Николай Иванович Мастин путови сеть ломантнень юткс, конатненень эрзя-мокшонь культурась аволь чаво гайть. Чачома масторонь культуранть домка ды келей чинзэ, сон неи чувтосто керсезь налшкесэ, артовкссо, стихсэ. Сынст лангс ванозь, ловнозь алкукс несак те мазычинть. Васняяк те парочись оймесэнзэ, пря удимсэнзэ, конась кирди ламо паро ды зыянов лопат эрзятнень ды мокшотнень историястост, косо тешкставсть раськензэ, малавиксэнзэ эрямо пингест.
Эйзюрковонь 20 чистэ Кочкурбуень Раськень культурань ды ремеслань куншкакуросо ютавтозель кенярксчи. Алтавсь сон содавикс аволь ансяк Мордовиясо, мик Россиянь томбалеяк чувтосто керсицянтень, танавтыцянтень Николай Иванович Мастиннэнь. Те ковстонть сонензэ топодсть сисьгемень иеть. Тешкстамс сонзэ чачома чинть пуромсть ламо ломанть, эйкакшт. Кочкурбуень прявт библиотекась анокстась литературань выставка, косо быжицятненень невтезельть книгат ды журналт, Николай Мастинэнь эрямо пингедензэ, шкинемадонзо. Керш пеле эйстэнзэ – чувтонь налшкеть. Вакссост столь экшсэ эйкакштне керсесть овтынеть, лишменеть, кечть ды седе тов. Покш мельсэ, палыця сельмсэ вансь лангозост содавикс керсицясь. "Паро! Пек паро!", – кецязь кортась Николай Иванович.
Лембе валонь евтамодо икеле, весенень невтезель аволь покш кино "Чудак из Подлесной Тавлы", кона снимизе 1991 иестэ "Самарателефильм" киностудиянь А. Миронов режиссерось. Паро мельсэ, вановтонь а саезь, вансть, кода Николай Мастин эйкакш марто вирьсэ кери налшкенень чувтт, тонавты анокстазенть эйстэ керсемс минень-сюнонь ракшат, эрьва кодамо чачонь ломанть.
Вирь ало Тавлань чувтосто керсемань эйкакшонь школань ушодоманть кисэ, Кочкурбуень культурантень питнейдеяк питней путовксонть кисэ С.Н. Герасимова прявтонть пельде Н.И. Мастиннэнь максозель Почетной грамота.
– Васняяк евтан сюкпря, што муеде шка самс тей, - мерсь Николай Иванович. - Оймсетядо кудонь тевтнень эйстэ, пяряк седеенкак ризакады. Евтаса видьстэ – мелем арасель вана истя пуромомс ве таркасо. Икелепелев минек карми сокамо-видема шкась – покш, келей паксятне эрявить пештямс видьмесэ, пандятнеяк видемат – те сехте покш тевесь. Куроксто карматано тешкстамо Ине Победанть – 75 иеть ютасть, зярдо минек масторось изнизе фашистской Германиянть. Секскак те пек покш сюворксонь чи – сонзэ эряви вастомс парсте, мелень витезь, оймень ванськавтозь. Мейле туи оште вейке покш чи – Конституциянь полавтома юронть, сонзэ пештема юронть кисэ карматано максомо меленек. Солавтызе седеем се, што тесэ кармить эйкакшт, конатненень ули мезе евтамс.
Мокшонь ды эрзянь раськень масторютконь вейсэндявксонть секретаресь Олег Владимирович Дулкин тешкстызе Николай Ивановичень кода лия лангс а молиця, превей ломанекс. Ды те алкукс истя! Мастин – те тиринь масторонь вечкиця патриот, кона эрьва тевсэнзэ шны эрзянь раськенть, сонзэ сюпавчинзэ ды культурназо. Наукасо ули чарькодема "Научная школа" – прявтонть перька ломанень вейсэндявома, конатне явить мартонзо мель, важодемань лув. Николай Ивапнович – алкуксонь раськень кол, маштыця ломань, конань ули эсензэ "шкинемань школа", косо тонавтнесть истят ломанть кода Петр Владимирович Рябов ды Василий Григорьевич Ширманкин. Сынь ней поладызь тевензэ ды алкукс кандыть мелензэ-арсеманзо. Те пек покш изнявкс эрзя-мокшонь культуранть, искусстванть содавтовома тевсэ. Секскак Мордовиянь культурань, раськень политикань ды архивной тевень министерстванть пельде Олег Владимирович Дулкин макссь Н.И. Мастиннэнь раськетнень ютксо важодеманть кисэ медаль, евтась сюкпря ды кеме поздоровт.
