Ламо ломантне, конат сакшныть В.И. Ромашкинэнь лемсэ "Этно-кудо" музеев, умок уш а дивавтыть Вирь Тавла велень эрицятнень. Весе содасызь, што тей пек сеетьстэ ардыть инжеть минек покш масторонть эрьва ужинетнестэ, штобу малавгадомс мокшэрзянь народонть культуранзо марто. Ансяк недлячистэ, июлень 14-це чистэ, тувталось ульнесь лия: тесэ ютась "TAVLA TRAIL" спортонь нилеце фестивалесь. Сон пурнынзе спортонь вечкицятнень мик сисем регионсто! Те неявсь ламодояк ламо машинатнесэ, конат таргавсть музеенть эйстэ кинть кавто ёнга малав вайгельпешка.
Вейксэ часстнэнень "Этно-кудо" музеень территориясь мольсь покш коткудав пизэ лангс: трейлэнь участниктне тейсть меельце анокстамот чиемантень, сынст раськест (ламот састь те фестивалентень семиянек) ёвтнесть тенст эсест мелест-кармавтомаст, волонтёртнэ сёрмалесть одс сыця участниктнень. Лиякс меремс, весенень муевсь тев.
Вейксэ чассто ниленьгемень вете минутасто фестивалень участниктненень пшкадсь Андрей Соломкин, те фестиваленть арсицязо-теицязо. Сон шумбракстнесь весе инжетнень марто, ёвтась паро мельть-арсемат те покшчинть ютавтомасо. Андрей Соломкин яволявтызе, што васенце истямо фестивалев сакшность ансяк колмоньгемень ломанть. Ней жо, нилецентень, сынь ламолгадсть малав кеменьксть! Те корты "TAVLA TRAIL" спортонь фестиваленть кемекстамодо.
Кемень чассто, музеенть ортатнень лангсто, торамонть гайтензэ марто, раськень ломантнень кармавтомаст-лездамост марто, чиицятне ушодызь эсест кист. Те иестэнть покшолмань коряс дистанциятнеде ульнесть колмо: кемень километрат, кавксоньгемень километрат ды колмоньгемень кавто километрат.
"TAVLA TRAIL" этно-чиеманть смустезэ сеньсэ, што чиицятнень кист моли аволь ансяк виде киява, а эрьва кодамо пирявкс марто: луга ланга, печтямо-келема ланга (брод), вирьга, пандо прява.
Зярс чийницятне ютасть эсест дистанцияст, фестивалень лия инжетнень туртов эсест морост казсть "Толава" (Пакся Тавла), "Вастома" (Семилей) фольклоронь морокуротне, Николай Старкин, Кочкур велень эрицясь, Н.П. Огарёв лемсэ МГУ-нь тонавтницятне. Эрзянь мазый гайтев моротнень кунсоломсто пильгтне сынсь тердсть киштеме.
Те фестиваленть теицятне эзизь стувто вишка эйкакштненьгак. Сынст туртов ульнесть панжозь налксемань эрьва кодат площадкат. Эсест ёрокчист сынь невтсть "Лабиринт" площадкастонть лисемасонть. Кода ды мейсэ налксесть минек покштятне-бабатне, эйкакштне кармасть содамо "Тюштянь налксемат" площадкасонть. "Сурский рубеж" площадкасонть и эйкакштнэ, и покштнэ Сергей Косынкинэнь ("Сурский рубеж" Ине Отечественной войнань патриотизмань клубонь прявт) лезксэнзэ марто варчнизь эсест виест винтовкасто леднемасояк.
Мокшэрзянь культуранть марто содавиксэкс теевицятне варчнизь эсь виест коцтонь кодамо станоксо важодемасонтькак.
Тесэ жо ульнесть кедьчелькев ломанень ламо теевкст (важодемат), конатнень, мелень коряс, рамсесть инжетне те фестиваленть ледстнемга.
Эзь аште те чистэнть тевтеме Раиса Васильевна Водясоваяк, музеень экскурсоводось. Инжетнень ульнесь покш мелест содамс, кода появась Вирь Тавла велесь, "этно-кудо" музеенть появамонь историянзо ды ламодо-ламодо лиядо.
Весе неть тевтнень марто шкась таргавсь аволь пек куватьс, кармасть велявтомо васенце чиицятнеяк. Нама, эрьва учицянть ульнесь мелезэ, штобу сонзэ содавиксэзэ, раськезэ улевель васенцекс. Ансяк васенцекс велявтсь Михаил Савёлов, Пенза ёндо сыця чийницясь.
Чикуншкань кемголмово часстнэнень чийницятне кармасть велявтомо эсест дистанциятнестэ. Тесэ, музеень ортатнень вакссо, сынст учось казне: весе чийницятненень ульнесть казезь чувтосто керсезь мазый медальть.
Те стакадояк стака тевденть мейле трейлэнь чиицятнень учось чи-куншкань тантей ярсамо (обед). Теевсь уш коекс, каванямс "этно-кудо" музеенть инжетнень толпандя лангсо пидезь селянкадо ды симдемс тикшень тантей чайде.
Кемнилее чассто ушодовсь казнемась. Тесэ яволявтозельть ламо номинацият, конатнень коряс ламотненень ульнесть максозь шнамонь конёвт. Нама, истят соревнованиятнесэ весе кодаяк а лисить изницякс ды, паряк, те а эрявияк. Эдь ламот чийницятнень ульнесь мелест варчамс эсест виест печтямс те дистанциянть.
Эряви ёвтамс сеяк, што весе чиицятненень, сынст валост коряс, пек мельс тусь сонсь дистанциясь эсензэ стакачинзэ марто, Вирь Тавла велень пертьпельксэсь, коштось.
Вана прядовськак "TAVLA TRAIL" спортонь нилеце фестивалесь, а Андрей Соломкин меельцекс ёвтась мель, штобу сы иестэнть сонзэ участниктнеде улевельть кавксть седе ламо.