Глазов ёросысь Куреггуртын ӧвӧл ни войнаысь бертэм улэп ожгарчиос. Но нокин вунэтымтэ - котькуд улӥсьлэн сюлэмаз уло войнаын ожмаськем песятайзы, атайзы, ӵыжы-выжызы, бускельзы, гуртозы сярысь тодэ ваёнъёс…

Сизьымдон вить арлэсь ятыр ини асьмеос улӥськомы сайкыт инбам улын! Но я отын, я татын ялан кылӥсько пуштэм куараос – уг буйгало война "дурисьёс", сьӧд малпанъёссы улонмес бугырто, чагыр инбаммес пожало.

Локальной войнаосын яке пӧсь точкаосын службазэс нуоно луо удмурт пиос но. 17 куреггурт солдатъёс ожмаськоно луизы шаермылэн палэназ: одӥг мурт - Афганистанын, 16 – Чечня музъем вылын.

Туэ Уйпал Кавказын ожъёс кутскем дырысен 25 ар тырме.

Та лыдпуслы сӥзьыса, Куреггуртын ортчиз сӥё-дано пумиськон. Ужрадэ пыриськизы Глазовысь военком Владислав Семенов; "Боевое братство" огазеяськонлэн кивалтӥсез, ачиз но Куреггуртын вордскем пи, Чечняын ожмаськем мурт - Александр Третьяков; Глазов ёрослэн тӧроез Вячеслав Сабреков. Чечня музъем вылын ожмаськисьёслэн гадь вылазы бырттэмын вал юбилей медальёс.

Мар адӟизы та пиос секыт но кышкыт война вылын, кыӵе шуг-секытъёс пыр ортчизы мурт шаерын – со сярысь возьмато фильмъёс, верало улэп кылем ожгарчиос. Но мае чидазы пиослэн мумыоссы – вераны кылъёс шедёзы меда? Соин ик та медальёс – мумыослэн но данъетсы, соослэн кисьтэм синкылиоссы, соослэн висись сюлэмъёссы, соослэн бурмисьтэм яраоссы… Ужрадэ лыктыны быгатымтэ ожгарчиос понна медальёс сётэмын вал анайёссылы.

"Боевое братство" огазеяськон Глазовын кылдытэмын, Чечняын служить карем воргоронъёслы юрттэт сётон понна. Кивалтӥсезлэн Александр Третьяковлэн верамезъя, общественной огазеяськонэ пырисько дасо пала воргоронъёс – локальной войнаосын – Афганистанын, Уйпал Кавказын службазэс нуэм муртъёс. Ужамзы понна но, эшъёссылы юрттэт сётонлы но нокыӵе коньдон соослы уг сётӥськы – ваньмыз лэсьтӥське ас мылкыдзыя.

- Но кинлы ке юрттэт кулэ ке, утчаськомы спонсоръёс, вазиськиськомы предприятиосы. Кылсярысь, ужамы трос юрттэт сётэ ЧМЗ. Тау ваньмызлы, кин вала вазиськонъёсмес, кин уг отказты, - шуэ Александр Борисович.

Ожгарчиослэн юанъёссы кылдо ке, котькудӥз жингыртыны быгатэ Александр Третьяковлы. Кылдэм югдурез ӵошен палэнтыны тыршозы.

Ужрадэ лыктэмъёс понна сцена вылысен кырӟазы "Офицеры" но "Девчата" ансамбльёс.