– Ялгат! Ансяк ванынек аволь покш кино, конась велявтымизь минек 35 иеде икелев, косо Николай Иванович невтезь кода алкуксонь тонавтыцянть, - пшкадсь весенень В.И. Ромашкинэнь лемсэ "Этно-кудонь" прявтось Петр Владимирович Рябов. - Монь жо ули мелем велявтомс тынк седеяк удалов. Мон вейке сермасо невтса, кода ломанесь весе оймензэ, весе виензэ, весе вечкеманзо путсь эсензэ тевентень. Николай Иванович весе тонавтницянзо марто свал кирдсь сюлмот – весень сермат сермалесь. Сынст ютксо монгак. Зярдо мон служинь армиясо, сон монень сермадсь: "…Те карми пек паро, бути минь эсенек вийсэ карматано кемень иес паморьксонь-паморькс пурнамо Мордовиянь эрямонь ужонзо. Тонавтомань школа-кудо, музей, кезэрень пингень кедьенкст, менель ало чувтосто керсезь скульптурат – тавлань кол, маштыця ломанень вейсэнь тев. Шкинемасо виев ломанть, мазыйстэ керсезь скульптурат, конат аштить веленть пандонзо прява, паро выставкат минек масторонть томбале – эдь те весе теевить, тень кисэ эряви тюремс – эскельксэнь эскелькс, изнямосто изнямос, тонавтницясто тонавтницяс, кемемасто кемемас анокстамс, тонавтомс, трямс-кастомс учома ды важодемс. Кадык ботатано школа марто, кедьенкс лангсо, ансяк те теи покш эскелькс сы шкатненень. Минек кармить паро тонавтницят, канат кармить лездамо теемс те арсеманть. Зяро ерокчи, эрямо, вий ды кемема те арсемасо! Миненек, ансяк миненек эряви важодемс, кемемс парсте тевенть теевемантень. Сонсь эрямось евтызе те арсеманть шкинемань ломань марто. Пежедемась, конань минь максынек конев лангсо, свал эряви кирдемс мельсэ (Те пежедемась ульнесь васенцеде максозь зярдо ульнесь панжозь керсемань кружок – школа оште арасель. Весе вейсэ уставинек Николай Иванович марто керсеме – вейсэ сермадынекак пежедеманть. Те ульнесь аволь налксемань тев – сонензэ минь кеминек, секскак свал бажинек сонзэ топавтомс). Кармить стакачить, ансяк сынь ютыть. Ней ансяк минек вийсэ кочксемс тонавтницят ды трямс-кастомс сынст эйстэ алкуксонь патриотт, арсиця ломанть, конатне бу виде целенть кисэ апак ризнэ ертовлизь эрямо паронть. Школасонть тынь карматадо тонавтомо. Тенть тынь свал кирдеде мельсэ. Сон карми виев ансяк сеньсэ, што карми сюлмавозь эрямонть марто, чувтосто керсемась ды школась – эрямо. Тонавтнема таркась, эйкакштнень сехте паро керсевкстнэ, конат туить велень мазылгавтомо – эрямо. Тонавтнема таркась ды мелесь-арсемась – эрямо эрзя-мокшотнень алкуксонть кисэ. Ней ды ансяк ней мон карминь марямо уставазь тевенть эрявиксчинзэ. Мелявтан седе, што ютавтынь ламо вийть ды шка те меленть-арсеманть теемантень…". Кодамо тонавтыця, кодамо покш ойме, кодамо шкинема Пазось казсь Од Пурня велень чачозентень ды Вирь ало Тавласо эрицянтень. Аволь весе мезде арсесь топавтовсь, ламо мезде арсесь, мезе тейсь – лиссь. Те вишка чувтонь алашинесь – минек республикань бренд. Сонзэ содасы весе модамасторось. Сон финно-угрань сисемеце чудакс яволявтозь. Тенень сюкпря эряви меремс Николай Ивановичнень. Кенярдовты вейке результат – тавлань налшкесь лиссь. Ансяк сехте покш арсематне ялатеке эзть топавтовт. Минь вешинек, учинек Вирь ало Тавланть теемс этнографической велекс, конась улевель памятникекс эрзянь культурантень… Мон евтан тыненк, Николай Иванович, кеме шумбрачи. Максозо Пазось неемс ансяк паронть – беряненть илязо. Мелень коламот эрямосонк илязт уле.
Ламо поздоровтт евтасть те вастовомасонть. Эзть кадово весень эйсэ Н.И. Мастинэнь чачома велень ломантнеяк. Сынст пельде ламо лембе валт евтасть "Гайги вайгель" фольклорной ансаблянь эрзянь аватне, конатне мелест-арсемаст евтызь эряза мазый моросо.
Покшчинть прядовомсто Николай Иванович мерсь, што минек икелев молиця тевтнеде ламо. Важодеманть пезэ а неяви, эдь ломанесь – те церькова. Кирьпецьте-чувтодо башка сонзэ пешти ойме, мельть-арсемат, тевть. Секскак, весемесь, мезе мон теинь, илязо ема – улезэ саемгакс, секс што, ульнесь теезь ойме марто.