Тужгес но шумпотымонэз, ужъюрт шаерысьтымы ожгар комиссариатъёс пӧлын нош ик нырысетӥ интые потӥз. Вормисьын со сизьыметӥ арзэ ветлэ ни.
- Кылем ар капчи ӧй вал, но ваньзэ пуктэм ужпумъёсты ми быдэстӥмы, - вераз Владислав Семенов.
Мобилизационной ужъя 58 огазеяськонъёс но 18 транспорт возись огазеяськонъёс эскеремын, ваньзы соос войскоосы калыкез но техника келяны дась.
Вылӥ дышетсконниосын тодон-валан басьтыны мылкыд кариз 46 адями, но курсант луиз 14 мурт гинэ: 8 - Глазовысь, 6 – ёросъёсысь. Кинлэн ке ЕГЭ-я баллъёссы ӧз окме, мукетъёсыз - физподготовкая ляб луэмзэс возьматӥзы, кудӥз профпригодностья ӧз тупалэ.
Кылем арын ожгарчиос радэ 145 пиос султӥзы, тросэз соос сухопутной войскоосын службазэс нуо.
Нош 9 адями службазэ пумозяз ӧз вутты, мугез – тазалыкенызы герӟаськем шуг-секытъёс.
Егит пиос пӧлын вань армилэсь пегасьёсыз но. Военкоматын ужасьёс карысь администрациен, полициен ӵош 55 адресъя 12 рейд ортчытӥзы. Йылпумъянъёс сюлмаськыто: 4 призывник гинэ шараямын вал.
27 аресъем 15 муртлы справка сётэмын. Соос армие ӧз ветлэ, службалэсь мозмытон понна нокыӵе но мугъёссы ӧй вал ке но. Та адямиос дас ар ӵоже уз быгатэ муниципальной но кун службаосы ужаны интыяськыны.
Егитъёс пӧлын бадӟым уж нуиське атыкай музъемез гажан мылкыд пыӵатонъя. Карын 3 военно-патриотической клуб ужа, юнармеецъёслэн 10 отрядзы, 1 кадет класс, 1 поисковой отряд кылдытэмын. Соослэн ужазы 550 котыр нылъёс но пиос пырисько. Укмыс номеро школаысь "Вымпел" центр улсын огазеямын кык военно-патриотической клубъёс но юнармеецъёслэн отрядзы.
Патриотизмен герӟаськем ужрадъёс пӧлын тужгес но пусйымонъёсыз – строевой подготовкая смотр-конкурсъёс, военной комиссарлы Анатолий Рубленколы сӥзем ёроскуспо спартакиада, пиослэн сьӧд берет нуллыны дась луэмзэс возьматонъя - экзамен.
Та эскерон ужын валтӥсен луэ мер огазеяськонъёслэн юрттэмзы. Коньдон ласянь бадӟым юрттэт сётэ ЧМЗ, кылем арын завод 557 сюрс манет висъяз.
Жаляса верано, апрель толэзьысен онлайн-амалэ выжемен, тросэз ужрадъёс кылизы.
- Бен, кылем ар ковид сэрен аспӧртэмлыко пӧрмиз, но йылпумъянъёс уродэсь ӧвӧл, - шуиз карлэн тӧроез Сергей Коновалов. - Тау ваньмызлы, кин та уже пыриське: ожгар комиссариатын тыршисьёслы, валтӥсь комиссарлы Владислав Семёновлы, администрациын ужасьёслы, предприятиослэн кивалтӥсьёссылы, патриотической воспитаниея клубъёслы, пиосты армие мыныны дасямзы понна.
Ужрадын трос таукаронъёс, грамотаос сётэмын вал. Редакцимылэн ужез но дунъямын. Газетмылэн бамъёсаз военно-патриотической воспитанилы сӥзем уно материалъёс потазы.