На Всероссийской дистанционной олимпиаде по эрзянскому языку две ученицы Подлесно-Тавлинской основной школы заняли первое место.
Омбоце ие Вирь Тавла велень школань тонавтницятне пелькстасть эрзянь келень коряс Россиянь келес дистанционной олимпиадасонть, конась алтави эрзянь букварень васенце сёрмадыцянтень Авксентий Филиппович Юртовонь туртов. Тедеде кармавтоматнень топавтсть Ерошкина Анастасия, кавксоце классонь тонавтницясь, ды Аверьянова Алина, вейксэце классонь тонавтницясь.
Олимпиадась явови кавто пельксэв: очной ды заочной. Максозь кармавтоматне теевсть заочной пелькссэнть. Сынь аштесть "А", "В" ды "С" пельксстэ. Сехте стакакс, паряк, марявсь С пельксэсь, косо эрявсь ютавтомс эрзянь кельс "Масторава" эпосстонть саевкс. Эрявикс валсо эрявсь пачтямс Тюштянь образось. Истямо тевенть вадрясто теизе Алина Аверьянова.
Тесэ жо кармавтозель сёрмадомс сочинения "Эрзянь келесь монь эрямосом" теманть коряс. Тонавтницятне ёвтызь мелест тиринь келенть ванстомга ды а стувтомга. Вана кодамо мельсэ корты теде Алина: "Эйкакштне, зяpдо сынь совить вийс, сынь туить чачома кудосто, лиясто, истяяк эрси, тиринь велестэяк. Но ков бу сынь а туевельть, кона ёнов бу а "ливтявольть", сынь эсь мартост сайсызь тиринь келентень вечкеманть, штобу эрзянь келесь гайгевель, штобу сонзэ эйсэ "чоледевельть" сеть, кить эсь пряст ловить алкуксонь эрзякс".
Колмоце тевекс те пелькссэнть мерезель сёрмадомс апокшке ёвтнема артовксонь коряс. Вана косо тонавтницятне макссть оля эсест арсематне-нень! Аволь эрьва покшось чарькодевель, мезе жо арсесь ёвтамс артыцясь. Эйкакштне те тевентькак топавтызь пек парсте. Настя Ерошкинань ёвтнемась лиссь покш смусть марто. "…Ды вана Ривезесь эцизе кувака нерензэ Чеерненть мельга ды анок уш ульнесь разедемс кенгелицянть, кода друк… Пизэстэнть лиссь … Овтось. Ривезесь прянь полдань синдезь напустясь, удалов апак вано. Чеернесь прась кунст ды пекень кундазь ракась вирень "сехте ёжовонть ды виевенть" лангсо.
Истя вишка Чеернесь "тонавтызе" прянь шныцянть. А стяко корты эрзянь содавикс валмеревксэсь: "Иля кеме вий лангс, кемть прев лангс".
Весе кармавтоматне ульнесть топавтозь. Кавонест тонавтницятне пурнасть эрявикс баллт, мезень кисэ сыненст максозель васенце тарка.