Сынь ладсесть ламодояк ламо ёвтамот, легендат, ёвкст, морот, валмеревкст, содамоёвкст, нурька морынеть, конатне пачкодсть минек шкас. Эйдесь эрямонь васенце читнестэ саезь марясь аванзо пельде нурсемань морот, сырькаензэ пельде – ёвкст, а касозь – оянзо марто морась нурька морынеть.

Эрзянь устной творчествадонть, сонзэ мазычиденть Мурань велень эйкакштнэнень ёвтнесть "Сюлгамо" фольклорной ансамблянь аватне. Велень клубсо ютавтозель "Эрзянь ярмонка" лемсэнть фольклорной вастовома. Минь, библиотекань ды клубонь важодицятне, невтиник эйкаштнэнь туртов, кода эрзянь ломантне икеле пуромкшность ярмонкав. Сцена лангонть мазылгавтынек кезэреньшкань коряс: столенть лангсо кши, сал, поза – раськень ярсамопельтне, вакссост – сёвонень чакштнэ. Седе ве ёно нупальсэнть аштесь эрзянь оршамопелесь, маласонзо – суретне, кодамосо икеле викшнесть тейтертне-аватне. "Сюлгамо" фольклорной ансамблянь аватне морасть мазый кувака эрзянь морот. Покшчисэнть марявсь кезэрень ярмункань кошт.

Арсян, те вастовомась стяко эзь юта. Теде кортасть эйкакштнэнь сельмест ды докачист. Кодамо мельспаросо сынь кунсолость минек ёвтнеманок, моронок ды кода бойкасто макснесть каршо вал эрьва содамоёвксонтень, конань минь сынст туртов анокстынек.

Истят фольклорной вастовоматне лездыть эйкакштнень туртов седе домкасто содамс минек раськень историядонть, эрзянь койтнеде-кирдатнеде. Мон кеман, минек келесь зярдояк а еми, карми эрямо ды ютамо пингеде пингес, а мартонзо а ёми минек эрзянь раськеськак.