- Ми кемалась ӵош ужаськомы, котькудӥз ас ужзэ тодэ-вала, - шуэ Екатерина Чиркова.
Кышномурт семьяеныз Шудзяе Октябрьскийысь дас ньыль ар талэсь азьло лыктэм, картэзлэсь пересь мумызэ утялтоно шуыса.
- Дышетскемея мон медсестра. Училище бере ужай Яр ёросын, Глазовысь но Октябрьскийысь больницаосын. Лыктэм берамы мыным паймымон вал, татын ваньмыз шалтыр удмурт верасько шуыса, нош мынам пиналъёсы (соос вить кузя) уг валало. Ачим мон Октябрьскийысь, удмуртэз тодӥсько, но отын ӟучгес верасько.
Алексей картэз но хозяйствоын ик тырше.
Надежда Князева Глазовысь вуэм. Уж сётонъя центрысь тодэм, "Северный" возёсын скал кыскисьёс кулэ шуыса.
- Пумиськимы кивалтӥсен Геннадий Анатольевичен. Семьяеным Шудзяе улыны выжимы. Корка висъязы. Куатетӥ арзэ татын ни, дышимы.
Тужгес но кема пудо котырын ужа Надежда Утробина. Со Слудкаын вордӥськемын.
– Шудзяе бызи, сразу фермае кариськи, 26 ар татын скал кыскисько ни.
"Северный" эштосын скалъёсты кык пол кыско. Ӵукназэ ньыль-вить часысен скал кыскисьёс пыд йылазы ни, ӝытсэ – куать часлы фермае тубо. Нуназе пудоосты сюдыны ветло на.
- Вордскем кунянъёсмы вань, соосты утялтоно, - шуо. – Шуныт куазен скалъёсты кыре поттылӥськомы.
Котькытчы но вутско, гуртъёсазы но пудо вордо, бакча будэто, куиньназы песянайёс ни, внукъёссылы саклык висъяло.
- Кызьы йӧл кыскондэс йылэтыны быгатӥды?
- Ӟечгес, дыр, сюдӥмы. Тросгес комбикорм, ческыт ватсэтъёс шедизы.
Но улонын уг луы шуг-секытъёстэк. Шудзяосты сюлэмшугъяськытэ каре мынон-ветлон. Сӥзьылысен автобус ветлэмысь дугдӥз – сюресъёс, пе, туж уродэсь, Люмозь гинэ ветлэ.
- Аслад транспортэд ӧвӧл ке, каре потаны шуг ни. Люмозь кин ке пыдын вамышъя, такси ке ӧтёно - карозь 500 манет котыр тыроно луэ, - шуо.
Шуныт, чебер праздник азьын та мыло-кыдо кышноослы сӥзиськомы, малпанъёссы мед быдэсмозы шуыса.