"Литова" эрзянь авань вейсэндявксонть содасызь Мордовиясо ды Россиянь ламо ёнкстнэсэ. Сонзэ прявтсо ашти Раиса Щанкина – Мордовия Республикань культурань заслуженной важодицясь, сёрмадеесь, Кочкурбуень Сурвелесэ чачозесь. Те превей эрзянь ава ды валдо ломань. Секскак минь покш мельспаросо ды оймеде оймес кортнинек вейсэндявксонь ютавтовиця тевтнеде, тиринь Сурвеледе, эрзянь кельде ды лиядо мезде.
– Раиса Борисовна, васняяк ёвтнек "Литова" лементь ланга. Кодамо смустезэ ды мекс сон кочказель эрзянь авань вейсэндявксонь лемекс?
– Литова – те эрзянь авань кезэрень лем. Кода ёвтневи "Масторава" эпоссо, Литова ульнесь Пурьгинепазонь цёранть Ёндолонь никс. Сонзэ пельде чачсь Тюштя, кона карми раськень прявтокс. Истямо мазый лементь минь саинекак эсенек вейсэндявксонть туртов.
– Зярдо пурназель эрзянь авань вейсэндявксось ды кить тозонь совить? Кочкурбуестэ тосо улить ават?
– Эрзянь авань вейсэндявксось теезель 1997 иестэ. Тердтнинек ламо инжеть. Тердезтнень ютксо седе ламо ават ульнесть Кочкурбуестэ. Мураньстэ сакшность "Сюлгамо" ансамблясо морыцятне. Сынст марто минь аволь весть ютавтнинек вейсэнь вастовомат. Нейгак превсэм кирдян, кодамо покш лезкс сынь макссть Пангонь чинть ютавтомсто. Сындест башка "Литовав" совасть ават кода Саран ошсто, истя республиканок буетнестэяк. Сынст ютксо башка тарка саить Кочкурбуень Сурвелестэ аватне. Васняяк, вейсэндявксонь юрокс ульнесь ды нейгак каднови "Ламзурь" морокурось. Тосо морыцятнестэ седе ламот Кочкурбуень Сурвелестэ. Васенце сыцятнень ютксольть Константинова Лидия Николаевна, Пронькина Любовь Ивановна, Рабцевич Валентина Ивановна, Пронькина Раиса Максимовна ды мон. Шкань ютазь састь Ольга Васильевна Романова. Сон – чачомань коряс Пурня велестэ. Седе мейле юткозонок полонявсть Любовь Петровна Пронькина, Раиса Сергеевна Зорькина, сынь чачомань коряс – Сурвелень. Шканть молеманзо марто теевсть полавтомат минек ансамблясояк. Пек покш ризнэмат весе минь печтинек, зярдо шкадо икеле кулость Любовь Ивановна Пронькина ды Лидия Николаевна Константинова. Ней юткозонок састь од морыцят. Вейкесь эйстэст – Надежда Владимировна Бочканова. Сон чачсь-кассь Кочкурбуень Кацялай велесэ. Ды ней, удалов варштазь, апак пеле мерян, минь теинек аволь аламо. Васняяк, вельмевтинек кезэрень истят койтнень, кода "Ведявань озкс", "Эрьбань чи", "Тундонь ильтямо", "Кизэнь вастома", "Норовавань чи", "Роштовань кудо" ды лият. Сынст ютавтнетяно кода велесэ, истя Саран ошсо. Теде башка сцена лангсо аволь весть путнинек урьвакстомань-мирденень лисемань койтнень. 2013 иестэ Ульяновскойсэ "Свадьба в Обломовке" фестивальсэнть, косо ульнесть сыцят Россиянь весе ёнкстнэстэ, миненек максозель колмоце тарка. Лия фестивальтнесэяк миненек свал макснить шнамонь конёвт ды казнеть.
– А кода понгомс "Литовас"?
– Мертяно, тень теемс аволь стака. Эряви ансяк гайневтемс, вастовомс мартонок ды сёрмадомс энялдома. Минь аноктано эсенек юткс саемс эрьва пшкадицянть. Тердемась вейке – улезэ аванть мелезэ кандомс лезэ эсензэ раськенть туртов. Видькстан, эрзянь аватнень а шожда кепедемс таркастост. Сехте пек учёнойтнень ды сетнень, кить важодить, кода мерить, паро таркава. "Литовань" седе ламо аватне а кандтнить покш лемть. Тень таркас сынст седейсэ палы вечкема эсь раськентень, сынст ули мелест лездамс тензэ цидярдомс, а ёмамс, кода ёмасть ламо лия раськетне. Ды тень сынь теить аволь прянь шнамонть кисэ, аволь сюпалгадоманть кисэ. Весемесь тееви седеень тердеманть коряс. Тень кис тенст сюконятано мастор видьс.
