ӧскӧ ороондорыныҥ кӧп улузы јууныҥ ӧйлӧриниҥ текши јарлу кожоҥдорын кожоҥдогон. Конкурстыҥ туружаачыларыныҥ тоозында балдар ла јаан улус, ӱренчиктер ле ветерандар, јуучылдар ла кӱӱчилер.

9 майда "Россия" каналда бу конкурстыҥ финал јуунты видеоролиги кӧргӱзилген. Бу кӧргӱзӱге кирген кожоҥдордыҥ бирӱзи – бистиҥ аймактыҥ "Ӧлӧтӱ" фольклор ӧмӧлигиниҥ атту-чуулу "Катюша" деп кожоҥды алтай тилге кӧчӱреле, кожоҥдогоны.

Ӧмӧликтиҥ башкараачызы Ольга Мунатованыҥ биске кыскарта куучындаганыла, бу конкурска биригектер деп кычыруны ӧмӧликтиҥ турчызы Любовь Табонкина эткен. Бу кижи конкурс керегинде телевизордоҥ угала, ого туружар керек деп "кӱйӱп" чыккан. Тургуза ла ӧмӧлик бир јерге јуулала, "Катюшаны" орус тилле бир канча катап кожоҥдоп кӧрӧлӧ, алтай тилле кожоҥдозо, артык болор деп, јӧпкӧ келген, нениҥ учун дезе орус тилле ол кожоҥды ончозы билер, а алтай тилле бу кожоҥ солун ла аҥылу угулар. Ӧмӧликтиҥ режиссеры Людмила Арчанова улусты јурттыҥ одожында јууп, тургузып кожоҥдоткон.

"Баштапкы санаабысла, ончо алтай кеп кийимдӱ кӧп кожоҥчылар – таҥ атту эр улус, ӱй улус, кичинек балдар кожоҥго туружар учурлу болгон. Эр улус келбесте, школдыҥ ла оноҥ до кичинек балдарды јууп, алтайлап "Катюшаны" ӱренгенис. Клипти согуп, белетеп, Интернетке Александра Глазырина, Айана Тепукова ла Станислав Глазырин салгандар.

Бу конкурска "Ӧлӧтӱ" ӧмӧликтиҥ туружаачылары ла кӱӱнзеп турушкан улус: Людмила Арчанова, Алексей Киспеев, Лидия Арчанова, Зоя Арчанова, Эльза Кузукова, Арина Садашева, Тамара Манышева, Зинаида Куранова, Василий Кинов, Галина Чеконова, Людмила Сибиргеева. Школдыҥ балдары: Арчанова Элимсур, Алмашева Виолетта, Арчанов Тимур, Ороев Айан, Лагойко Илья, Кузнецова Настя, Чадина Настя, Тепукова Аксана, Чеконов Ренат. Балдардыҥ садигиниҥ балдары: Чеконова Алиса, Табанкин Чечен, Табанкина Карина, эҥ огош туружаачы - эки јашту Арчанова Ай-Кине. Бу турушкан-болушкан балдарга ла јаан улуска ӧмӧликтеҥ јаан быйанысты айдадыс" - деп, Ольга Николаевна айдат.

"Ӧлӧтӱ" ӧмӧликтиҥ јайаандык салымыла јуртта албатылык кожоҥдор ло чӱм-јаҥ, јаҥжыгуларды орныктырып, соныркаган улустыҥ јӱрӱмдик јолы колбулу. Бу ӧмӧлик јоктоҥ Хабаровка јурт јеезеде бир де культуралык учурал болбойт, бир де байрам ӧтпӧйт. "Ӧлӧтӱ" ӧмӧлик аймак ла республикан кеминде јайаандык конкурстардыҥ јеҥӱчили де болгоны јаҥыс катап эмес.

"Под лежачий камень вода не течет!" - деп, јакшы орус кеп сӧс бар эди. Мен сананзам, бу учуралда "Ӧлӧтӱ" ӧмӧлик шулмузын кӧргӱзип, јаҥы технологияларла эптӱ тузаланып, бойыныҥ јайаандык чырайын текши кӧргӱзип ийерге эп-арганы тапкан. Тем алар керек!