Таче марий лаштыкыштына лудшо-влакым М. Шкетан лӱмеш марий драме театрын самырык артистше дене палымым ыштена. Немда кундемын талантан эргыже Иван Соловьёв дене вашлийын мутланаш шонымаш шукертак лийын. Кодшо арняште тиде шонымаш шукталте, мутланаш пиал шыргыжале. 19 апрельыште У Торъял рӱдӧ книгагудо пашаеҥ-влакын ӱжмышт почеш М. Шкетан лӱмеш марий драме театрын У Торъял район гыч лекше артистше-влак Светлана Строганова, Иван Смирнов да Иван Соловьёв унала толын, калыкым шке мастарлыкышт дене куандарышт. Тидын дене пайдаланен, вашлиймаш деч вара изиш жапым муын, ме самырык, но шке талантше дене калык коклаште йӧратымашым, пагалымашым сулен налше артист дене кӱчыкын мутым вашталтышна.
Немда кундем артист, писатель, моло палыме да талантан еҥ-влаклан поян. Кызытат шке шочмо верыштым чапландарыше еҥ-влак шагалын огытыл. М. Шкетан лӱмеш марий драмтеатрыште таче кечын Василий Домрачев, Олег Кузьминых да Иван Соловьёв спектакльлаште тӱрлӧ рольым чоҥен, ончышо-влакын чонышкышт шукертак корным такыртеныт.
Иван Соловьёв театрыште кум ий веле тырша гынат, спектакльлаште тудлан тӱҥ рольым ӱшанат, да тиде ӱшаным тудо шке мастарлыкше дене пеҥгыдемда. Мутлан, Н. Арбанын "Тулар ден тулаче" спектакльыште Иван Вадимын рольжым моштен чоҥа, С. Чавайнын "Элнет" драмыште Сакарын рольжым модеш. А гитарым пералтен муралтымыжым шулен колыштат.
- Иван, артист лияш шонымаш кузе шочын?
- Артистше лияш мый шоненат омыл. Тунеммем годым школыш Василий Валерьянович Домрачев толын. Мыйын авам школышто туныктышылан пашам ышта, сандене Василий Валерьянович шке туныктышыж деке толын мутланен, мыйым артистлан тунемаш колташ темлен.
Москвасе М.С. Шепкин лӱмеш кӱшыл театральный училищыш тунемаш пурымо деч ончыч Йошкар-Олаште кум турым эртенам. Москва гыч преподаватель-шамыч толын, ончыкылык студент-влакым ойыреныт. Тушто ме кажныже шке моштымашнам ончыктенна: басньым лудынна, муренна, куштенна. Театральный училищыште ныл ий тунемме деч вара М. Шкетан лӱмеш марий драмтеатрыш толынам.
- Икымше гана кугу сценыш кунам лектынат?
- Шкетан лӱмеш марий драмтеатрыш толмеке веле. Тунемме годым ме изи сценыште выступатленна. Дипломный спектакльым ончыктенна, но тиде кугу сценыште лийын огыл. Тунемме годымак ме спектакль дене республикысе яллаште выступатленна, тӱрлӧ районлаште лийынна.
- Театрыш толмеке, калык ончыко могай спектакль дене лектынат, кӧн рольжым чоҥенат?
- Икымше спектакль Николай Лесковын "Левша" пьесыж почеш шындыме "Русский секрет" маналтын. Тиде мемнан диплом спектакльна лийын. Тушто мый Левшан рольжым модынам. Тиде кугу сценыште икымше ролем лийын.
- Театрыш толмеке, чылаже мыняр спектакльыште рольым чоҥенат?
- "Ончыко" журналын тӱҥ редакторжо Игорь Поповат мутланымаште тиде йодышым пуэн ыле. Тудын дене ме 15 наре рольым шотлен луктынна.
- Кум ий жапыште 15 рольым модат?
- Туге.
- Нунын кокла гыч чонетлан кудыжо лишылрак?
- "Русский секрет" гыч Левшаак ала-кузе шӱмыш логалын. Икымше кугу роль чонышто кугу кышам коден. Эн келшыше роль.
- Тыят, Станислав изатат сылне, мотор, йоҥгалтше йӱкан улыда. Тукымыштыда эше мурышо-влак улыт мо?
- Ачамын тукымышто чыланат мурызо-влак улыт. Йыван кочам гармонь, балалайке дене шоктен. Мила кокам баян дене шокта, мура.
- Искусство пашаште шке туныктышетлан тый кӧм шотлет?
- Чынжым ойлаш гын, ме кажне еҥ деч мом-гынат налына, нунын деч тунемына. Посна туныктышо уке. Мемнам пашаште муренат, куштенат моштыман, актёр койыш-шоктышым ончыктыман. Мыйын шуко преподаватель лийын, кажныже мемнам артист семын шуарымаште шке надыржым пыштен, сандене иктаж-кӧм посна ойырен ом керт.
- Спектакль дене Марий Эл деч ӧрдыжкӧ лектын кошташ логалын?
- Да, спектакль дене Озаҥ, Шупашкар олалаште лийынам.
- Сценыште тыйым ужын, артист паша тылат чонлан лишыл, йӧратыме гай чучеш...
- Кеч-могай пашаште тӱрлыжат лиеда. Мый тиде пашалан тунемынам, сандене тудо йӧратымыш савырнен.
Теве тыгерак кӱчык мутланымашна эртыш. Немда кундемын талант памашыже ок кошко, тудо утыр шолын, талышнен йога. Ончышо-влакын шукыштын Иван Соловьёвын сценыште модмыжым ик гана ужын, тудын мурымыжым колын, вес ганат ончаш кумылышт лектеш. А кӧ тудын артист пашаж дене палыме огыл гын, театрыш миен толын, сымыктыш тӱняш омсам почын, чон дене каналташ жапдам ида чамане.
А самырык артистлан шуко йӧратыме рольым, калык пагалымашым, ончышо-влакын шокшо кидсовышыштым тыланена.