– Кода целанек ютась те иесь вейсэндявксонть туртов?
– Те иесь ютась а шождасто. Пандемиянть кувалма аволь весемесь, мезе арсинек теемс, топавтовсь. Теке марто мерян, теинек аволь аламо. Таштамковсто ютавтынек Норовавань чи. Сон ульнесь Вирь Тавласо ды ютась пек парсте. Теньсэ пек лездасть тенек Пётр Рябов (Калаганонь Керяз) "Эрьмезь" Вирь Тавлань чувтосто керсицянь вейсэндявксонь прявтось, Раиса Водясова Йовлань Олонь лемсэ "Этно-кудо" музеень важодицясь, "Толава" ансамблясо морыцятне. Теке марто минек вейсэндявксось кеме сюлмавкст кирди Мордовия Республикань А.С. Пушкин лемсэ раськень ловнома кудонть марто. Сеедьстэ ютавтнетяно вейсэнь вастовомат. Тедеде невтинек "Морось – раськень ойме" мастер-класс "Я музу посвятил…" литературань ды театрань фестивальсэ, кона ютавтозель омбоцеде. Теде башка миненек сеедьстэ пшкалить лия регионсто, энялдыть ёвтамс лембе валт се эли тона вастовоманть ютавтоманзо кувалма. Моро марто истят онлайн-невтемат кучнинек ламо таркава. Саемга, аволь умок Самара ёнксонь Сызрань ошсо ютась "Паронь пандома" вейксэце фестиваль. Минек вейсэндявксонть пельдеяк ульнесть ёвтазь паро валт, казнекс кучозель эрзянь моро.
– Раиса Борисовна, тон чачить-касыть Сурвелесэ. Сеедьстэ лисни пачколемс эсь тиринь велев?
– Истя. Чачинь мон Сурвелесэ. Кепе чийнинь луга ланга, превть ды содамочить таштынь минек велень школасо. Кода ламо лиятнень ладсо туинь тонавтнеме Саран ошов ды теске кадовиньгак. Чачома велем свал кирдян эсень седейсэ. Нама, яксемс тов ней савкшны аволь сеедьстэ. Ялатеке снартнян тов понгонемс. Весемеде пек кизна. Вечкан яксеме кстыйс ды мастумарьс (клубника). Ансяк вейкесь кольсти ёжом: велесь кармась рузыямо. Эйкакштнень ютксо чуросто зярдо марят эрзякс кортыцят. Те пек ризнэвты эйсэнь.
– Содазь, ней Сурвелесэ одкстомтови культурань кудось, кона стявтозель 1968 иестэ. Тонь койсэ од полавтоматнень марто полавтови велень эрицятнень ёжост, эрямост?
– Мелем ули кемемс – эрицятнень ёжост полавтови. Клубонть умок эряволь витнемс. Пек сон амазыель ушо ёндояк, берянель потстояк. Ней сон мазылгавтозь. Те а берянь. Ансяк паролгады-арась тень эйстэ ломантнень ёжост – а содан. Монь койсэ, тевесь аволь ансяк сень эйсэ, кодамо кудось, тевесь сень эйсэ, парсте эли беряньстэ кармить важодеме сонзэ азортнэ. Кода лия таркатнесэяк, эрзянь велесэ васенце меленть, арсян, эряви явомс эсенек койтненень, сынст ванстомантень.
– Культурань кудонть панжомадо мейле арсят ютавтомс морамонь чокшне эли, паряк, ловныцятнень марто вастовома?
– Эсень велесэ мон свал анокан ютавтнемс вастовомат. Икеле сынь эрсесть седе сеедьстэ. Эсь шкасто минек вейсэндявксонть ушодксонзо коряс Сурвелесэ кармакшнынек ютавтнеме Троицянь чинть ды истя, кода ютавтнесть седикеле. Наряжазь килей марто якинек велева, морынек эрзянь морот, ютавтынек эрьва кодат налксемат, пелькстамот. Мейле те коесь полавтозель. Тарказонзо ней ютавтнить моронь кужот. Ловныцятнень марто вастовомат Сурвелесэ арасельть. Таго-мекс а тердтнить эйсэм.
– Раиса Борисовна, кодат мельть-арсемат ёвтавлить веленть чачонзо полавтоматнень коряс? Ды мезе эряви теемс тиринь веленть кастомга?
