннень явшинзе.
Зярыя чинь ютазь, теке жо шкастонть, састь салыцянтень эйкакшт. Сынь кандсть тетянзо пельде прякинеть.
Цёрынесь мери тенст:
- Явшинк прякинетнень бедной ломантненень!
Лена САПАРЕВА
Нузякс ялакст
Эрясть-аштесть атят-бабат. Сынст ульнесь Эрьгела тейтернест ды колмо цёрынест. Цёрынетне ульнесть нузякст ды лавшот. Мезеяк а теить а кудосо, а пиресэ, а кардазсо. Эрьгела жо ульнесь и мазый, и виев, и важодиця. Чинь-чоп тейтересь тевть тейни: вирьстэ пенгть кери-уски, паксясто тикше леди-канды, кудоютконь тевтнень теи, ялакстнэнень сты-викшни оршамот, весень лангс муськи-чови…
Эрясть сынь аволь кажовсто, ярсамс ульнесь мезде. Ансяк арасель скалост. Эрьва базар атясь моли скалонь рамамо, но ванна уш зярыя иеть, кодаяк а муи рамамс скал. Цёрынетне вешить ловсо, бабаськак вечки чапамо ловсо, атяськак топодо ярсаволь…
Весть, кизэнь чистэ, атясь карть кодыль, бабась пандят кочкиль, ялакскетне налксильть, Эрьгела тусь вирев банятенсть мельга.
Марить ялакстнэ: кудост вакссо скал пары. Лиссть кудостонть весе ушов. Кодамо вадря ды справна скалось! Сон сонсь совась видьстэ кардазс. Весе абунгадсть. Сайсь бабась ведра ды мольсь потявтомонзо. Пельведра ловсо потявтсь бабась. Совась кудос – андынзе весень ловсодо. Чокшнэ таго скалонть потявтызе.
Ней семияст эри скал марто. Ансяк ёмась Эрьгела патяст-тейтерест. Эзь са сон вирьстэнть. Вешнесть-вешнесть, учость-учость эйсэнзэ – арась.
Скалось чиде чис максы яла седее ламо ловсо, чить тукшны сонсь вирьга-паксява якамо, тикшеде-лугадо порнеме. Весе кудонь, семиянь тевтнень ней савсь тейнемс цёрынетнененьгак.эрьгела патявтомост кудосонть нусманя. Сон тенст мезеяк ёвтневель, мартост налксевель…
Весть пурнавсть вейс цёрынетне ды кармасть Эрьгелань ледстнеме. Сехте вишкинесь юткстост мери: "Мон скалонтькак максовлия, ансяк саволь мекев тенек Эрьгела патянок". Лия ялакстнэяк кармасть истя кортамо.
Марить, теке кие-бути вачкодсь сынст кенкшес. Лиссть ялакстнэ кудостонть, ваныть: Эрьгела икелест ашти, прок эзь туекшне ковгак. А скалось кардазсто ёмась.
Ялакскетне ней кармасть весе марто вейсэ важодеме, виевгадсть.
Аламо шкань ютазь атясь мольсь базаров ды рамась тосто паро шумбра скал.
Дмитрий Борисов