– Веленть чачозо алкукс кармась полавтовомо. Ламо таркава ней стявтовить од, сэрей кудот. Те пек паро. Лисни, ломантне кармасть эрямо седе сюпавсто. Мелезэм ансяк а тукшныть кшнинь пирявкстнэ. Паро улевель кепедемс китнень. Ламо таркава рудаз шкане ялгояк а ютават эзгаст. Сень кувалма, кода чамсь-чуролгадсь минек велесь, седеем а лоткси ризнэмеде. Мекс истя лисни велетнень марто, тувталтнэде ламо. Весемеде покшось, арсян, од ломантненень а косо важодемс, сынст туртов арась кодамояк тев. Варштындерямс ютазь шкантень, минек велесэ кодат ансяк фермат, комбинатт, артельть ды лият-мезть арасельть. Ломантненень ульнесь косо важодемс. Ней сеть ферматнень эйстэ мезеяк эзь кадово. Секс од ломантне оргодитькак лия таркава. Велесь одов кастови ансяк сестэ, зярдо од ломантненень муеви тев, конанть кисэ сыненст кармить пандомо ярмакт.
– Кода арсят, эрявить велетнесэ ютавтнемс эрзянь покшчить, велень чи эли лият кодаткак промкст?
– Велетнесэ аволь ансяк эрявить ютавтнемс эрзянь покшчить, сынст эрявить теемс коекс. Лиякс велетнесэ кулы эрзянь оймесь. Ды, мерян, тень эйстэ паро киненьгак а карми улеме. Минек масторось сюпав васняяк эсензэ раськетнень ламоксчисэст, сынст культурань сюпавчисэст. Ёмить раськетне – лавшоми сонзэ культураськак. Нейке нетяно, кодат морот гайгить телевизоронь пачк. Сынст эйсэ – а валт а чарькодят, а музыка а марят. Тень коряс ледсть мелезэнь Конрад Лоренцэнь Нобелень премиянь саицянть валонзо: "Раськень койтнень стувтомась – те покштояк-покш пежеть, кона эрьва раськенть зярдо а зярдо пачтясы куломас".
– Сурвеледе тон сёрмадыть кавто ловномапельть. Ламот кевкстнить, карми поладома седе тов эли арась?
– Нолдамс Сурвеледе книга – те монь покштояк покш бажамом. Ве ёндо сон топавтовсь. Ды ялатеке аволь педе пев. Минек веленть пек сюпав эрямопингезэ, кона ушодовсь сисемсядто иеде икеле. Мезе мон пурнынь ды совавтынь кавто книгатнес – те, кода мерить, иневедьсэ петнявкске. Те тевенть эряви поладомс. Васняяк нолдамс башка книга, ков совавтомс весе сетнень лемест, кить тюрсть ютазь войнасо ды максызь эрямост олячинть кисэ. Видькстан, зярс тевесь моли пек стакасто. Учан лезкс Сурвелень ломантнень пельде.
– Мезе лангсо важодят ней?
– Тевем ламо. Кода меринь, пурнан Сурвеледе книганть, кучнян кулят "Эрзянь правдав", сёрмадан ёвтнемат ды лият-мезть, конатнестэ седе ламотне лиснить "Сятко" журналсо. А каднан морамо тевентькак. Эсень вийсэ сниман видео-невтемат, путнян эйсэст интернетэв. Мельспаро эрси, зярдо кучить тень сюкпрянь валт. Лисни, эрзянь моротне нейгак токить седейть.
– Кочкурбуесэ эрить ламо раськеть, конатнень ютксо сехте ламотне – эрзят. Ансяк эрзянь келенть гайгемазо маряви аволь свал. Кодамо важодема ветямс эрзянь келенть кастомга минек тиринь ёнкссо?
– Эрзянь келенть ёжозо ней стакадояк стака. А содан мекс, эрзятнень арась мелест содамс сонзэ, кортамс эйсэнзэ. Ломантне аволь ансяк а кортыть тиринь кельсэст, ламот эйстэст натой нулгодить, куш сынсь рузокскак а маштыть кавто валонь сюлмамо. Минек келесь а идеви, а карминдеряйть сонзэ кода эряви тонавтомо школатнесэ.
– Малавгады Од иесь. Кодат мельть ёвтат "Заря" кулялопань ловныцятнень ды Кочкурбуень эрицятнень туртов?
– Од иестэ "Заря" кулялопань ловныцятненень ды Кочкурбуень эрицятненень арсян васняяк кеме шумбрачи. Кадык сы иесь весень туртов карми седе шождакс, а карми эйсэнек тандавтнеме эрьва кодамо ормасо. Теке марто тердян весень: а стувтнемс, кить минь, кодамо раськестэ лисинек ды весе виенк путомс тиринь келенть, койтнень-кирдатнень ванстомаст лезэс. Те – минек сехте покш сюпавчинек, оймень лисьмапрянок. Коськи сон – чами оймеськак. Чами оймесь – эрзянь раськесь ёми масторлангстонть. Те карми улеме сехте покш пежетекс (грехекс), конань кис а шнасамизь минек мельга молицятне. Уледе шумбрат ды уцяскавт!